Levitikas 26 - Bislama Bible Revised 2012

Hae God bambae i blesem ol man we oli stap obei long hem(Dutronome 7.12-24; 28.1-14)

1 Lev 19.4; Eks 20.4; Dut 5.8; 16.21,22; 27.1 Nao bakegen, Hae God i talem se, “Mi mi Hae God, mi God blong yufala, mo taem yufala i go stap long kantri ya we bambae i blong yufala, bambae yufala i no mas wokem ol aedol, mo yufala i no mas wokem ol pija blong wan samting long wud no long ston no wanem, blong yufala i mekem wosip long olgeta. Mo yufala i no mas stanemap ol longlongfala ston, mo ol ston we yufala i katemgud olgeta blong flasem, blong yufala i mekem wosip long olgeta.

2“Mi mi Hae God, mi God blong yufala, mo yufala i mas holemgud Sabat* dei, mo ol narafala dei blong spel, mo yufala i mas tinghevi long ples we bambae yufala i stap mekem wosip long mi long hem.

3 Dut 11.13-15; 28.1-14 “Sipos yufala i stap folem ol loa blong mi, mo yufala i stap obei long ol tok we mi mi putum,

4bambae mi mi sanem ren i kam long yufala long stret taem blong hem, blong yufala i save gat plante kakae long graon blong yufala, mo ol tri blong yufala oli save karem plante frut.

5Bambae kakae blong garen* blong yufala i plante we plante. Bambae yufala i stap tekemaot ol kakae long garen blong yufala gogo ol frut blong grep* blong yufala i raep. Mo bambae yufala i stap tekemaot ol frut blong grep ya gogo kasem long taem blong planem garen blong yufala bakegen. Long kantri ya, bambae yufala i no save sot long kakae samtaem, mo bambae yufala i save stap gud oltaem nomo we i no gat enemi i save kam spolem yufala.

6“Bambae mi mi mekem we yufala i gat pis long kantri blong yufala, nao long naet, bambae yufala i save slip gud we yufala i no save fraet long wan samting. Ol wael anamol we oli save kilim man i ded, bambae mi mi ronemaot olgeta oli gowe long ples blong yufala, mo bambae i no moa gat faet bakegen long ples ya.

7Bambae yufala i ronemaot ol enemi blong yufala we bambae yufala i stap kilim olgeta i ded.

8Faef man nomo blong yufala bambae oli save ronemaot handred man blong olgeta, mo handred man nomo blong yufala bambae oli save ronemaot ten taosen man blong olgeta.

9Mo bambae mi blesem yufala, mi mekem we yufala i gat plante pikinini, olsem we mi talem long promes* ya we mi mekem wetem yufala.

10Kakae we bambae yufala i tekemaot long ol garen blong yufala bambae i plante we plante, bambae i save las kasem wan ful yia, nao biaen, bambae yufala i save sakemaot ol olfala kakae we i stap blong mekem ples blong putum ol niufala kakae long hem.

11Mi bambae mi stap wetem yufala long Haos Tapolen blong mi, mo neva bambae mi gowe long yufala,

12-132 Kor 6.16bambae mi stap wetem yufala. Oltaem, mi bambae mi God blong yufala, mo yufala bambae i man blong mi. Fastaem yufala i stap wok slef* long Ijip, be mi nao mi tekemaot yufala long ples ya, mi tekem yufala i kam. Mo mi nao mi brekem ol jen ya we i stap fasem yufala, mi mekem yufala i fri, we yufala i fri olgeta.”

Hae God bambae i panisim ol man we oli no obei long hem(Dutronome 28.15-68)

14 Dut 28.15-68 Nao Hae God i talem se, “Be sipos yufala i no save lesin long mi, mo yufala i no wantem obei long ol tok ya we mi mi putum, bambae mi panisim yufala.

15Sipos yufala i tanem baksaed long ol tingting blong mi, mo yufala i no wantem blong obei long ol loa blong mi mo blong folem ol tok blong mi, nao yufala i brekem promes* ya we mi mekem wetem yufala,

16bambae mi mi panisimgud yufala. Bambae mi letem trabol i kam long yufala we bambae i spolemgud yufala. Hemia sik we bambae yufala i no save blokem, mo fiva we bambae i mekem yufala i blaen mo yufala i bunbun nogud. Bambae yufala i planem ol garen* blong yufala, be oli no save givhan long yufala, from we ol enemi blong yufala bambae oli kam flatemgud ol kakae ya.

