1Nao ol laen* blong Isrel* oli talem se, “Olgeta. I moa gud yumi gobak long Hae God. Hem nao i tekem sik ya i kam spolem yumi, be hem bambae i save tekemaot long yumi, blong yumi kam gud bakegen. Hem nomo i mekem yumi gat ol soa ya, be bambae hem i save mekem ol soa ya i kam gud bakegen.
2Sipos yumi mekem olsem, long tutri dei, hem bambae i tekembak yumi, nao bambae yumi stap wetem hem oltaem.
3Naoia yumi mas traehad blong save hem. Bambae hem i mas kamtru long yumi, olsem we san i stap kamtru long eli moning. Bambae hem i kam mekem laef blong yumi i kam gud bakegen, stret olsem we ren i kam long taem blong planem garen, blong mekem graon i wetwet gud.”
4Be Profet Hosea i talemaot we Hae God i talem se, “Ol man Isrel, mo ol man Juda.* ?Bambae mi mekem olsem wanem long yufala? Fasin blong yufala blong lavem mi i blong wan dei nomo, i stap lus olsem smok blong hil long eli moning. Hem i olsem wota blong naet, we taem san i girap, be kwiktaem nomo i mekem i kam drae.
5From samting ya, mi mi bin sanem ol profet blong mi i kam, blong oli talemaot tok blong mi, se bambae mi jajem yufala, mi panisim yufala. Fasin we mi wantem tumas blong yufala i mekem, hem i stap long klia ples nomo.
6Mat 9.13; 12.7Mi mi no wantem fasin ya we yufala i stap kilim anamol blong mekem sakrefaes long mi, mi wantem we oltaem, yufala i stap lavem mi. Mi wantem we yufala i save mi long laef blong yufala. Fasin ya i gud tumas long mi, i winim we yufala i stap bonem sakrefaes blong givim presen i kam long mi.
7“Taem ol bubu blong yufala bifo oli kamtru long kantri ya long taon ya Adam, oli brekem promes* blong mi we mi mi mekem wetem olgeta.
8Mo naoia taon ya Gilead i fulap gud long ol man nogud, mo ol man blong kilim man i ded.
9Ol pris blong olgeta oli olsem ol man blong stil, we oltaem oli stap haed long saed blong rod blong kilim man. Oli stap kilim man i ded long rod we i pas i go long tabu ples ya Sekem. Oli stap mekem ol rabis fasin ya we oli no gat sem nating.
10Mi mi luk finis we i gat wan fasin we i nogud we i nogud, we ol man Isrel oli stap mekem. Olgeta ya oli man blong mi, be oli lego mi, mo oli stap mekem wosip long ol narafala god, nao oli kam doti long fes blong mi.
11“Ol man Juda. Yufala tu, mi mi makem taem blong yufala finis blong panisim yufala, from ol samting nogud ya we yufala i stap mekem.
Who We AreWhat We EelieveWhat We Do
2025 by iamachristian.org,Inc All rights reserved.
