Aesea 28 - Bislama Bible Revised 2012

Kantri ya Isrel long not bambae i kasem panis

1Mo Profet Aesea i talem long ol man blong hem se, “Olgeta. !Sore tumas long kingdom ya Isrel* long not! !Bambae hem i lus olgeta! Ol gudgudfala samting blong hem oli stap kam nogud, olsem ol flaoa ya long ol hat blong ol lida blong kantri ya, we oli stap kam drae. Ol lida ya oli flas tumas, oli stap putum senta, be oli man blong drong. Oltaem oli stap ledaon long graon long ples ya, we oli fuldrong olgeta.

2Hae God i gat wan man blong wok blong hem we i strong, i gat paoa, mo hem i rere blong kam mekem faet long olgeta. Bambae hem i kam flatem ples ya, olsem ston blong aes* we i folfoldaon olsem ren, i flatemgud ol kakae long garen, no olsem bigfala ren we i spolem evri samting, no olsem reva we i ron bigwan, i draonem ples olgeta. Bambae hem i kam flatemdaon kantri ya, we i flatemgud.

3Ol samting ya we ol lida ya oli stap flas long hem, man ya bambae i stap purumpurumbut long olgeta.

4Ol gudgudfala samting blong kantri ya we naoia oli stap lus, we ol lida ya oli stap flas yet long olgeta, bambae oli lus olgeta, olsem ol fasfrut blong figtri,* we taem ol man oli luk, oli go tekem, oli kakae wantaem.

5“Hae God i gat olgeta paoa, mo i gat dei i stap kam, we hem bambae i kam olsem spesel hat blong king we oli flasem long flaoa, mo bambae hem i flasem ol man blong hem we oli laef yet long taem ya. Long taem ya, hem bambae i mekem ol man blong hem oli harem gud.

6Bambae hem i mekem ol man blong mekem kot oli savegud stret fasin blong jajem man, mo ol man we oli go blong faet long doa* blong stonwol blong taon, bambae hem i mekem olgeta oli strong man blong faet, blong oli save blokem ol enemi oli no kam insaed.

7“Nating we ol profet mo ol pris,* be olgeta tu oli fuldrong we oli no save wokbaot. Oli stap dring waen mo ol narafala dring olsem gogo oli drong gud, we hed blong olgeta i raon, nao oli stap folfoldaon. Ol profet oli drong tumas, nao oli no save luksave ol vison* we Hae God i stap givim long olgeta, mo ol pris tu oli drong tumas, nao oli no save stretem ol trabol we ol man oli stap talemaot long olgeta.

8Ol tebol we oli stap kakae long hem, traot blong olgeta i fulap long hem, i no moa gat ples i stap we i klin gud.

9“Be sam long yufala i stap tok agens long mi. Oli talem se, ‘!Ei! !Profet ya i krangke ya! ?Hem i ting se i stap tijim hu ya? ?Hu i nidim ol tok blong hem? !Tok blong hem i naf blong smol pikinini we i jes livim titi naoia nomo!

10Hem i stap tok long yumi olsem we hem i wantem lanem yumi long abisi, we i talem long yumi blong talem wan leta, wan leta, wan laen, wan laen, wan lesen, wan lesen. ?Wanem ya?’

11 1 Kor 14.21 “Olgeta. Sipos yufala i no save lesin long mi, bambae Hae God i yusum ol man blong narafala kantri blong tijim yufala, we lanwis blong olgeta bambae i narafala olgeta.

12Hem i wantem givim spel long yufala evriwan, mo i wantem mekem yufala i harem gud bakegen, be yufala i no wantem lesin long hem, yufala i tanem baksaed long hem.

13From samting ya, bambae hem i tijim yufala, olsem we i stap tijim smol pikinini nomo, we i talem long yufala blong talem wan leta, wan leta, wan laen, wan laen, wan lesen, wan lesen. Be evri taem yufala i wokbaot, bambae yufala i foldaon. Bambae yufala i foldaon long trap, yufala i karekil, mo ol enemi bambae oli kam holem yufala.”

Ston we i stamba blong fandesen blong olgeta samting long Saeon

14Nao Profet Aesea i talem long ol lida we oli stap rulum ol man Jerusalem* se, “Olgeta. Yufala i stap leftemap yufala, mo yufala i stap tok flas, be i gud yufala i lesin long tok ya we Hae God i talem long yufala.

