Eksodas 16 - Bislama Bible Revised 2012

Kakae ya mana, mo ol pijin ya kwel

1Nao long yia ya we ol laen* blong Isrel* oli aot long Ijip, long namba tu manis* blong yia ya mo long namba fiftin dei blong hem, olgeta oli aot long Elim, oli kam stap long draeples ya Sin, we i stap long medel blong Elim mo Sinae.

2Nao taem oli stap long ples ya, oli stap tok agens long Moses mo Eron,

3oli talem se, “Sipos Hae God i kilim mifala long Ijip, bambae i moa gud. Taem mifala i stap longwe, sospen i fulap gud long mit olwe nomo, mo mifala i save kakae ol narafala kakae olsem we mifala i wantem. Be yutufala i tekem mifala i kam long draeples ya blong bambae mifala i stap hanggri gogo mifala evriwan i ded.”

4 Jon 6.31 Nao Hae God i talem long Moses se, “Naoia bambae mi mekem we kakae blong yufala i aot long heven, i kamdaon long yufala we i plante we plante, i folfoldaon olsem ren. Evri dei, bambae yufala evriwan i mas go pikimap kakae blong yufala we i naf blong wan dei nomo. Long fasin ya, bambae mi save makem ol man ya, se oli save folem tok blong mi no nogat.

5Be long namba sikis dei, bambae yufala i mas go pikimap kakae blong yufala we i naf blong tu dei, mo yufala i mas mekemrere ol kakae ya.”

6Nao Moses mo Eron, tufala i talem long ol man se, “Tede, long sapa, bambae yufala i luksave we hemia Hae God ya we i tekemaot yumi long Ijip, i tekem yumi kam long ples ya.

7Mo tumora long moning, bambae yufala i luk bigfala laet ya we i saen we i saen, we i soemaot we hem i stap. Hem i harem finis we yufala i stap tok agens long hem. I moa gud yufala i save. Taem yufala i stap tok agens long mitufala, be yufala i stap tok agens long hem ya. Mitufala i man blong wok blong hem nomo.”

8Mo Moses i gohed, i talem se, “Tede long sapa, Hae God bambae i givim mit long yufala, mo tumora long moning, bambae hem i givim kakae long yufala, we bambae i plante olsem we yufala i wantem. Hem bambae i mekem olsem from we i harem finis ol tok ya blong yufala, we yufala i stap tok agens long hem, from we taem yufala i stap tok agens long mitufala, be yufala i stap tok agens long hem nomo.”

9Nao Moses i talem long Eron se, “Yu go singaot olgeta man oli kam stanap long fes blong Hae God, from we hem i harem finis ol tok ya blong olgeta we oli stap tok agens long hem.”

10Nao taem Eron i stap toktok long olgeta, olgeta oli tanemraon, oli lukluk i go long draeples, nao wantaem nomo, bigfala laet ya we i saen we i saen, we i soemaot we Hae God i stap, hem i kamaot long klaod ya we i stap.

11Nao Hae God i talem long Moses se,

12“Ol man ya oli stap agens long mi, mo mi mi harem ol tok ya blong olgeta. Yu talemaot long olgeta, we mi mi talem se, ‘Tede, taem i no tudak gud yet, bambae yufala i gat mit, mo long moning bambae yufala i gat plante kakae olsem we yufala i wantem. Nao bambae yufala i save we mi mi Hae God, mi God blong yufala.’ ”

13Nao long sapa, ol pijin ya kwel* oli kam plante we plante, oli kavremap olgeta ples long ples ya. Mo long moning, i gat ol wota blong naet i fulap olbaot long ples ya we oli stap long hem.

14Nao taem wota blong naet ya i kam drae, i gat ol samting olsem skal blong fis i fulap olbaot long ples ya. Ol samting ya oli smosmol, mo taem man i holemstrong, oli save brok isi nomo.

151 Kor 10.3Mo taem ol man oli luk samting ya, oli no save nating nem blong hem, nao oli stap asaskem long olgeta se, “?Olgeta, wanem samting ya?”

Nao Moses i talem long olgeta se, “Hemia nao kakae ya we Hae God i givim long yumi blong yumi kakae.

16Hem i talem finis, se yumi evriwan i mas pikimap we i naf blong yumi kakae, we mak blong hem fo bigfala panikin wan man.”

17Nao oli go mekem olsem we hem i talem. Sam long olgeta oli pikimap plante, mo sam oli pikimap smol nomo.