17Bambae mi tanem baksaed long yufala, nao ol enemi blong yufala bambae oli kam winim yufala, mo olgeta we oli no laekem yufala nating bambae oli kam rulum yufala. Nating we i no gat man i stap ronem yufala, be bambae yufala i stap ronwe, from we bambae yufala i fraet we i fraet tumas.

18“Be sipos biaen long ol panis ya, yufala i no obei long mi yet, bambae mi dabolem panis ya blong yufala from ol sin ya blong yufala.

19Nating we yufala i praod mo yufala i stronghed tumas, be bambae mi flatemdaon tingting blong yufala bakegen. Bambae i no gat ren long ples blong yufala, nao graon blong yufala bambae i kam drae we i drae, mo i kam strong olsem aean.

20Ol hadwok ya blong yufala bambae i no save givhan nating long yufala, from we graon blong yufala bambae i no save givim kakae long yufala, mo ol tri blong yufala bambae oli no save karem frut.

21“Be sipos yufala i gohed yet, yufala i stap agens long mi, mo yufala i no wantem obei long mi, bambae mi dabolem panis blong yufala bakegen from ol sin ya blong yufala.

22Bambae mi sanem ol wael anamol oli kam long ples blong yufala, nao bambae oli stap kilim ol pikinini blong yufala oli ded, wetem ol anamol blong yufala tu. Bambae mi mekem we i no moa gat plante long yufala i laef i stap, nao ol rod blong yufala bambae oli stap nating nomo olsem.

23“Nao sipos biaen long ol panis ya, yufala i no stretem fasin blong yufala, yufala i stap agens long mi yet,

24be mi tu bambae mi agens long yufala, mo bambae mi dabolem panis blong yufala bakegen from ol sin ya blong yufala.

25Bambae mi letem faet i kam long yufala, blong panisim yufala from we yufala i brekem promes ya we mi mi mekem wetem yufala. Mo sipos yufala i ronwe, yufala i go haed long ol taon blong yufala blong yufala i stap gud, bambae mi sanem ol rabis sik i kam long yufala, we bambae yufala i no save blokem, nao ol sik ya bambae oli mekem we yufala i no gat paoa, nao bambae yufala nomo i letem yufala i go long han blong ol enemi blong yufala.

26Bambae mi mekem kakae blong yufala i finis. Nao ten woman nomo bambae oli save kukum olgeta flaoa blong wan dei long wan sospen nomo, mo taem oli seraot ol bred* ya smosmol long yufala, mo yufala i kakae, be bambae yufala i stap hanggri yet.

27“Sipos biaen long ol panis ya, yufala i stap gohed yet blong agens long mi, mo yufala i no wantem obei long mi,

28bambae mi mi kros tumas, mi agens long yufala moa, nao mi dabolem panis blong yufala antap moa.

29Bambae yufala i hanggri we i hanggri tumas, nao bambae yufala i kakae ol pikinini blong yufala.

30Ol ples blong mekem wosip blong yufala antap long ol hil, bambae mi spolem olgeta. Bambae mi brebrekem ol olta we bambae yufala i bonem insens* long hem, mo bambae mi sakem ol dedbodi blong yufala oli go hivap antap long ol aedol ya blong yufala we oli folfoldaon i stap. Mi bambae mi no wantem yufala nating.

31Bambae mi flatemgud ol taon blong yufala, mo mi brebrekemdaon ol ples blong mekem wosip blong yufala. Bambae mi no save glad nating long ol sakrefaes blong yufala we yufala i stap bonem blong mekem wosip long mi.

32Bambae mi spolemgud kantri ya blong yufala. Nao ol enemi blong yufala we oli kam stap long ples ya bambae oli sek gud long fasin we mi bambae mi mekem long yufala.