15Oltaem yufala i stap tok flas se yufala i mekem pis wetem ded, mo yufala i mekem promes finis wetem Hom* blong ol Dedman. Nao yufala i stap talem se sipos bigfala trabol i kam, be ded bambae i no save kakae yufala, from we yufala i trastem ol tok ya we yufala i talem finis. Be ol tok ya blong yufala i blong giaman nomo, yufala i stap wokem trik nomo.

16Sam 118.22,23; Rom 9.33; 10.11; 1 Pita 2.6Be yufala i lesin. Hae God i Masta blong yumi, mo tok blong hem i olsem. Hem i talem se, ‘Naoia mi mi putum wan fandesen long Saeon,* we i strong, mo i no save muf. Long fandesen ya, mi putum wan strong ston long kona, we i blong makem haos ya, mo i gat tok long hem we i talem se, “Man we bilif blong hem i stanap strong, tingting blong hem i longfala.”

17String blong makem saes blong fandesen ya, nem blong hem, “Prapa Fasin blong Stretem Trabol”, mo ledlaen we i blong makem wol, se i stap stanap stret, nem blong hem, “Stret Fasin.” ’ ”

Mo profet i gohed i talem se, “Bambae ston blong aes* oli folfoldaon olsem ren, oli flatemdaon ol giaman toktok ya we yufala i stap trastem, mo bambae reva i ron bigwan, i karemaot ol samting ya we tingting blong yufala i stap hang long olgeta.

18Pis ya we yufala i mekem wetem ded, Hae God bambae i tekemaot bakegen, mo promes ya we yufala i mekem wetem Hom blong ol Dedman, hem bambae i tekemaot, i finis. Nao sipos trabol i kam kasem ples ya, bambae i flatemgud yufala.

19Evri dei, bambae bigfala trabol i stap kam kasem ples ya. Long moning mo long naet, bambae yufala i mas karem trabol ya. Mo sipos yufala i savegud mining blong tok ya blong Hae God, bambae yufala i fraet we i fraet.

20Bambae yufala i olsem man ya we wan olfala tok i tokbaot, we i traem blong slip long bed we i sotfala, be i no save stretem leg blong hem, mo i wantem kavremap hem long blangket, be blangket ya i smol.

212 Saml 5.20; 1 Kron 14.11; Jos 10.10-12Olsem we bifo long bigfala hil ya Perajim, Hae God i girap, i faet long ol enemi blong hem, mo i olsem we hem i girap, i faet strong long bigfala levelples ya Gibeon, long medel blong ol hil, bambae hem i girap bakegen blong mekem olsem we hem i wantem. Nating we yumi luk wok blong hem i narafala, mo nating we yumi no save mining blong samting we hem i mekem, be hem bambae i finisim wok ya we i wantem mekem.

22“!Tok ya blong mi i blong wekemap yufala! !Yufala i no laf long hem! Sipos yufala i stap mekem olsem, bambae i strong moa blong yufala i ronwe long ol trabol ya. Hae God i gat olgeta paoa, mo hem i talemaot long mi finis, se bambae hem i spolem olgeta ples blong kantri ya blong yumi.”

Hae God i Waes

23Nao Profet Aesea i gohed, i talem long olgeta se, “!Yufala i lesin long tok blong mi! !Yufala i lesin gud long tok ya we mi stap talem long yufala!

24I no gat man blong wokem garen, we i stap digim graon, digim graon, digim graon, be neva i planem wan samting.

25Taem hem i mekem graon i rere finis, fastaem, hem i planem sid blong ol smosmol samting olsem dil* mo kamin,* mo biaen, hem i planem sid blong wit* mo bale,* mo long saed blong garen ya, hem i planem ol narafala samting.

26Man olsem, hem i savegud fasin blong mekem ol wok ya, from we God i tijim hem finis.

27Mo hem i no save yusum bigfala nalnal blong kilim ol hed blong dil, mo blong kamin, we ol kakae blong tufala i smosmol nomo. Blong kilim ol hed blong tufala, hem i mas yusum smol stik nomo, we i no hevi.

28Mo taem hem i kilim ol hed blong wit long bigfala nalnal blong tekemaot kakae blong hem, hem i no save kilim krangke gogo i spolem, from we hem i save se biaen, hem i mas granem i kam flaoa. Mo sipos hem i yusum kat we hos i pulum, blong wil blong kat i kilim ol hed blong wit ya, hem i savegud fasin blong wokem, we wil blong kat i no save spolem.

29Hae God i gat olgeta paoa, mo olgeta waes ya i stap kamaot long hem. Ol plan we hem i stap mekem, oli waes gud, mo oltaem oli stap kamtru.”