Sam 25 - Bislama Bible Revised 2012

Prea we man i mekem blong Hae God i lidim hem, i lukaot gud long hem(Sing ya, Deved i wokem.)(Tok i go long Hae God.)

1-2Hae God, yu yu God blong mi.

Mi mi stap prea long yu nomo,

mo mi trastem yu oltaem.

Plis yu no letem ol enemi blong mi

oli winim mi, oli stap laf long mi.

Yu no letem olgeta

oli mekem mi mi sem.

3Ol man we oli stap trastem yu

oli no save sem,

be olgeta we oli kwik blong girap agens long yu,

olgeta ya nao bambae oli sem.

4Hae God.

Plis yu tijim mi long ol fasin blong yu,

yu mekem mi mi savegud ol rod blong yu.

5Yu tijim mi,

blong mi save folem trutok blong yu

long olgeta laef blong mi,

from we yu nomo yu God blong mi

we yu stap sevem mi.

Oltaem mi mi trastem yu.

6Hae God,

plis yu no lego fasin ya blong yu

we yu yu kaen tumas,

mo oltaem yu stap lavem man tumas.

Yu yu stap soemaot fasin ya,

i stat longtaem finis, kam kasem tede.

7Plis yu fogivim mi,

yu tekemaot ol sin blong mi

mo ol rabis fasin we mi stap mekem

taem mi yang yet.

Hae God, yu yu gud tumas,

mo oltaem yu stap lavem man,

plis yu tingbaot mi oltaem.

(Tok i go long ol man.)

8Nao from we fasin blong Hae God i stret,

mo hem i stap mekem i gud long man,

hem i stap tijim ol man nogud

blong oli folem rod blong hem.

9Ol man we tingting blong olgeta i stap daon,

hem i stap lidim olgeta

long ol rod we i stret,

mo i stap tijim olgeta

long ol samting we hem nomo i wantem.

10Oltaem hem i lavem man tumas,

mo tingting blong hem i stap strong long man.

Long fasin ya nao,

hem i stap lidim olgeta

we oli stap holem promes* ya

we hem i mekem wetem ol bubu blong yumi bifo,

mo oli stap folem ol tok blong hem.

(Tok i go long Hae God.)

11Hae God.

Ol sin blong mi oli plante tumas,

plis yu fogivim mi,

yu tekemaot ol sin ya blong mi,

from we yu yu God blong fogivim man.

12Man we i stap obei long yu,

yu bambae yu tijim hem

long rod we i gud blong hem i folem.

13Oltaem bambae hem i gat plante samting,

mo ol pikinini blong hem

bambae oli holem graon blong hem

i blong olgeta.

14Yu yu fren blong olgeta

we oli stap obei long yu,

mo yu stap mekem olgeta

oli savegud promes ya

we yu mekem wetem ol bubu blong mifala bifo.

15Hae God.

Oltaem nomo mi stap luk long yu,

mo yu yu stap sevem mi,

yu tekemaot mi long ol trabol.

16Plis yu luk long mi,

yu sore long mi,

from we mi mi no gat fren blong mi,

mo mi no moa strong.

17Plis yu tekemaot ol samting

we i stap mekem mi mi wari tumas,

mo yu sevem mi

long ol trabol blong mi.

18Yu tingbaot mi.

Mi mi trabol tumas, mi harem nogud,

plis yu fogivim mi,

yu tekemaot ol sin blong mi.

19!Yu luk!

Ol enemi blong mi oli plante

we i plante,

mo oli no laekem mi nating

oli agens long mi.

20Mi mi kam blong haed long yu.

Plis yu blokem mi, yu sevem mi,

yu no letem ol enemi blong mi

oli mekem mi mi sem.

21Mi mi wantem

we stret fasin ya we mi stap mekem,

mo fasin ya we mi stap tok tru oltaem,

bambae i holem mi mi stap gud,

from we mi mi trastem yu.

22God,

plis yu sevem mifala

ol laen* blong Isrel,*

yu tekemaot mifala

long olgeta trabol blong mifala.