Levitikas 21 - Bislama Bible Revised 2012

Ol pris oli mas tabu

1Nao Hae God i givim tok blong hem long Moses bakegen, blong hem i go talemaot long Hae Pris Eron wetem ol pikinini blong hem. Hem i talem se, “Moses. Olgeta ya oli pris blong mi, mo sipos wan famle blong olgeta i ded, bambae olgeta oli no mas go joen long ol fasin we ol man oli mekem blong berem hem, from we ol fasin ya bambae oli mekem olgeta oli doti long fes blong mi.

2Be sipos man ya we i lus i woman blong wan long olgeta, no i mama blong hem no i papa blong hem, no i pikinini boe blong hem, no i dota blong hem, no i brata blong hem,

3no i sista blong hem, we i no mared, i stap yet long haos blong hem, bambae hem i save go joen long olgeta blong berem hem.

4Be sipos man ya we i lus i wan famle blong woman blong hem, no i wan famle blong woman blong brata blong hem, no i wan famle blong woman blong pikinini blong hem, bambae hem i no mas go joen long olgeta blong berem hem. Sipos i go joen, bambae hem i kam doti long fes blong mi.

5Lev 19.27,28; Dut 14.1Mo sipos wan famle blong wan pris i ded, bambae pris ya i no mas katemaot hea no mustas blong hem, mo i no mas katkatem bodi blong hem blong soemaot we i stap sore from hem.

6Olgeta oli pris blong mi, mo oli no mas spolem nem blong mi. Olgeta oli mas tabu we laef blong olgeta i klin gud olgeta. I wok blong olgeta blong bonem ol sakrefaes blong yufala long Olta blong givim olgeta i kam long mi, mo from samting ya, olgeta oli mas tabu gud.

7Mo from we laef blong olgeta i mas klin gud, i tabu blong oli tekem woman we fastaem i woman blong rod, no woman we man i go long hem finis, no woman we man blong hem i mekem divos long hem.

8Olgeta oli tabu, mo yufala evriwan i mas save samting ya, from we oli stap bonem ol sakrefaes blong yufala long Olta blong givim olgeta i kam long mi. Mi mi Hae God. Mi mi tabu mo mi stap mekem olgeta man blong mi oli tabu.

9Mo sipos dota blong wan long ol pris ya i kam woman blong rod, fasin ya blong hem i soemaot we hem i no ona nating long papa blong hem, mo yufala i mas bonem hem gogo i ded.

10-12“Nao man we ol pris oli putumap hem i kam hae pris, hem i man blong mi, mo hem i no mas mekem hem i kam doti long fes blong mi. Long taem ya we olgeta oli kafsaedem tabu oel i go long hed blong hem blong putumap hem, mo oli makemaot hem se hem i save putum ol spesel klos blong hae pris, hem i kam tabu, i kam hae pris blong mi. Nao sipos wan famle blong hem i ded, bambae hem i no mas folem ol fasin blong yufala blong soemaot we hem i sore long man ya. Hem i no mas terem* klos blong hem, mo oltaem i mas swim mo i mas komem hea blong hem. Bambae hem i no mas aot long Haos Tapolen blong mi blong go insaed long haos we dedman ya i stap long hem. Fasin ya bambae i mekem Haos Tapolen blong mi i doti. Nating we dedman ya i papa blong hem no mama blong hem, be i tabu blong hem i go mekem olsem. Mi mi Hae God, mo tabu oel ya blong mi i makemaot hem finis, se i hae pris blong mi.

13Bambae hem i mas tekem wan gel we i no gat man i go long hem yet.

14Hem i no save tekem wan wido, no wan woman we man blong hem i divos long hem, no wan woman blong rod. Bambae hem i mas tekem wan gel we i laen* blong Livae,* we i no gat man i go long hem yet.

15Sipos hem i tekem wan woman we i slip wetem narafala man finis, ol pikinini blong hem we i stret blong oli tabu, oli man blong mi, bambae oli doti long fes blong mi. Mi mi Hae God, mo mi mi stap mekem hem i tabu.”

16Nao Hae God i givim tok blong hem long Moses,

17blong hem i go talemaot long Hae Pris Eron. Hem i talem se, “Sipos i gat wan pikinini blong hae pris ya, no wan long olgeta we bambae oli kamaot biaen long hem we i gat wan samting i rong long bodi blong hem, i tabu blong hem i bonem ol sakrefaes blong yufala long Olta blong givim olgeta i kam long mi. Rul ya bambae yufala i mas holem olwe gogo i no save finis.

18Sipos wan long olgeta i gat wan samting i rong long bodi blong hem, bambae hem i no save mekem wok ya. Hemia man we i blaen, mo man we leg blong hem i nogud, mo man we wan samting i spolem fes blong hem, no bodi blong hem,

19mo man we han blong hem i ded, no leg blong hem i ded,

20mo man we baksaed blong hem i kruked, mo man we bodi blong hem i no gru gud nao i sotfala tumas, mo man we ae blong hem i nogud, mo man we i gat rabis sik blong skin i stap long hem, mo man we i natamap.*

21Sipos wan long ol pikinini blong hae pris ya no wan long olgeta we bambae oli stap kamaot biaen long hem i gat wan samting olsem i rong long bodi blong hem, bambae hem i no save bonem ol sakrefaes blong yufala long Olta blong givim olgeta i kam long mi.

22Hem i save kakae haf blong ol sakrefaes ya we i blong pris nomo, nating we haf blong sakrefaes ya i tabu, no i tabu we i tabu, be i gud nomo, hem i save kakae, be hem i no save mekem wok blong mi.

23Hem i no mas kam klosap long kaliko ya we i blokem Rum ya we i Tabu we i Tabu, insaed long Haos Tapolen blong mi, mo i no mas kam klosap long Olta blong mi. Bambae hem i no mas mekem ol samting ya we oli tabu oli kam doti long fes blong mi, from we mi mi Hae God, mo mi stap mekem ol samting ya oli tabu.”

24Hemia nao ol samting we Moses i talem long Hae Pris Eron wetem ol pikinini blong hem mo long ol laen blong Isrel.*