Nehemaea 7 - Bislama Bible Revised 2012

1“Nao taem mifala i finisim stonwol ya, mo mifala i hangem ol doa* blong hem finis, ol pris* oli putum ol Livaet* long wok blong olgeta bakegen. Hemia ol man blong gad long haos* blong God, mo ol man blong mekem kwaea long haos ya mo ol narafala Livaet.

2Mo mi mi putumap tu man, blong tufala i lukaot long taon ya Jerusalem.* Tufala ya, Hanani we i brata blong mi, mo Hanania we i komanda blong ol soldia we oli stap long strong ples blong haed long ples ya. Hanania i wan man we fasin blong hem i stret olgeta, mo hem i stap tinghevi long God, i stap obei gud long hem, we i no gat narafala man we i olsem hem.

3Nao mi talem long tufala se, ‘Yutufala i mas talem long ol gad, se oli no mas openem ol doa blong taon ya long eli moning, oli mas wet gogo san i kam antap gud fastaem. Mo long sapa, taem san i no godaon yet, oli mas lokemgud ol doa ya bakegen, nao biaen oli save go spel. Mo yutufala i mas jusumaot sam narafala man blong taon ya bakegen, we sam long olgeta bambae oli gad long ol spesel ples long taon ya, mo sam bambae oli gad long ol ples klosap long ol haos blong olgeta.’ ”

Ol man we oli biaen long Serubabel olgeta oli aot long Babilonia oli kambak long Juda(Esra 2.1-70)

4Nao Nehemaea i gohed, i talem se, “Jerusalem* i wan bigfala taon, be long taem ya we i no gat plante man i stap long hem, mo oli no wokem plante haos long hem yet,

5God i givim wan tingting long mi, blong mi singaot ol lida blong taon ya wetem ol haeman blong hem mo ol narafala man oli kam wanples, blong mi jekemap ol famle blong olgeta long ol buk we nem blong ol stamba blong ol famle i stap long hem. Nao mi faenem buk ya we nem blong olgeta we oli aot long Babilonia oli kambak fastaem i stap long hem, mo ripot we i stap long buk ya i olsem, i talem se,

6‘Nao long taem ya, i gat plante man we oli stap wok slef* long Babilonia oli aot, oli kambak long Juda*, mo oli kam stap long Jerusalem mo long ol narafala ples long Juda. Olgeta ya oli kambak, oli go stap long ol stret vilej blong olgeta bakegen. Olgeta ya oli go stap long Babilonia, stat long taem ya we King Nebukadnesa bifo i holem ol olfala blong olgeta, i tekem olgeta oli go stap wok slef long ples ya.

7Ol man we oli lidim olgeta ya oli kambak, nem blong olgeta, i olsem. I gat Serubabel, mo Josua, mo Asaria, mo Rahamia, mo Nahamani, mo Modekae, mo Bilsan, mo Mespirit, mo Bigvae, mo Nehum, mo Bahanaha.

“ ‘Mo ol laen* blong Isrel*, we oli aot long Babilonia oli kambak, lis blong olgeta wetem namba blong olgeta i olsem.

8Long laen blong Paros, i gat tu taosen wan handred seventi tu man.

9Mo long laen blong Sefatia, i gat tri handred seventi tu man.

10Mo long laen blong Araha, i gat sikis handred fifti tu man.

11Mo long laen blong Jesua mo long laen blong Joab, we tufala i kamaot biaen long Pahatmoab, i gat tu taosen eit handred eitin man.

12Mo long laen blong Elam, i gat wan taosen tu handred fifti fo man.

13Mo long laen blong Satu, i gat eit handred foti faef man.

14Mo long laen blong Sakae, i gat seven handred sikisti man.

15Mo long laen blong Binui, i gat sikis handred foti eit man.

16Mo long laen blong Bebae, i gat sikis handred twanti eit man.

17Mo long laen blong Asgad, i gat tu taosen tri handred twanti tu man.

18Mo long laen blong Adonikam, i gat sikis handred sikisti seven man.

19Mo long laen blong Bigvae, i gat tu taosen sikisti seven man.

20Mo long laen blong Adin, i gat sikis handred fifti faef man.

21Mo long laen blong Atere, we narafala nem blong hem Hesekia, i gat naenti eit man.

22Mo long laen blong Hasum, i gat tri handred twanti eit man.

