Esra 7 - Bislama Bible Revised 2012

Pris ya Esra i kam long Jerusalem

1Nao plante yia i pas, mo long taem ya we King Ataksekses i rul long Pesia, i gat wan pris i stap we nem blong hem Esra. Hem i savegud ol olfala bubu blong hem, gogo kasem hae pris* ya Eron, we hem i fas hae pris, mo laen blong hem i olsem. Esra, papa blong hem Seraea, mo Seraea, papa blong hem Asaria, mo Asaria papa blong hem Hilkia,

2mo Hilkia, papa blong hem Salum, mo Salum, papa blong hem Jadok, mo Jadok, papa blong hem Ahitub,

3mo Ahitub, papa blong hem Amaria, mo Amaria, papa blong hem Asaria, mo Asaria, papa blong hem Meraeot,

4mo Meraeot, papa blong hem Serahia, mo Serahia, papa blong hem Usi, mo Usi, papa blong hem Buki,

5mo Buki, papa blong hem Abisua, mo Abisua, papa blong hem Finehas, mo Finehas, papa blong hem Eleasara, mo Eleasara, papa blong hem Eron ya we i fas hae pris, bifo olgeta.

6-7Pris ya Esra, hem i wan man we i skul gud, mo i savegud Loa* blong Hae God. Hae God ya, hem i God blong yumi ol laen* blong Isrel,* mo hem i bin givim Loa ya long Moses bifo. Nao long namba seven yia blong King Ataksekses, pris ya i mekemrere wan bigfala grup blong ol laen blong Isrel long Babilonia, blong i lidim olgeta oli kambak long Jerusalem.* Mo from we Hae God i stap blesem hem, olgeta samting we hem i askem long king, be king i givim long hem. Long grup ya, i gat ol pris, wetem ol Livaet* we sam oli man blong mekem kwaea long haos* blong Hae God, mo sam oli man blong gad long haos ya, mo sam oli man blong wok long haos ya.

8-9Olgeta ya oli aot long Babilonia long fas manis, long fas dei blong hem, mo Hae God i stap givhan gud long olgeta long rod, nao oli kamtru long Jerusalem long namba faef manis, long fas dei blong hem.

10Pris ya Esra i laekem tumas ol tok blong Buk blong Loa blong Hae God, nao oltaem hem i stap stadi long hem, mo i stap mekem ol samting we buk ya i talem. Mo hem i stap tijim ol laen blong Isrel long ol loa mo ol rul we i stap long buk ya.

Leta we King Ataksekses i givim long pris ya Esra

11Pris* ya Esra, oltaem hem i stap stadi gud long ol loa mo long ol tok we Hae God i bin givim long ol laen* blong Isrel,* mo taem hem i stap yet long Babilonia, King Ataksekses i givim wan leta long hem. Leta ya i talem se,

12“Mi, King Ataksekses we mi hae king blong Pesia, mi givim tok ya blong mi i go long yu Esra, we yu yu pris, mo oltaem yu stap stadi gud long Buk blong Loa* blong God blong heven.

13“Naoia, mi mi talemaot se sipos eni man we i laen blong Isrel i wantem aot long eni ples long kingdom blong mi blong go wetem yu, hem i save go. Sipos hem i pris, no i Livaet,* no i wan man olbaot nomo, be bambae hem i fri blong gobak long Jerusalem.*

14God blong yu i putum Buk blong Loa blong hem long han blong yu, mo mi wetem ol seven advaesa blong mi, mifala i sanem yu blong yu go long Jerusalem, mo long ol narafala ples long Juda,* blong yu faenemaot se ol man oli stap obei gud long Loa, no nogat.

15Bambae yu tekem ol presen blong mi mo blong ol advaesa ya blong mi, yu karem olgeta i go. Ol presen ya, i gat gol mo silva, we mifala i wantem givim long God blong yufala, we haos* blong hem i stap long Jerusalem.

