Jona Sotfala stori blong buk ya - Bislama Bible Revised 2012

Sotfala stori blong buk ya BUK BLONG PROFET JONA, hem i no olsem ol narafala buk long Baebol, we ol profet oli raetem. Buk ya i tokbaot Profet Jona, we hem i no wantem obei long tok blong Hae God. Hae God i talem long hem blong hem i go long bigfala taon ya Nineve, we i kaptel blong bigfala kingdom ya blong king blong Asiria. Be long taem ya, ol man Asiria oli enemi blong ol laen* blong Isrel,* mo oltaem oli wantem kilim olgeta oli ded. Nao from samting ya Jona i no wantem nating blong go talemaot tok blong Hae God long olgeta. Hem i savegud se sipos hem i go, bambae ol man Nineve oli tanem tingting blong olgeta from ol fasin nogud blong olgeta, nao bambae Hae God i no save spolem taon ya blong olgeta blong panisim olgeta, olsem we hem i talem. Nao Hae God i letem hem i kasem plante trabol, gogo hem i obei long hem. Nao biaen, taem we Jona i luk we ol tok blong hem i no kamtru, we hem i talem se bambae Hae God i spolem ol man Nineve, hem i harem nogud, i kros we i kros.Buk ya i soemaot we Hae God i King, mo hem i stap holem evri samting we hem i mekem, i stap long han blong hem nomo. Be antap long ol samting ya, i soemaot we hem i lavem ol man mo i gat sore long olgeta. Nating we ol man ya oli enemi blong ol man blong hem, be hem i no glad blong panisim olgeta, mo blong kilim olgeta oli ded. Hem i glad blong fogivim olgeta mo blong sevem olgeta.Ol haf blong buk yaHae God i singaot Jona, blong i mekem wok blong hem,be Jona i no obei long hem 1.1-17

Jona i tanem tingting blong hem, mo Hae God i sevem hem 2.1-10

Jona i talemaot tok blong Hae Godagens long ol man Nineve 3.1-10

Hae God i sore long ol man Nineve 4.1-11