Esikel 6 - Bislama Bible Revised 2012

Hae God i tok agensem fasin blong mekem wosip long aedol

1Hae God i Masta* blong yumi, mo hem i toktok long mi long wan vison,

2i talem se, “Man blong wol ya. Yu lukluk i go long ol hil ya blong Isrel,* yu talemaot tok blong mi agens long olgeta.

3Yu talem long ol hil ya blong oli harem tok blong mi. Ol bigbigfala hil, mo ol smosmol hil, mo ol krik, mo ol levelples long medel blong ol hil, olgeta evriwan oli mas harem. Mi bambae mi sanem ol enemi i kam wetem ol naef blong faet blong olgeta, blong oli spolem ol ples we ol laen* blong Isrel oli stap go mekem wosip long ol aedol ya long hem.

4Ol olta blong bonem sakrefaes, mo ol olta blong bonem insens,* bambae oli brebrekem olgeta evriwan, mo bambae oli kilim ol man long ples ya long fes blong ol aedol ya blong olgeta.

5Bambae ol enemi oli sakem ol dedbodi blong olgeta long fes blong ol aedol ya, mo bambae ol bun blong olgeta i stap olbaot raon long ol olta ya.

6Bambae ol enemi oli spolemgud ol taon blong olgeta, mo bambae oli smasemgud ol olta mo ol aedol blong olgeta, we bambae oli flatemgud olgeta. Mo bambae oli smasemgud ol olta ya blong olgeta we oli stap bonem insens long hem, mo olgeta samting blong olgeta bambae oli lus.

7Bambae ol enemi oli kilim olgeta oli ded long evri ples, nao olgeta we oli stap laef yet bambae oli savegud we mi mi Hae God.

8“Be sam long olgeta we oli stap laef, bambae mi ronemaot olgeta oli go stap wanwan olbaot long ol narafala kantri,

9we bambae oli wok slef* long ol ples ya. Nao bambae oli tingbaot mi, mo bambae oli save we mi mi panisim olgeta. Mo bambae mi mekem olgeta oli sem gud, from we oli no bilif long mi, oli gowe long mi, mo oli wantem ol narafala god ya moa, i winim we oli wantem mi. Mo bambae oli luksave we laef blong olgeta i nogud we i nogud from we oli stap mekem ol rabis fasin we i nogud olgeta.

10Nao bambae oli savegud we mi mi Hae God, mo ol tok ya we mi talem blong wonem olgeta, se bigfala trabol bambae i kasem olgeta, mi no jes talem nomo, bambae mi mekem i kamtru.”

11Mo Hae God i talem long mi se, “Bambae ol laen blong Isrel* oli ded long faet, mo long hanggri, mo long rabis sik. Mo naoia yu yu mas harem nogud tumas from. Yu mas sore we yu krae we yu krae. Yu mas talem se, ‘!Sore tumas long yufala! !Sore tumas from we yufala i mekem plante samting nogud!’

12I tru tumas. Olgeta evriwan bambae oli mas ded. Olgeta we oli stap longwe bambae oli ded long rabis sik, mo olgeta we oli stap klosap bambae oli ded long faet. Mo olgeta we oli laef yet bambae oli hanggri gogo oli ded from. Bambae oli haremsave paoa blong kros blong mi.

13Bambae ol dedbodi blong olgeta oli stap olbaot long ol ples we ol aedol wetem ol olta blong olgeta oli stap long hem. Antap long ol hil, mo aninit long ol bigbigfala tri, mo aninit long ol oktri,* mo long olgeta ples we oli stap mekem sakrefaes long hem, be ol dedbodi ya bambae oli stap olbaot long hem. Nao bambae olgeta evriwan oli savegud we mi mi Hae God.

14Bambae mi leftemap han blong mi, mi spolem kantri blong olgeta, we mi spolemgud, we bambae i no gat man i stap long hem. Bambae mi mekem i kam rabis olgeta, i stat long draeples long saot i go kasem taon ya Riblaha long not, i kavremap olgeta ples we ol laen blong Isrel oli stap long hem. Nao bambae olgeta evriwan oli savegud we mi mi Hae God.”