182 Kor 8.15Be taem oli kambak long haos, mo oli makem, oli luk we olgeta we oli tekem plante oli no ova long mak, mo olgeta we oli tekem smol nomo oli no sot. Olgeta evriwan oli kasem we i naf long olgeta.

19Nao Moses i talem long olgeta se, “Ol kakae ya, bambae yufala i no mas holem i stap go kasem tumora.”

20Be sam long olgeta oli no lesin long tok ya blong hem, oli holem haf kakae ya i stap blong nekis dei. Be long nekis moning, ol haf kakae ya i sting, mo i gat fulap maget long hem. Mo Moses i kros tumas long olgeta from samting ya.

21Nao evri moning, olgeta evriwan oli stap go pikimap ol kakae ya olsem we oli wantem, mo taem san i stap kam strong, haf ya we i stap long graon we oli no tekem, hem i stap ronaot.

22Nao long namba sikis dei blong wik ya, oli go pikimap kakae ya i naf blong tu dei, we olgeta wanwan oli pikimap i naf blong fulumap eit bigfala panikin. Nao ol lida blong olgeta oli kam ripotem samting ya long Moses,

23Eks 20.8-11be hem i talem long olgeta se, “No, be Hae God i talem finis, se tumora i Sabat* dei. Dei ya i tabu, i dei blong hem, mo i dei blong spel blong yumi. Ol kakae we yufala i wantem kakae tede, yufala i rusum no yufala i kukum, be haf we i stap, yufala i mas putumgud blong tumora.”

24Nao oli mekem olsem we hem i talem, oli holem haf i stap blong kakae long nekis dei. Nao long moning blong hem, kakae ya i no sting, mo i no gat maget long hem tu.

25Nao Moses i talem long olgeta se, “Tede, yufala i save kukum haf blong kakae ya we i stap, from we tede i Sabat dei. Dei ya i tabu, i blong Hae God, mo i dei blong spel. Bambae yufala i no save faenem kakae ya bakegen afsaed long ples blong yufala tede.

26Evri wik, long ol sikis dei blong hem, bambae yumi mas go pikimap ol kakae ya, be namba seven dei i dei blong spel, mo long dei ya, kakae ya bambae i no stap.”

27Nao long namba seven dei ya, i gat sam long olgeta oli go blong pikimap kakae ya, be taem oli go, oli no faenem.

28Nao Hae God i talem long Moses se, “Moses. Yu luk. !Ol man ya oli no save obei long mi nating!

29Mi mi Hae God, mo mi givim dei ya long yufala blong yufala i spel long hem, mo yufala i mas save samting ya. From samting ya, oltaem, long namba sikis dei, bambae mi givim kakae long yufala we i naf blong tu dei. Nao long namba seven dei, i tabu blong wokbaot, bambae yufala i mas stap kwaet long ples blong yufala.”

30Nao from tok ya, evri wik, ol man oli stap spel long namba seven dei, oli no moa wok long hem.

31 Nam 11.7,8 Nao olgeta oli putum nem blong kakae ya, se ‘Mana*’ we i min se “?Wanem samting ya?” Mana ya i olsem sid blong tri, i smol, mo i waet, mo taem oli kakae, oli harem i swit, olsem bisket* we oli wokem wetem hani.*

32Nao Moses i talemaot long olgeta, we Hae God i talem se, “Mana ya, mi mi givim long yufala taem mi sevem yufala, mi tekemaot yufala long Ijip, nao yufala i stap long draeples ya. Mo yufala i mas putumgud sam mana i stap, blong ol pikinini we bambae oli kamaot biaen long yufala oli save luk.”

33Hib 9.4Nao Moses i talem long Eron se, “Yu tekem wan botel, yu go pikimap fo panikin mana, yu fulumap long botel ya, nao yu go putumgud i stap long fes blong Hae God. Bambae i stap long ples ya, nao olgeta we bambae oli kamaot biaen long yumi oli save luk.”

34Nao Eron i mekem olsem we Hae God i talem long Moses. Hem i tekem mana ya, mo biaen, i putum long fran blong Bokis ya we i Saen blong Promes* blong Hae God, blong bambae i stap gud long ples ya.

35 Jos 5.12 Nao oltaem long foti yia, olgeta oli stap kakae spesel kakae ya we God i stap givim long olgeta, gogo kasem we oli gotru long kantri ya blong ol laen blong Kenan,* mo oli mekem ples blong olgeta long ples ya.

36Saes blong bigfala panikin ya we oli stap yusum blong makem ol kakae ya, hem i haf lita.