23Mo long laen blong Bejae, i gat tri handred twanti fo man.

24Mo long laen blong Harif, i gat wan handred twelef man.

25Mo long laen blong Gibeon, i gat naenti faef man.

26“ ‘Mo i gat ol narafala man tu oli kambak we oli stap makem olgeta long vilej we ol olfala blong olgeta bifo oli stap long hem. Namba blong olgeta ya i olsem. Ol man Betlehem wetem ol man Netofa, i gat wan handred eiti eit man.

27Mo ol man Anatot, i gat wan handred twanti eit man.

28Mo ol man Betasmavet, i gat foti tu man.

29Mo ol man Kiriatsearim, mo ol man Kefira, mo ol man Beherot, i gat seven handred foti tri man.

30Mo ol man Rama, mo ol man Geba, i gat sikis handred twanti wan man.

31Mo ol man Mikmas, i gat wan handred twanti tu man.

32Mo ol man Betel, mo ol man Eae, i gat wan handred twanti tri man.

33Mo ol man blong narafala Neboho, i gat fifti tu man.

34Mo ol man blong narafala Elam, i gat wan taosen tu handred fifti fo man.

35Mo ol man Harim, i gat tri handred twanti man.

36Mo ol man Jeriko, i gat tri handred foti faef man.

37Mo ol man Lod, mo ol man Hadid, mo ol man Ono, i gat seven handred twanti wan man.

38Mo ol man Senaha, i gat tri taosen naen handred toti man.

39“ ‘Mo ol pris* we oli aot long Babilonia oli kambak, lis blong olgeta wetem namba blong olgeta i olsem. Long laen blong pris ya Jedaea we i kamaot biaen long pris ya Jesua, i gat naen handred seventi tri pris.

40Mo long laen blong pris ya Hime, i gat wan taosen fifti tu pris.

41Mo long laen blong pris ya Pasuru, i gat wan taosen tu handred foti seven pris.

42Mo long laen blong pris ya Harim, i gat wan taosen seventin pris.

43“ ‘Mo ol Livaet* we oli aot long Babilonia oli kambak, lis blong olgeta wetem namba blong olgeta i olsem. Long laen blong Jesua, mo long laen blong Kadmiel, we tufala ya i kamaot biaen long Hodavia, i gat seventi fo man.

44“ ‘Mo i gat ol man blong mekem kwaea long haos* blong God. Olgeta ya oli laen blong Asaf, mo namba blong olgeta i gat wan handred foti eit man.

45“ ‘Mo i gat ol man blong gad long haos blong God. Olgeta ya oli laen blong Salum, mo laen blong Atere, mo laen blong Talmon, mo laen blong Akub, mo laen blong Hatita, mo laen blong Sobae, mo namba blong olgeta ya evriwan i gat wan handred toti eit man.

46“ ‘Mo olgeta we oli kamaot biaen long ol man blong wok long haos blong God bifo, we oli aot long Babilonia oli kambak, lis blong olgeta i olsem. I gat ol laen blong Jiha, mo ol laen blong Hasufa, mo ol laen blong Tabaot,

47mo ol laen blong Keros, mo ol laen blong Sia, mo ol laen blong Padon,

48mo ol laen blong Lebana, mo ol laen blong Hagaba, mo ol laen blong Salmae,

49mo ol laen blong Hanan, mo ol laen blong Gidel, mo ol laen blong Gaha,

50mo ol laen blong Rehaea, mo ol laen blong Resin, mo ol laen blong Nekoda,

51mo ol laen blong Gasam, mo ol laen blong Usaha, mo ol laen blong Pasea,

52mo ol laen blong Besae, mo ol laen blong Mehunim, mo ol laen blong Nefusesim,

53mo ol laen blong Bakbuk, mo ol laen blong Hakufa, mo ol laen blong Hahuru,

54mo ol laen blong Baslit, mo ol laen blong Mehida, mo ol laen blong Hasa,

55mo ol laen blong Bakos, mo ol laen blong Siseraha, mo ol laen blong Tema,

56mo ol laen blong Nejia, mo ol laen blong Hatifa.

