Jajes Sotfala stori blong buk ya - Bislama Bible Revised 2012

Sotfala stori blong buk yaBuk ya, OL STORI BLONG OL HAEMAN BLONG OL LAEN BLONG ISREL we sotfala nem blong hem JAJES, hem i stori blong ol laen* blong Isrel,* i stat long taem we oli kam holem kantri ya Kenan,* i kam kasem klosap long taem ya we oli putumap fas king blong olgeta. Stori ya i tokbaot ol wok blong ol haeman blong olgeta, mo i soemaot we long ol taem ya, plante taem, ol laen blong Isrel oli no folem Loa blong Hae God.Long fasin blong olgeta, wok blong ol haeman ya i no blong jajem ol trabol nomo, bigfala wok blong olgeta i blong lidim olgeta long taem blong faet. Wan long olgeta ya we nem blong hem Samson, plante man oli harem stori blong hem, mo ol stori blong laef blong hem i stap long japta 13 go kasem japta 16.I gat tu gudfala samting we yumi save lanem long buk ya. Faswan i olsem. Taem olgeta oli stap obei long Hae God, hem i stap lukaot gud long olgeta, be taem oli no obei long hem, olgeta oli kasem trabol. Mo sekenwan we i bigwan moa, hem i olsem. Taem olgeta oli no obei long Hae God mo trabol i kasem olgeta, be oltaem hem i no tanem baksaed long olgeta. Taem olgeta oli tanem tingting blong olgeta from ol sin blong olgeta, mo oli luk long hem bakegen, oltaem hem i glad blong fogivim olgeta, i tekemaot ol sin blong olgeta, mo oltaem i stap rere blong givhan long olgeta bakegen.Ol stori we i stap long buk yaOl stori blong olgeta,kam kasem taem ya we Josua i ded 1.1—2.10

Ol stori blong ol haeman blong olgeta 2.11—16.31

Tu stori we i tokbaot laef blong olgeta long taem ya 17.1—21.25

Stori blong ol laen blong Dan 17.1—18.31

Stori blong ol laen blong Benjamin 19.1—21.25