Namba 10 - Bislama Bible Revised 2012

Tu trampet we oli wokem long silva

1Nao Hae God i talem long Moses se,

2“Bambae yu tekem silva we oli flatem finis long hama, yu wokem tu trampet long hem, nao oltaem yu mas yusum tufala trampet ya blong singaot olgeta man oli kam wanples. Mo sipos yufala i aot blong go long narafala ples, bambae yu yusum tufala blong givim saen long olgeta blong oli tektekemaot ol haos tapolen blong olgeta.

3Nao sipos tu man i stap blu long tufala trampet ya, we tufala i stap pulum i go longfala, hemia i min se olgeta man oli mas kam wanples long yu, long doa blong Haos Tapolen blong mi.

4Be sipos wan man nomo i stap blu long hem, hemia i min se ol lida blong olgeta laen* blong yufala bambae oli mas kam wanples long ples we yu yu stap long hem.

5-6Mo sipos tufala i stap blu sotsotwan nomo long tufala trampet ya, hemia i min se i taem blong yufala i muvaot blong go long narafala ples. Fastaem, taem we tufala i stap blu sotsotwan, hemia i min se i taem blong olgeta long kampani ya we i stap long saed i go long is bambae oli girap, oli muv blong go. Mo taem we tufala i stap blu sotsotwan bakegen, hemia i min se i taem blong olgeta long kampani ya we i stap long saed i go long saot oli girap, oli muv i go.

7Be sipos tufala i stap blu we tufala i pulum i go longfala, hemia i min se bambae olgeta man oli mas kam wanples.

8-10Tufala pikinini blong Hae Pris Eron, tufala i pris, mo tufala ya nao bambae i stap blu long tufala trampet ya.

“Bakegen, taem we bambae yufala i stap long kantri blong yufala, nao ol enemi blong yufala oli kam blong spolem yufala, mo yufala i go blong mekem faet blong blokem olgeta, bambae yufala i mas blu long tufala trampet ya blong singaot ol man oli biaen long yufala. Mi mi Hae God, mi God blong yufala, mo long ol taem olsem, mi bambae mi tingbaot yufala, mi givhan long yufala, mi tekemaot yufala long han blong ol enemi blong yufala. Nao long taem we yufala i mekem lafet, mo yufala i harem gud, tu pris i mas blu long tufala trampet ya, nao mi, bambae mi stap tingbaot yufala. Long taem blong ol lafet we Loa i talem wetem ol Lafet* blong Niumun,* we yufala i kam mekem ol sakrefaes ya we sam i blong bonem i bon evriwan, mo sam i blong soemaot we yufala i stap fren gud wetem mi, bambae tufala i mas blu long tufala trampet ya. Rul ya, we yufala i mas blu tufala trampet ya blong mekem saen olsem, bambae yufala i mas holem olwe, gogo i no save finis.”

Olgeta man oli tektekemaot ol haos tapolen blong olgeta, oli muv i go

11Nao long seken yia biaen long taem ya we olgeta oli aot long Ijip, long seken manis, long namba twanti dei blong hem, klaod ya we i stap antap long Haos Tapolen ya we oli stap kam long hem blong mit wetem Hae God i aot, i go antap.

12Klaod ya i aot long ples ya, nao olgeta oli biaen long hem, oli aot long bigfala draeples ya Sinae, oli wokbaot i go smosmol gogo klaod ya i kamdaon bakegen long draeples ya Paran.

13Hemia i fastaem we olgeta oli folem plan ya we Hae God i talemaot long Moses, se bambae oli folem taem oli wokbaot blong muv i go long narafala ples.

14Mo biaen, taem oli muv blong go long narafala ples, oltaem oli stap folem plan ya. Olgeta we oli aninit long flaeg blong kampani ya blong Juda,* oli aot fastaem mo kampani ya i faswan blong muv i go. Nason, we papa blong hem Aminadab, hem i stap lidim ol laen* blong Juda, mo hem i lida blong kampani ya.

15Mo Netanel, we papa blong hem Juara, hem i stap lidim ol laen blong Isakara,*

16mo Eliab, we papa blong hem Helon, hem i stap lidim ol laen blong Sebulun.*

17-21Nao ol laen blong Geson mo ol laen blong Merari oli tekemaot Haos Tapolen ya we olgeta oli stap go long hem blong mit wetem Hae God, mo oli karem, oli biaen long olgeta. Mo taem oli kamtru long ples we olgeta oli stap wokbaot blong go long hem, oli stanemap Haos Tapolen ya bakegen.

