Ol Proveb 28 - Bislama Bible Revised 2012

1Man nogud i save fraet isi nomo. Nating we i no gat man i ronem hem, be hem i save ronwe kwiktaem nomo, be man we i stret, hem i no save fraet, tingting blong hem i strong we i strong, olsem laeon nomo.

2Sipos ol man blong wan kantri oli stap mekem sin, ol lida blong olgeta bambae oli no save stanap longtaem. Be sipos ol lida blong kantri ya oli gat hed mo oli waes gud, ol man blong olgeta bambae oli stap gud longtaem.

3Lida we i stap mekem i strong tumas long ol puaman, hem i olsem bigfala hariken we i flatemgud ol kakae long garen.

4Ol man we oli no save obei long ol loa blong Hae God, oli stap leftemap ol man nogud, be ol man we oli stap obei long ol loa ya oli agens long ol man ya.

5Ol man nogud oli no save nating ol stret fasin blong jajem man, be ol man we oli stap ona long Hae God oli savegud ol fasin ya.

6Sipos yu yu kam puaman be laef blong yu i stret gud, hemia i moa gud, i winim we yu kam rijman be laef blong yu i no stret nating.

7Yangfala we i stap obei long ol loa blong Hae God, hem i gat hed, mo papa blong hem i save glad long hem. Be yangfala we i stap hangraon wetem ol man we oli stap mekem ol rabis fasin, hem i stap mekem papa blong hem i sem, i harem nogud.

8Sipos yu stap mekem ol man we oli kaon long yu oli pem intres, mo yu stap ravem ol man, maet mane blong yu i kam bigwan, be bambae narafala man i karem, i yusum blong givhan long ol puaman.

9Sipos yu no obei long ol loa blong Hae God, hem bambae i no save lesin nating long ol prea blong yu, bambae i tanem baksaed long yu.

10Sipos yu stap trikim wan stret man blong pulum hem blong i mekem samting nogud, bambae trik ya i save kasem yu bakegen.

Man we i stret, we i no mekem wan samting nogud, hem bambae i kasem stret pei blong hem.

11Ol rijman, oltaem oli stap ting se oli waes, be puaman we i gat hed, hem i save luksave se i no olsem.

12Taem we ol stret man oli stap holem paoa, olgeta man oli stap mekem lafet. Be taem we ol man nogud oli stap rul, ol man oli stap go haed.

13Sipos yu stap traem haedem ol sin blong yu, bambae yu no save win long laef blong yu. Be sipos yu tanem tingting blong yu, nao yu talemaot ol sin ya blong yu long Hae God, mo yu gowe long olgeta, hem bambae i gat sore long yu.

14Sipos yu stap tinghevi long Hae God, mo yu stap ona gud long hem, bambae yu save harem gud. Be sipos yu stap mekem hed, bambae yu kasem trabol we i spolemgud yu.

15Haeman we fasin blong hem i nogud, hem i save spolem ol puaman we oli no gat paoa. Hem i olsem laeon we i hanggri tumas, i stap singaot bigwan from, no wael pig we i wantem kakae man.

16Haeman we i no gat hed, hem bambae i mekem i strong tumas long ol man, i stap spolem olgeta nomo. Be haeman we i no wantem ol fasin nogud, hem bambae i stap holem wok blong hem longtaem.

17Man we i kilim man i ded, i olsem we hem i stap resis blong go long Hom* blong ol Dedman, mo i nogud yu traem blokem hem.

18Sipos laef blong yu i stret, Hae God bambae i holem yu yu stap gud. Be sipos laef blong yu i no stret, trabol bambae i kasem yu wantaem nomo.

19Man we oltaem i stap wok had long garen blong hem, hem bambae i gat plante kakae. Be man we i stap westem taem blong hem nomo, oltaem nomo bambae hem i trabol.

20Ol stret man, oltaem nomo oli stap harem gud, oli glad long laef blong olgeta. Be man we i stap hareap tumas blong kam rijman, hem bambae i kasem panis from.

21Fasin ya long kot we jaj i stap lesin long wan saed nomo, hem i nogud olgeta, be oltaem i gat man i wantem givim mane long hem, blong i wokem rabis fasin ya. Mo nating we mane i smol we i smol, be oltaem i gat ol jaj we oli glad blong tekem.

22Man we i griri, oltaem nomo hem i stap hareap blong kasem plante samting moa blong mekem hem i kam rijman. Hem i no save tingbaot se i isi nomo blong trabol i kam spolem hem wantaem nomo.

23Sipos yu tok strong long wan man blong stretem hem, biaen, bambae hem i glad moa long yu, i winim we yu stap talem ol swit tok long hem.

24Man we i ting se i gud nomo blong i stilim sam samting long papa mo mama blong hem, hem i sem mak nomo long man we i kilim man blong stilim olting blong hem.

25Fasin ya we man i griri tumas, i no save tingbaot narafala man, hemia i blong statem trabol nomo. Be man we i putum tingting blong hem i stap strong long Hae God, hem bambae i gat plante samting.

26Man we oltaem i stap folem tingting blong hem nomo, hem i krangke we i bitim mak. I moa gud yu stap folem tok blong ol waes man, we oli stap tijim yu long hem.

27Sipos yu stap givhan long ol puaman, bambae yu no save sot long wan samting. Be sipos yu no save tingbaot olgeta samtaem, bambae plante man oli save singaot trabol i kam long yu.

28Sipos ol man nogud oli stap holem paoa, bambae ol man oli mas haed. Be sipos olgeta ya oli foldaon, ol stret man bambae oli stap gud mo bambae oli kam plante.