Esra 1 - Bislama Bible Revised 2012

King Sirus i talemaot se ol man Juda oli save gobak long kantri blong olgeta

1 long fas yia blong hem, Hae God i mekem tok ya blong hem i kamtru. Hem i mekem we king ya i mekem wan tok, mo i raetemdaon, nao i givim long ol man blong hem blong oli go ridimaot long olgeta man long evri ples we hem i stap rul long hem. Long tok blong hem,

2Aes 44.28hem i talem se,

“Mi King Sirus blong Pesia, mo tok blong mi i olsem. Hae God, hem i God blong heven, mo hem i putumap mi mi king long olgeta ples long wol ya. Bifo, haos* blong hem i stap long Juda,* long taon ya Jerusalem,* mo naoia wok blong wokem haos ya bakegen, hem i putum long han blong mi.

3Hem i God blong yufala ol laen* blong Isrel,* mo yufala i man blong hem. Prea blong mi we hem bambae i stap wetem yufala evriwan. Jerusalem i ples blong mekem wosip long hem, mo naoia yufala i mas gobak long taon ya, yufala i mas stanemap haos ya blong hem bakegen long ples ya.

4Mo yufala ol narafala man we i stap raonabaot long ol laen bong Isrel ya we oli stap wok slef* long ples ya, sipos sam long olgeta oli trabol blong gobak long ples blong olgeta, bambae yufala i mas givhan long olgeta. Bambae yufala i mas givim silva mo gol long olgeta, mo ol samting we oli nidim long rod, mo ol anamol blong karem ol samting ya. Mo bambae yufala i mas givim ol presen long olgeta tu blong oli givim i go long Hae God long haos blong hem long Jerusalem.”

5Nao long taem ya, Hae God i wok long tingting blong plante man blong oli kambak. Long olgeta ya, i gat ol lida blong laen blong Juda, mo ol lida blong laen blong Benjamin,* mo ol pris* mo ol Livaet* mo sam narafala man tu. Nao olgeta ya evriwan oli stap mekemrere blong kam wokem haos blong hem bakegen long Jerusalem.

6Mo ol man we oli stap raonabaot long olgeta oli givhan long olgeta, oli givim plante samting long olgeta. Oli givim ol samting we oli wokem long silva mo long gol, mo ol samting we bambae oli nidim long rod, mo ol narafala gudgudfala samting, mo ol presen we bambae oli kam givim long Hae God, long haos blong hem. Mo oli givim ol anamol tu long olgeta, blong karem ol samting ya i kam.

7Mo ol besin mo ol kap we King Nebukadnesa i bin tekemaot long haos blong Hae God long Jerusalem, i karem i go long Babilon, i putum long haos blong ol god blong hem, King Sirus i tekemaot ol samting ya bakegen blong givim i gobak long olgeta.

8Hem i putum ol samting ya long han blong Mitredat, man blong lukaot long mane blong hem, mo Mitredat i kaontem ol samting ya long fes blong Sesbajara, nao i givim olgeta i go long hem. Sesbajara ya, hem i wan lida blong ol man Juda, we biaen i kam distrikejen* blong distrik ya Juda.

9Olgeta samting ya, i gat toti gol besin, mo wan taosen silva besin, mo twanti naen narafala besin,

10mo toti smol gol besin, mo fo handred ten smol silva besin, mo wan taosen narafala samting blong yusum long haos blong Hae God.

11Namba blong ol samting ya, olgeta evriwan i kasem faef taosen fo handred. Nao taem Sesbajara wetem ol narafala laen blong Isrel ya oli aot long Babilon, oli kambak long Jerusalem, hem i karem ol samting ya i kam.