2 Kronikel 10 - Bislama Bible Revised 2012

Ol laen blong Isrel long not oli girap, oli agens long King Rehoboam(1 King 12.1-20)

1Nao King Rehoboam i go long Sekem, from we ol laen* blong Isrel* long not oli kam wanples long ples ya blong putumap hem i kam king blong olgeta.

2Long taem ya, Jeroboam we papa blong hem Nebat, hem i stap yet long Ijip. Bifo, hem i ronwe i go long ples ya from we i fraet long King Solomon. Be taem hem i harem nius ya blong King Rehoboam, hem i kambak long Isrel bakegen.

3Nao olgeta ya long not oli singaot hem i kam wetem olgeta, mo oli go luk King Rehoboam, oli talem long hem se,

4“Papa blong yu King Solomon i mekem i strong tumas long mifala, mo i mekem mifala i hadwok tumas. Sipos yu yu mekem ol samting i kam moa isi long mifala, mo yu mekem mifala i no moa hadwok olsem, bambae mifala i stap aninit long han blong yu blong obei long yu long olgeta samting.”

5Be hem i talem long olgeta se, “Bambae yufala i kambak bakegen biaen long tri dei, nao bambae mi givim ansa long yufala.” Nao olgeta oli aot bakegen.

6Nao king i go luk ol olfala we oli advaesa blong papa blong hem bifo, mo i talem se, “!Olgeta! ?Yufala i gat sam gudfala tingting we mi save givim long olgeta ya?”

7Mo oli talem se, “King, sipos yu mekem i gud long ol man ya, mo yu givim ansa long olgeta we olgeta i glad long hem, oltaem nomo, bambae oli save ona long yu, mo oli save wok blong yu long gladhat blong olgeta.”

8Be hem i sakem tingting blong ol olfala ya, nao i girap, i go luk ol yangfala we oli gruap wetem hem, we oli advaesa blong hem.

9Mo hem i talem long olgeta se, “!Olgeta! ?Yufala i gat sam gudfala tingting we yufala i save givim long mi blong mi folem? ?Bambae mi save talem olsem wanem long olgeta ya we oli wantem blong mi mekem wok i kam moa isi long olgeta?”

10Mo olgeta oli talem se, “King, tok we bambae yu talem long olgeta i olsem. Yu talem se, ‘Papa blong mi i wan strong man, be smol fingga ya blong mi i strong moa, i winim hem.

11Hem i mekem yufala i hadwok, be mi bambae mi mekem yufala i hadwok moa. Hem i wipim yufala long wip blong man, be mi bambae mi wipim yufala long wip blong hos.’ ”

12Nao tri dei i pas, Jeroboam wetem ol man ya oli kambak blong luk king ya bakegen, olsem we hem i talem long olgeta.

13Be king i no moa tingbaot tok ya blong ol olfala, hem i girap, i sakem strong tok ya long olgeta

14we ol yangfala ya oli bin givim long hem. Hem i talem se, “Papa blong mi i mekem yufala i hadwok, be mi bambae mi mekem yufala i hadwok moa. Hem i wipim yufala long wip blong man, be mi bambae mi wipim yufala long wip blong hos.”

15King ya i no wantem lesin nating long tok blong olgeta, from we Hae God i wantem mekem ol tok ya blong hem i kamtru we hem i givim fastaem long Profet Ahia blong Silo, blong i talemaot long Jeroboam.

16 2 Saml 20.1 Nao taem ol man ya oli luk we king i no lesin long olgeta, oli stap singaot bigwan se,

“?Hu i save Deved ya?

!Livim ol famle blong hem i stap!

!Oli no mekem wan gud samting nating long yumi!

!Yumi ol laen blong Isrel ya!

!Yumi gohom!

!Livim Rehoboam ya i stap!

!Hem i save lukaot long ol man ples blong hem!”

Nao olgeta oli girap, oli agens long King Rehoboam,

17oli livim hem i stap, i king blong ol man ya nomo we oli stap long distrik ya Juda.*

18Nao king i singaot Adoniram we i bos blong ol man we hem i stap fosem olgeta blong wok, mo i sanem hem i go luk olgeta ya, be olgeta oli girap, oli stonem hem gogo i ded. Nao from samting ya, king ya i hareap, i jam long kat blong hem, i ronwe, i gobak long Jerusalem.*

19Nao i stat long taem ya, ol man blong not oli stap agens long ol king ya we oli stap kamaot biaen long King Deved, mo fasin ya i stap yet, kam kasem tede.