16Mo olgeta mane we yufala i kasem long olgeta ples long provins ya Babilon, bambae yufala i putum wetem ol presen we yufala wetem ol pris blong yufala, yufala i givim se i blong haos ya blong God blong yufala, mo yufala i karem i go.

17“Mane ya, yu mas yusumgud blong pem ol bul, mo ol man sipsip, mo ol smol man sipsip, mo ol kakae mo waen we i blong go wetem ol anamol ya, blong yufala i mekem ol sakrefaes long Olta blong haos blong God.

18Mo sipos i gat ol silva mo gol we i stap yet, bambae yu wetem ol man ples blong yu, yufala i save yusum blong pem ol samting we yufala i luk se i gud mo i stret long tingting blong God blong yufala.

19Olgeta samting ya blong mekem wosip we ol man oli bin givim long yu blong yu yusum long haos ya, bambae yu tekem olgeta, yu givim i go long God.

20Mo sipos yu yu nidim sam samting bakegen blong haos ya, bambae yu save go tekem sam mane long mane blong gavman blong pem ol samting ya long hem.

21“Mo bakegen, mi mi talem long yufala olgeta haeman blong mi we yufala i stap lukaot long ol mane long provins ya Narasaed Yufretes Reva long Wes, se sipos pris ya Esra we i stap stadi gud long Buk blong Loa blong God blong heven, hem i kam askem sam samting long yufala, bambae yufala i mas givim long hem kwiktaem nomo.

22Mak blong ol samting we yufala i save givim long hem i olsem. Sipos hem i askem silva, yufala i save givim, go kasem tri tan fo handred kilo, mo sipos hem i askem wit,* yufala i save givim, go kasem ten tan. Sipos hem i askem waen, yufala i save givim, go kasem tu taosen lita, mo sipos hem i wantem olifoel,* yufala i save givim, go kasem tu taosen lita. Mo sol, yufala i save givim olsem we hem i wantem.

23Yufala i mas lukaot gud blong givim evri samting we God blong heven i wantem blong ol man blong hem oli yusum long haos blong hem. Yufala i mas mekem olsem, blong bambae hem i no kros long mi, no long ol pikinini blong mi we bambae oli rul biaen long mi.

24Mo ol pris ya wetem ol Livaet, we sam oli man blong mekem kwaea, mo sam oli man blong gad long haos ya, mo sam oli man blong wok long haos ya, mo ol narafala man ya tu we oli stap givhan long wok blong haos ya, mi mi blokem yufala se bambae yufala i no mas tekem takis long olgeta.

25“Mo yu, Esra, yu yu gat waes we God ya blong yu i givim long yu. Long waes ya blong yu, bambae yu mas putumap ol jif mo ol jaj, blong oli lukaot long olgeta man we oli stap long provins ya Narasaed Yufretes Reva long Wes, we oli stap folem Loa blong God blong yu. Mo ol man we oli no save Loa ya, yu yu mas tijim olgeta long hem.

26Mo sipos man i no obei long ol loa blong God blong yu, mo long ol loa blong kingdom ya blong mi, bambae hem i mas kasem panis kwiktaem nomo. Bambae ol man blong mi oli mas kilim hem i ded, no oli mas sanem hem i go wok slef* long narafala kantri, no oli mas tekemaot olting blong hem, no oli mas putum hem long kalabus.”

27Nao pris ya i talem se, “Olgeta. Hae God i God blong ol bubu blong yumi bifo. I gud yumi presem hem from we hem i givim gudfala tingting ya long king, nao king i ona long haos ya blong hem long Jerusalem.

28Hae God i givhan long mi long gladhat blong hem, nao king ya wetem ol advaesa blong hem, mo ol haeman blong hem we oli gat paoa, olgeta oli stap glad long mi. Hae God i God blong mi, mo hem i stap leftemap tingting blong mi, nao mi mi save tekem plante man we oli hed blong ol naranarafala laen blong yumi, oli kambak wetem mi.”