Ol Proveb 23 - Bislama Bible Revised 2012

Namba sikis waestok

1Sipos yu go kakae wetem wan haeman, be yu mas lukluk gud se hem i wanem kaen man.

2Sipos yu yu man blong kakae tumas, i moa gud yu taetem yu blong yu no kakae bigwan.

3I nogud yu stap wantem tumas ol gudfala kakae ya we hem i givim long yu. Maet hem i wantem trikim yu nomo.

Namba seven waestok

4I nogud yu stap hadwok tumas blong kam rijman. Man we i waes i no save mekem olsem.

5Mane blong yu bambae i flae kwiktaem nomo i go, olsem pijin we i flae i go.

Namba eit waestok

6I nogud yu go kakae long haos blong man we i griri, mo i nogud tu blong yu wantem tumas ol gudfala kakae we man olsem i save givim long yu.

7Maet hem i save talem se, “Yu gohed, yu kakae olsem we yu wantem,” be hem i no minim.

8Ol kakae ya blong hem bambae i mekem yu yu traot nomo, mo bambae yu westem gudfala tok ya blong yu, blong talem tangkiu long hem.

Namba naen waestok

9I nogud yu traem givim gudfala tok long man we i no gat hed, from we hem i no save luksave, se tok ya blong yu i waes.

Namba ten waestok

10I nogud yu seftem olfala mak blong graon we i stap finis, mo i nogud yu seftem mak blong graon blong yu i go insaed long graon blong ol pikinini we papa blong olgeta i ded.

11Hae God i gat paoa, mo hem nao i stap givhan long ol pikinini olsem. Hem bambae i stanap long kot long saed blong olgeta blong tok agens long yu.

Namba leven waestok

12Yu mas lesin gud long tija blong yu oltaem, mo yu mas traehad blong lanem evri samting.

Namba twelef waestok

13Yu no fraet blong mekem samting long pikinini blong yu blong stretem hem. Sipos yu wipim as blong hem, bambae hem i no save ded from.

14Fasin ya bambae i save sevem laef blong hem.

Namba totin waestok

15Pikinini blong mi, sipos yu kam waes, bambae mi mi glad we mi glad.

16Sipos mi harem we yu stap talem ol waestok, bambae mi mi glad tumas.

Namba fotin waestok

17I nogud yu stap harem nogud from we yu no gat ol samting ya we ol man nogud oli gat. Yu mas mekem we oltaem long laef blong yu, yu tinghevi long Hae God nomo mo yu mas ona gud long hem.

18Sipos yu stap mekem olsem, bambae laef blong yu i kam nambawan.

Namba fiftin waestok

19!Pikinini blong mi, yu lesin gud! Yu yu mas waes, mo yu mas tingting gud long rod blong laef blong yu.

20I nogud yu go joen wetem ol man we oli stap dring tumas mo oli stap kakae we i bitim mak.

21Man we i stap drong oltaem mo i stap kakae tumas bambae i kam puaman. Sipos yu no wok, yu stap kakae nomo, mo yu stap slip, bambae i no longtaem yu stap werem ol rabis klos nomo.

Namba sikistin waestok

22Pikinini blong mi. Mi mi papa blong yu. Yu mas lesin long mi, from we mi mi bonem yu. Mo taem mama blong yu i kam olfala, yu mas soemaot long hem, we yu yu stap tingbaot ol samting we hem i mekem long yu.

23Trutok, mo waestok, mo save, mo fasin blong luksave ol samting, ol fo samting ya oli gud tumas. Yu mas pemaot olgeta i blong yu, mo yu no mas salemaot olgeta bakegen.

24Pikinini we fasin blong hem i stret, papa blong hem i save glad tumas from. Sipos pikinini blong yu i waes, bambae yu save glad from.

25Oltaem yu mas mekem we mi wetem mama blong yu, mitufala i save glad long ol samting we yu yu stap mekem. Mama blong yu i bonem yu, mo oltaem yu mas mekem hem i glad.

Namba seventin waestok

26Pikinini blong mi. Yu mas lesin gud long mi. Oltaem yu mas glad blong folem fasin blong mi.

27Ol woman blong rod mo ol woman we oli stap pleplei olbaot, oli olsem trap blong kilim man i ded.

28Oli stap wet long man, olsem we ol man blong stil oli stap wet blong kilim man blong stilim ol samting blong hem. Ol woman olsem oli mekem plante man oli lego ol woman blong olgeta.

Namba eitin waestok

29-30Man blong dring, we oltaem i stap traem ol niufala dring, sipos yu lukluk gud long hem, bambae yu luksave we oltaem hem i stap harem nogud, mo i stap talem se, “!A! !Mi mi krangke ya!” Oltaem hem i stap statem trabol, mo i stap toktok tumas from ol trabol blong hem. Oltaem ae blong hem i red we i red, mo i karekil tu olbaot long bodi blong hem, we sipos i no dring olsem, bambae i no gat.

31Nating we waen i red gud, mo i stap saen gud insaed long glas, mo taem yu dring, i stap godaon gud nomo long bel blong yu, be yu mas blokem fasin ya, blong i no pulum tingting blong yu.

32Sipos no, biaen, bambae yu harem olsem we posen snek i kakae yu, we bambae yu ded from.

33Bambae yu stap luk ol samting we oli narafala olgeta, we oli nogud we i nogud, mo bambae yu no save tingting gud, mo yu no save toktok gud tu.

34Bambae yu harem olsem we yu stap long bigsi, nao yu stap traot, no yu stap hang antap long mas blong sip, we bigsi i stap sakem i go olbaot.

35Nao bambae yu talem se, “!Ating ol man oli kam faetem mi! Ating oli kilim mi, be mi no save tingbaot. ?From wanem mi no save wekap gud? Naoia mi mas dring wan glas bakegen.”