1 2 King 24.12-16; 2 Kron 36.10 Nao Profet Jeremaea i talem long ol laen* blong Isrel* se, “Olgeta. Mi mi luk wan vison* we Hae God i soemaot long mi, mo long vison ya, mi luk tu basket we tufala i stap long fored blong haos* blong God, mo tufala i fulap long frut blong figtri.* Long taem ya, King Nebukadnesa blong Babilonia, hem i holem king blong Juda,* King Jehoeakin we papa blong hem King Jehoeakim, mo i holem ol lida, mo ol blaksmit, mo ol narafala man we oli waes gud blong mekem wok, i karemaot olgeta, oli go wok slef* long Babilonia.
2Tufala basket ya, faswan i fulap long ol gudfala frut blong figtri we oli raep fastaem, mo oli gudwan blong kakae. Mo narafala basket, hem i fulap long ol frut blong figtri we oli nogud finis, oli no moa stret blong man i kakae.
3Nao Hae God i talem long mi se, ‘Jeremaea. ?Yu stap lukluk wanem samting?’
“Mo mi talem se, ‘Ol frut blong figtri ya. Sam oli gud we i gud, be sam oli nogud we i nogud olgeta, oli roten finis we man i no moa save kakae.’
4“Nao Hae God i talem long mi se,
5‘Mi mi Hae God, mi God blong yufala, mo mi talem se olgeta ya we ol enemi oli kam tekemaot olgeta oli go wok slef long Babilonia, mi mi luk se olgeta oli olsem ol gudfala frut ya, mo bambae mi kaen gud long olgeta.
6Mi bambae mi stap lukaot gud long olgeta, mo bambae mi tekem olgeta oli kambak long ples ya bakegen. Mo taem mi putum olgeta long ples ya, bambae mi mekem olgeta oli kam strong bakegen, mo mi no moa save spolem olgeta, mo bambae mi no moa save pulumaot olgeta bakegen.
7Bambae mi putum gudfala tingting long olgeta, blong oli save se mi mi Hae God. Nao bambae oli kam man blong mi, mo mi bambae mi God blong olgeta, from we bambae oli kambak long mi, we oli putum olgeta tingting blong olgeta i stap strong long mi.
8“ ‘Be King Jedekia ya we naoia hem i king blong Juda, mo ol haeman blong hem, wetem ol narafala man Jerusalem* we oli stap yet long ples ya, mo olgeta ya we oli go finis long Ijip, mi bambae mi spolem olgeta. Bambae mi sakem olgeta, olsem we man i sakem ol frut we oli roten finis, oli no moa stret blong man i kakae.
9Bambae mi letem bigfala trabol i kam kasem olgeta, nao taem ol man blong ol narafala kantri long wol oli harem nius blong hem, bambae oli fraet tumas, oli seksek from. Nao long olgeta ples we bambae mi ronemaot olgeta oli go stap long hem, ol man bambae oli mekem plei long olgeta, oli tok nogud long olgeta, oli laf long olgeta, mo bambae oli stap yusum nem blong olgeta blong singaot* trabol i kam long man.
10Mi bambae mi sanem ol enemi oli kam kilim olgeta, mo bambae oli gat hadtaem blong kasem kakae, mo bigfala sik bambae i kam kasem olgeta, gogo kasem we i no moa gat wan long olgeta i stap long graon ya we mi mi bin givim long ol bubu blong olgeta bifo.’ ”
Who We AreWhat We EelieveWhat We Do
2025 by iamachristian.org,Inc All rights reserved.