Nekiswan, olgeta we oli aninit long flaeg blong kampani ya blong Ruben,* oli wokbaot i go, we olgeta oli stap long ol laen blong olgeta. Elijuru, we papa blong hem Sedeuru, hem i stap lidim ol laen blong Ruben, mo hem i lida blong kampani ya. Mo Selumiel, we papa blong hem Jurisadae, hem i stap lidim ol laen blong Simeon,* mo Eliasaf, we papa blong hem Dehuel, hem i stap lidim ol laen blong Gad.*

Nao ol laen blong Kohat oli karem ol samting ya we oli tabu, oli blong Haos Tapolen ya, mo olgeta tu oli girap, oli go. Mo taem oli gotru long ples ya we olgeta oli stap wokbaot blong go long hem, oli save go insaed long Haos Tapolen we ol laen blong Geson wetem ol laen blong Merari oli stanemap finis, blong putum ol tabu samting ya oli stap gud insaed.

22Nekiswan, olgeta we oli aninit long flaeg blong kampani ya blong Efrem* oli wokbaot i go, we olgeta oli stap long ol laen blong olgeta. Elisama, we papa blong hem Amihud i stap lidim ol laen blong Efrem, mo hem i lida blong kampani ya.

23Mo Gameliel, we papa blong hem Pedajuru i stap lidim ol laen blong Manase,*

24mo Abidan we papa blong hem Gideoni i stap lidim ol laen blong Benjamin.*

25Mo laswan, olgeta we oli aninit long flaeg blong kampani ya blong Dan* oli wokbaot i go. Olgeta ya oli stap long ol laen blong olgeta, mo oli wokbaot biaen, blong gad long olgeta evriwan. Ahiesa we papa blong hem Amisadae i stap lidim ol laen blong Dan, mo hem i lida blong kampani ya.

26Mo Pagiel we papa blong hem Okran i stap lidim ol laen blong Asere,*

27mo Ahira we papa blong hem Enan i stap lidim ol laen blong Naftali.*

28Nao oltaem, taem we olgeta oli tektekemaot ol haos tapolen blong olgeta blong muv i go long narafala ples, hemia nao plan we oli stap folem blong wokbaot.

Moses i wantem blong Hobab i go wetem olgeta

29Nao Moses i talem long tawian blong hem Hobab we papa blong hem man Midian ya Jetro se, “Klosap i taem blong mifala i go long kantri ya we Hae God i talem se bambae i givim long mifala, mo hem i promes* se bambae i givim ol gudgudfala samting long mifala. I gud yu kam wetem mifala. Sipos yu kam, bambae mifala i save givim haf blong ol samting ya i go long yu.”

30Be Hobab i talem se, “No, bambae mi mi gobak long ples blong mi, mi go stap wetem ol famle blong mi.”

31Nao Moses i talem long hem se, “Plis yu no lego mifala. Yu nomo yu save ol ples long draeples ya we yumi save stap long hem, mo yu yu save lidim mifala.

32Sipos yu kam wetem mifala, olgeta gudgudfala samting ya we Hae God bambae i givim long mifala, bambae mifala i givim haf i go long yu.”

Olgeta man oli aot, oli go

33Nao taem olgeta oli aot long tabu hil ya Sinae, oli wokbaot tri dei, mo Bokis ya we i Saen blong Promes* blong Hae God, oltaem olgeta oli karem i go fastaem long olgeta, blong i soemaot ples we bambae oli stap long hem.

34Mo oltaem, taem oli stap wokbaot long dei blong muv i go long narafala ples, klaod ya blong Hae God i stap antap long olgeta.

35 Sam 68.1 Nao oltaem, taem we olgeta we oli stap karem Bokis ya oli stat wokbaot blong go, Moses i stap prea se,

“!Hae God!

!Plis yu girap,

yu ronemaot ol enemi blong yu

oli go wanwan!

!Olgeta we oli no laekem yu,

oli stap agens long yu,

plis yu mekem olgeta oli ronwe!”

36Mo taem we Bokis ya i gotru long narafala ples, hem i stap prea bakegen se,

“!Hae God!

Mifala i laen* blong Isrel,*

mo mifala i plante we plante.

!Plis yu kambak,

yu kam stap wetem mifala!”