Amos 8 - Bislama Bible Revised 2012

Wan basket frut we profet i luk long wan vison

1Nao Profet Amos i talem se, “Mi mi luk wan narafala vison* bakegen we Hae God we i Masta* blong yumi i soemaot long mi. Long vison ya, mi luk wan bigfala basket we i fulap long frut,

2mo Hae God i askem long mi se, ‘Amos. ?Yu save samting ya?’ Mo mi talem se, ‘Yes, wan basket frut ya.’ Nao hem i talem long mi se, ‘Yes. Mo hemia i min se nating we ol man Isrel* ya oli man blong mi, be naoia i taem blong olgeta blong oli lus. Bambae mi mi no save jenisim tingting blong mi bakegen, mi mas panisim olgeta, olsem we mi talem finis.

3Long taem ya, ol woman ya we oltaem oli stap singsing blong mekem king i glad, oli no moa save singsing, bambae oli stap krae nomo. Nao ples ya blong yufala bambae i kam fulap long ol dedbodi blong yufala, mo bambae yufala i jes sakem olgeta oli go afsaed long taon nomo, we bambae yufala i no save mekenoes nating.’ ”

Panis we ol man Isrel bambae oli kasem

4Nao Profet Amos i talem se, “Ol bisnesman. !Yufala i lesin gud long tok blong mi! Fasin blong yufala, oltaem yufala i stap mekem i strong tumas long ol puaman, mo yufala i stap traem blong spolem olgeta we oli no gat paoa.

5Oltaem yufala i stap taltalem long yufala se, ‘?Ol tabu dei ya bambae i finis wetaem, blong yumi save go salem ol wit* blong yumi? !Sabat dei* ya i longfala tumas! !I gud i finis kwik, blong yumi save go salem olting blong yumi bakegen! !Ol giaman lita mo ol giaman skel ya blong yumi i stap finis! !Bambae yumi giaman gud long olgeta! !Yumi save leftemap praes blong ol samting i go antap moa, nao bambae yumi save stil gud long olgeta!

6!Ol wit ya blong yumi we i nogud finis be bambae yumi leftemap praes blong olgeta! Ol puaman ya oli trabol gud. Olgeta oli no save pem ol kaon blong olgeta, mo oli no gat mane nating blong pem sandel blong olgeta, be bambae yumi givim sandel long olgeta, mo yumi pem ol kaon blong olgeta, blong fosem olgeta blong oli kam slef* blong yumi.’

7“Ol man Isrel.* Hae God i God blong yumi, mo hem i mekem wan strong promes finis long yufala se, ‘Ol rabis fasin ya blong yufala, mi bambae mi no save fogetem olgeta samtaem.

8Olbaot long kantri ya, bambae i gat etkwek, nao bambae yufala evriwan i kasem plante trabol from samting ya. Long evri ples, graon bambae i kam antap, i godaon, i kam antap, i godaon, olsem we long taem blong taedelwef, solwota i stap kam antap, i godaon.

9Mi mi Hae God, mi Masta* blong yufala, mo mi talem stret long yufala, se i gat taem i stap kam we bambae mi mi mekem san i godaon nomo long medel dei, nao olgeta ples long wol ya bambae i kam tudak.

10Ol dei blong lafet blong yufala, bambae mi mekem i kam dei blong berem dedman. Mo ol sing ya blong mekem yufala i glad, bambae mi jenisim olgeta oli kam sing blong krae long dedman. Bambae mi mekem we yufala i pulum resa long hed blong yufala, mo yufala i stap werem ol rabis klos nomo, blong soemaot we yufala i stap harem nogud. Bambae mi mekem we yufala i kam olsem man wetem woman blong hem, we tufala i stap harem nogud tumas from we pikinini blong tufala i ded, we hem i wan pikinini nomo we tufala i gat. !Dei ya bambae i nogud we i nogud! Mi mi Hae God, mo hemia tok blong mi.

11“ ‘I gat taem i stap kam we bambae mi mekem we yufala i gat hadtaem blong kasem kakae. Bambae yufala i hanggri tumas, mo yufala i tosta tumas, be i no from wota. Long taem ya, bambae yufala i wantem tumas blong harem tok blong mi, olsem we man we i hanggri tumas i wantem kakae, mo man we i tosta tumas i wantem dring.

12Long taem ya, bambae yufala i stap go olbaot blong harem tok blong mi. Olgeta long not bambae oli wokbaot i go kasem ol ples long saot, mo olgeta long is bambae oli wokbaot i go kasem ol ples long wes, be neva bambae oli save harem.

13Long taem ya, ol boe mo gel we oli strong gud, be bambae oli ded nomo long tosta.

14Yufala we i stap talem nem blong rabis aedol ya blong ol man Sameria,* mo yufala we i stap talem nem blong god blong ol man Dan, mo yufala we i stap talem nem blong god blong ol man Bereseba, blong mekem tok blong yufala i strong, long taem ya, bambae yufala evriwan i ded we nem blong yufala bambae i lus olgeta. Mi mi Hae God, mo hemia tok blong mi.’ ”