Sam 98 - Bislama Bible Revised 2012

Hae God, hem i King blong wol(Tok i go long ol man.)

1Yumi wokem wan niufala sing,

yumi singsing long hem blong presem Hae God,

from we hem i stap mekem ol bigbigfala wok.

Paoa blong hem i strong mo i tabu,

mo long paoa ya blong hem,

hem i win long faet, i sevem yumi.

2Hae God i talemaot finis we hem i win.

Hem i soemaot long ol man blong ol narafala kantri,

we hem i gat paoa blong sevem yumi.

3Hem i stap holem ol promes blong hem

we i mekem long yumi ol laen* blong Isrel,*

mo oltaem hem i stap lavem yumi.

Nao olgeta man long evri ples oli

luk we God blong yumi hem i win.

4-6!Hae God i King blong yumi!

!Olgeta man long wol, yumi glad!

!Yumi sing long hem!

!Yumi presem hem long ol singsing!

!Yumi glad, we yumi singsingaot from!

!Yumi plei long gita!

!Yumi sing, yumi presem hem!

!Yumi blu long trampet mo long pupu!

!Yumi glad, yumi singsing long hem!

7Solwota.

!Yu wetem evri samting we i stap long yu,

yufala i mekem bigfala noes!

Graon.

!Yu wetem olgeta samting we i stap long yu,

yufala i singsing!

8-9!Ol reva, yufala i klaphan!

!Ol hil, yufala i glad!

!Hae God i kam blong rulum wol!

Yufala i kam long fes blong hem,

yufala i joen blong singsing.

Bambae hem i jajem olgeta man long wol

long stret fasin nomo.