33Bambae mi ronemaot yufala i go stap wanwan olbaot long ol narafala kantri, mo bambae mi sanem ol enemi blong yufala oli biaen long yufala blong kilim yufala i ded. Long ol taon blong yufala, ol haos bambae oli brobrok nogud i stap, mo kantri ya blong yufala bambae i stap nating nomo.

34-35Long taem ya we bambae yufala i stap yet long kantri ya, bambae yufala i no save letem graon blong yufala i spel long ol yia blong spel we mi mi makemaot. Be long taem ya we bambae yufala i stap wok slef* longwe long han blong ol enemi blong yufala long kantri blong olgeta, bambae graon blong yufala i stap nating nomo, nao bambae hem i save spel gud long plante yia.

36“Bambae mi mekem yufala we i stap long narafala kantri long han blong ol enemi blong yufala, yufala i fraet we i fraet, we noes blong ol lif nomo we win i blu long hem bambae i save mekem yufala i ronwe. Bambae yufala i save ronwe olsem we ol enemi oli ronem yufala long faet, mo bambae yufala i save foldaon long taem we i no gat enemi nating i stap klosap long yufala.

37Nating we i no gat man i ronem yufala, be bambae yufala i stap resis we yufala i stap bangbangem yufala bakegen, nao yufala i stap stambol, yufala i stap folfoldaon olbaot, mo bambae yufala i no gat paoa blong faet long ol enemi blong yufala.

38Bambae yufala i ded long kantri ya we yufala i stap long hem, mo ol man bambae oli berem yufala long graon ya blong ol enemi blong yufala.

39Mo smol haf ya nomo blong yufala, we oli laef i stap, bambae oli harem nogud tumas, oli kam bunbun olgeta from ol sin blong olgeta, mo ol sin blong ol bubu blong yufala.”

Hae God bambae i holem promes blong hem yet(Dutronome 28.15-68)

40Mo Hae God i talem se, “Be olgeta ya we bambae oli stap kamaot biaen long yufala bambae oli tanem tingting blong olgeta long ol sin blong olgeta, mo long ol sin blong ol bubu blong olgeta, i stat long yufala i go kasem olgeta. Taem ol pikinini ya oli luksave we ol bubu blong olgeta oli girap agens long mi,

41oli mekem mi mi agens long olgeta, mi sanem olgeta i go kalabus long narafala kantri long han blong ol enemi blong olgeta, ol pikinini ya bambae oli no moa mekem stronghed, oli putum tingting blong olgeta i stap daon, mo bambae oli glad blong karem panis from sin blong olgeta wetem sin blong ol olfala blong olgeta.

42Jen 28.13,14; Jen 26.3,4; Jen 17.7,8Nao bambae mi mi stap tingbaot promes* ya blong mi we mi mekem wetem Jekob* mo Aesak mo Ebraham, mo bambae mi mekem promes blong mi i niuwan bakegen, blong mi givim kantri ya long ol man blong mi.

43Be fastaem, olgeta we bambae oli stap kamaot biaen long yufala, we bambae oli stap long kantri ya oli mas aot long hem, blong graon blong hem bambae i save spel gud olsem we mi mi talem. Mo olgeta ya bambae oli mas kasem ful panis from we oli tanem baksaed long ol tingting blong mi, mo oli no wantem nating ol loa blong mi.

44-45Be long taem ya we olgeta ya oli stap longwe yet long kantri blong ol enemi blong olgeta, bambae mi mi no save lego olgeta, mo mi no save spolem olgeta. Sipos mi spolem olgeta, promes we mi mekem wetem yufala bambae i finis, be i no olsem. Mi mi Hae God, mi God blong yufala evriwan, mo promes ya we mi mekem wetem ol bubu blong olgeta ya fastaem, taem mi soemaot bigfala paoa blong mi long fes blong ol man blong olgeta kantri, long taem ya we mi tekemaot yufala long Ijip, mi tekem yufala i kam blong mi bambae mi God blong yufala, promes ya bambae mi mekem i niuwan bakegen wetem olgeta.”

46Hemia nao ol loa mo ol rul mo ol tingting blong Hae God, we hem i givim long Moses long hil ya Sinae blong i talemaot long ol laen* blong Isrel* blong oli folem.