Esikel 26 - Bislama Bible Revised 2012

Hae God i tok long ol man Taea

1 Aes 23.1-18; Joel 3.4-8; Amos 1.9,10; Sek 9.1-4; Mat 11.21,22; Luk 10.13,14 Nao long namba leven yia blong yumi we yumi stap wok slef* long Babilonia, long fas dei blong manis, Hae God i toktok long mi long wan vison,

2i talem se, “Man blong wol ya. Ol man blong taon ya Taea oli stap glad, oli stap singsingaot bigwan. Oli stap talem se, ‘!Naoia ol enemi oli flatem Jerusalem* finis! !Oli brebrekemgud taon ya! !Paoa blong hem blong wokem bisnes i finis olgeta! !Yumi save holem ol bisnes blong hem nao! !Hem i lus finis!’

3“Nao from samting ya, mi mi tok agens long taon ya Taea, mi talem se, ‘Taea. Mi mi Hae God, mi Masta* blong olgeta man, mo naoia mi mi enemi blong yu. Bambae mi tekem ol man blong ol narafala kantri oli kam mekem faet long yu. Bambae oli kam olsem ol bigbigfala swel blong solwota, nao bambae oli kavremap yu.

4Bambae oli brebrekem bigfala stonwol blong yu, mo oli brebrekemdaon ol wajhaos blong yu. Nao bambae mi brumumaot ol doti blong yu i gowe, mo bigfala ston ya we yu yu stap stanap long hem, bambae i stap nating nomo.

5Bambae hem i stanap long medel blong solwota mo ol man blong pulum fis bambae oli stap putum ol net blong olgeta long hem blong oli drae. Bambae ol man blong ol narafala kantri oli winim yu, nao oli karemaot olting blong yu i blong olgeta.

6Mo bambae oli kilim olgeta man we oli stap long ol vilej ya blong yu we oli stap long menlan. Nao bambae yu yu savegud we mi mi Hae God. Mi mi Masta blong olgeta man, mo hemia tok blong mi.’ ”

7Mo hem i talem se, “Taea. King Nebukadnesa blong Babilonia, we hem i hae moa long ol narafala king, mi bambae mi tekem hem i kam mekem faet long yu. Bambae hem i aot long saed long not, i kam wetem wan bigfala kampani blong ol soldia blong hem, wetem ol hos, mo ol kat blong faet, mo ol soldia we oli ron long hos.

8Mo olgeta man we oli stap long ol vilej ya blong yu long menlan, bambae oli ded evriwan long faet ya. Bambae ol enemi ya oli digim ol hol, mo oli hivimap graon, mo oli stanap laen wetem ol sil* blong olgeta, blong mekem faet long yu.

9Mo bambae oli yusum ol bigbigfala wud blong brebrekem bigfala stonwol blong yu, mo oli yusum aean blong smasem ol wajhaos blong yu.

10Mo smok blong asis blong graon we ol hos blong olgeta oli mekem, bambae i kavremap yu, from we ol hos ya oli plante we plante. Mo ol hos we oli pulum ol kat blong faet, wetem ol hos we oli pulum ol kat we oli karem olting blong olgeta, bambae oli resis i gotru long ol doa* blong bigfala stonwol blong yu, nao bambae noes blong olgeta i mekem stonwol ya i seksek. Bambae oli resis i go insaed long yu, olsem we ol man oli stap resis i go insaed long taon we bigfala stonwol blong hem i brobrok finis.

11Mo bambae ol soldia we oli ron long hos oli go olbaot long ol rod blong yu, oli kilim olgeta man blong yu long naef blong faet blong olgeta. Mo ol bigbigfala pos blong ol haos blong yu, olgeta ya bambae oli brebrekemdaon olgeta evriwan.

12Mo ol enemi ya blong yu bambae oli tektekemaot ol gudgudfala samting blong yu, mo ol samting ya we yu stap salem, bambae oli karem i blong olgeta. Nao bambae oli brebrekem bigfala stonwol blong yu, mo bambae oli brebrekem ol haos ya blong yu we oli flas we i flas. Nao bambae oli karemaot ol ston wetem ol timba blong hem mo ol doti blong hem, oli sakem olgeta i go long solwota.

13Rev 18.22Mo bambae mi mekem we yu no moa stap singsing, mo yu no moa stap plei long gita blong yu.

14Mo bambae mi livim ston ya we yu yu stap stanap long hem i stap nating nomo, nao ol man blong pulum fis bambae oli save putum ol net blong olgeta long hem blong oli drae. Nao bambae i no moa gat man i save wokemgud yu bakegen samtaem. Mi mi Hae God, mi Masta blong yu, mo hemia tok blong mi.”

15Mo hem i gohed i talem se, “Taea. Taem ol enemi oli kam mekem faet long yu, mo oli winim yu, bambae oli kilim olgeta man, mo krae blong olgeta bambae i mekem olgeta man we oli stap long ol ples klosap long solwota oli fraet we i fraet.

16Rev 18.9,10Ol king blong olgeta kantri we ol man blong olgeta oli man blong wokbaot long sip, bambae oli fraet we oli fraet gud long trabol ya blong yu, nao bambae oli seksek tumas from. Bambae oli aot long ol jea blong olgeta, mo ol kot blong olgeta mo ol gudgudfala klos blong olgeta we ol man oli somap ol pija long olgeta blong flasem, bambae oli tekemaot evriwan, nao oli go sidaon long graon, oli stap seksek.

17Bambae oli stap krae long yu, oli singsing long sing ya blong ded, we i talem se,

‘Yu nambawan taon.

Ol man oli savegud yu,

be ol enemi blong yu oli spolem yu finis.

Naoia, ol sip blong yu oli no moa gat,

oli lus.

Bifo, ol man blong yu nomo

oli stap rul long solwota ya,

mo oli stap mekem ol man

we oli stap long ol taon klosap long solwota

oli fraet we i fraet,

be naoia,

ol man ya oli no moa stap.

18Long dei ya we yu yu foldaon,

olgeta aelan oli seksek.

Ol man blong olgeta oli sek gud,

mo oli harem nogud tumas

we yu yu kam nogud olgeta.’ ”

19Nao hem i talem se, “Bambae mi mekem yu yu stap nating nomo, olsem ol narafala taon we oli spolem olgeta finis, i no moa gat man long olgeta. Mo bambae mi mekem bigfala solwota i kam kavremap yu.

20Mo bambae mi sanem yu yu godaon long Hom* blong ol Dedman, blong yu go joen wetem ol man blong bifo. Bambae mi mekem yu yu stap daon long Hom blong ol Dedman, wetem olgeta samting we oli nogud finis, we bambae oli stap gogo i no save finis. Nao bambae yu stap olwe wetem ol dedman. Nao from samting ya bambae i no gat man i save kam mekem hom blong hem long yu bakegen, mo bambae yu no moa save kam wan taon bakegen samtaem.

21Rev 18.21Nao samting ya we mi bambae mi mekem long yu i blong wonem ol man, nao taem oli luk, trabol ya bambae i mekem olgeta oli fraet we i fraet. Hemia bambae i en blong laef blong yu. Bambae ol man oli lukaot yu, be neva bambae oli faenem yu bakegen samtaem. Mi mi Hae God, mi Masta blong yu, mo hemia tok blong mi.”