57“ ‘Mo ol laen blong ol man blong wok blong King Solomon bifo, we oli aot long Babilonia oli kambak, lis blong olgeta i olsem. I gat ol laen blong Sotae, mo ol laen blong Soferet, mo ol laen blong Perida,

58mo ol laen blong Jahala, mo ol laen blong Dakon, mo ol laen blong Gidel,

59mo ol laen blong Sefatia, mo ol laen blong Hatil, mo ol laen blong Pokeret Hajebaem, mo ol laen blong Amon.

60“ ‘Olgeta laen blong ol man blong wok long haos blong God bifo wetem ol laen blong ol man blong wok blong King Solomon bifo, namba blong olgeta ya evriwan i kasem tri handred naenti tu man.

61-62“ ‘Mo i gat ol narafala laen blong Isrel oli aot long Babilonia oli kambak, we oli no savegud stret stamba blong laen blong olgeta. Sam long olgeta ya oli laen blong Delaea, mo sam oli laen blong Tobia, mo sam oli laen blong Nekoda. Mo taem oli stap long Babilonia, oli stap long ol vilej we nem blong olgeta, Telmela, mo Telasaha, mo Kerub, mo Adon, mo Hime. Namba blong olgeta ya evriwan, i gat sikis handred foti tu man.

63-65 Eks 28.30; Dut 33.8 “ ‘Mo i gat ol pris* tu we oli aot long Babilonia oli kambak, we oli no savegud stret stamba blong laen blong olgeta. Sam long olgeta ya oli laen blong Hobaea, mo sam oli laen blong Hakoj, mo sam oli laen blong Basilae.

“ ‘Nao taem ol pris ya oli traem lukaot nem blong trifala bubu ya blong olgeta long lis blong ol pris, long buk ya we nem blong ol pris bifo i stap long hem, be oli no save faenem nem blong trifala. Nao long taem ya, distrikejen* ya blong king we i stap lukaot long ol man Juda, hem i wan laen blong yumi, mo hem i putumaot olgeta olsem we oli no klin long fes blong God, nao oli no moa save mekem wok blong pris. Mo hem i talem long olgeta, se bambae oli no moa save kakae ol kakae ya we ol man oli stap givim i go long God blong mekem wosip long hem. Bambae oli mas stap olsem gogo kasem we i gat wan pris we i save yusum tufala samting ya Yurim* mo Tumim* blong faenemaot tingting blong God long olgeta.

“ ‘Man ya Basilae, hem i wan man Gilead we dota blong hem i mared long wan pris, nao olgeta we oli kamaot biaen blong pris ya, oli stap makem olgeta se laen blong Basilae.

66“ ‘Olgeta we oli aot long Babilonia, oli kambak long ples blong olgeta, namba blong olgeta evriwan i kasem foti tu taosen tri handred sikisti man.

67Be oli no kaontem ol man blong wok blong olgeta, mo ol man blong mekem kwaea. Ol man blong wok blong olgeta, ol man wetem ol woman, namba blong olgeta evriwan i kasem seven taosen tri handred toti seven man. Mo ol man blong mekem kwaea, ol man wetem ol woman, namba blong olgeta evriwan i kasem tu handred foti faef man.

68Mo ol anamol blong olgeta, namba blong olgeta i olsem. I gat seven handred toti sikis hos, mo tu handred foti faef hafkas* dongki,

69mo fo handred toti faef kamel, mo sikis taosen seven handred twanti dongki.

70“ ‘I gat plante man we oli givim mane mo ol narafala samting blong givhan long wok ya blong wokem haos ya blong God i gud bakegen. Distrikejen blong ples ya i givim ol presen blong hem olsem. Hem i givim eit kilo gol, mo fifti besin blong yusum blong mekem wosip, mo faef handred toti klos blong pris.

71Mo ol hed blong ol famle oli givim ol presen blong olgeta olsem. Oli givim wan handred sikisti eit kilo gol, mo wan taosen tu handred fifti kilo silva.

72Mo ol narafala man oli givim ol presen blong olgeta olsem. Oli givim wan handred sikisti eit kilo gol, mo wan handred foti kilo silva, mo sikisti seven klos blong pris.

73 1 Kron 9.2; Neh 11.3 “ ‘Nao olgeta laen ya blong Isrel, we hemia ol pris wetem ol Livaet mo ol man blong gad long haos blong God mo ol man blong mekem kwaea long haos ya mo ol narafala man, olgeta oli kam stap long ol taon mo ol vilej olbaot long distrik ya Juda.’ ”