Aesea 61 - Bislama Bible Revised 2012

Hae God bambae i kam sevem ol man blong hem

1 blong wok blong Hae God long ol man blong hem, we man ya i talem se,

“Olgeta.

Hae God we i Masta* blong yumi,

hem i jusumaot mi,

mo paoa blong Spirit blong hem

i kam fulap long mi,

blong mi kam talemaot gud nius long ol puaman.

Hem i sanem mi,

blong mi kam mekem ol man

we tingting blong olgeta i foldaon olgeta,

oli harem gud bakegen,

mo blong mi talemaot long olgeta

we oli stap wok slef* long narafala kantri,

se oli save gohom,

mo blong mi tekemaot olgeta

we oli stap long kalabus,

blong oli save gofri.

2 Mat 5.4 Hem i sanem mi,

blong mi talemaot se taem i kam finis,

we hem bambae i flatemdaon

ol enemi blong ol man blong hem,

i sevem olgeta.

Hem i sanem mi,

blong mi leftemap tingting blong olgeta

we oli harem nogud, oli stap krae,

3mo blong mi mekem olgeta long Saeon*

we oli stap harem nogud olsem,

oli harem gud bakegen, oli glad,

mo blong mi mekem we oli no moa krae,

oli stap sing blong presem hem.

Olgeta bambae oli olsem ol tri

we hem nomo i planem olgeta.

Bambae olgeta evriwan oli save folem

ol fasin we i stret nomo,

mo ol man bambae oli save presem hem,

from ol samting we hem i mekem.

4Bambae olgeta oli stanemap ol taon ya bakegen,

we oli brokdaon longtaem finis,

mo bambae oli wokemgud ol haos

we ol man oli spolem bifo olgeta.

5“!Ol man ples!

Ol man blong ol narafala kantri

bambae oli kam wok blong yumi.

Bambae oli stap lukaot

long ol sipsip blong yumi,

mo oli mekem ol wok

long ol garen blong yumi,

mo bambae oli stap lukaot

long ol plantesen blong grep* blong yumi.

6Nao ol man bambae oli tokbaot yumi,

se Hae God i God blong yumi,

mo yumi ol pris* blong hem,

yumi ol man blong wok blong hem.

Bambae yumi save harem gud

long ol gudgudfala samting

blong ol man blong ol narafala kantri,

mo bambae yumi save glad,

from we ol gudgudfala samting ya

oli blong yumi.

7Fasin ya we yumi sem tumas,

we nem blong yumi i kam nogud olgeta

long fes blong ol narafala man,

hem i finis finis.

Bambae yumi save stap oltaem

long kantri blong yumi,

mo ol gudgudfala samting blong yumi,

hem bambae i dabolem olgeta,

nao glad blong yumi bambae i no save finis.”

8Mo profet i gohed, i talemaot we Hae God i talem se,

“Fasin ya we man i stap mekem i stret long ol man,

hemia nao mi mi laekem tumas,

be ol fasin blong stil,

mo ol narafala fasin we man i stap brekem loa,

mi mi no laekem nating,

mi agens long olgeta.

Oltaem tingting blong mi i stap strong

long ol man blong mi,

mo bambae mi mekem i gud long olgeta.

Mo bambae mi mekem wan strong promes* wetem olgeta,

we bambae i no save finis.

9Ol pikinini we bambae oli stap kamaot biaen long olgeta,

bambae ol man blong ol narafala kantri

oli savegud nem blong olgeta.

Ol man we bambae oli luk olgeta

bambae oli save talem se,

‘Ol man ya,

Hae God i blesem olgeta ya.’ ”

10 Rev 21.2 Nao profet i gohed, i talem se,

“!Ol man Jerusalem*!

Hae God i God blong yumi,

mo naoia yumi glad tumas

from ol samting ya we hem i mekem.

Yumi olsem yang boe wetem yang gel

we bambae tufala i mared,

we tufala i putum klos blong mared finis.

Spesel klos blong yumi,

hemia we Hae God i sevem yumi,

i mekem we yumi kam stret man

long fes blong hem.

11Hem i Masta blong yumi,

mo olsem we oltaem, ol sid oli gru,

nao biaen oli karem lif,

long sem fasin,

hem bambae i mekem we yumi kam stret man,

mo we yumi stap presem hem

long fes blong ol man blong ol narafala kantri.