Levitikas 5 - Bislama Bible Revised 2012

Ol sin we man i mas mekem sakrefaes from

1Mo bakegen, Hae God i talem long Moses se, “Moses. Ol sin we oli save mekem yufala i doti olsem long fes blong mi, mo we yufala i mas mekem sakrefaes from, i olsem.

“Sipos oli singaot wan man i go long kot blong i talemaot ol samting we hem i luk no we i savegud, be long kot, hem i no talemaot samting ya, man ya i mekem sin, mo hem bambae i mas kasem panis from.

2“Sipos wan man i tajem dedbodi blong wan anamol no wan narafala samting we i doti long fes blong mi, nating we i no tingting blong mekem olsem, be hem i brekem Loa, mo i doti long fes blong mi, mo taem hem i luksave we i tajem samting olsem, hem i mas mekem sakrefaes from.

3“Sipos wan man i tajem wan samting we i kamaot long man, we i save mekem man i doti long fes blong mi, nating we i no tingting blong mekem olsem, mo nating we wanem samting, be hem i brekem Loa, mo taem hem i luksave we i tajem samting olsem, hem i mas mekem sakrefaes from.

4“Sipos wan man i mekem wan strong promes long nem blong mi, be i no tingting gud fastaem long fasin ya we i stap mekem, nating we i promes blong mekem wan samting we i gud no wan samting we i nogud, be hem i brekem Loa, mo taem hem i luksave samting we i mekem, hem i mas mekem sakrefaes from.

5“Nao sipos wan man i brekem Loa long wan fasin olsem, hem i mas kam long fes blong mi, i mas talemaot sin ya we i mekem.

6Mo blong stretem samting ya, hem i mas tekem wan woman sipsip no wan woman nani, i karem i kam long fes blong mi, nao pris bambae i mekem sakrefaes long hem blong tekemaot sin blong hem.

7“Sipos man olsem i puaman, we i no save tekem wan sipsip no wan nani blong givim i kam long mi, bambae i save tekem tu sotleg* no tu nawimba, we wan i blong mekem sakrefaes blong tekemaot sin ya, mo narawan i blong mekem sakrefaes ya we i blong bonem i bon evriwan.

8Sipos man olsem i tekem tu pijin i kam, i givim long pris, pris i mas tekem wan, i mekem sakrefaes long hem blong tekemaot sin blong hem. Bambae i mas tanem nek blong pijin ya blong kilim i ded, be i no mas pulumaot hed blong hem olgeta,

9nao i mas tekem sam blad blong hem, i sakem smosmol i go long saed blong Olta, mo haf blad blong hem we i stap, hem i mas mekem i ronaot i go long stamba blong Olta ya. Hemia i sakrefaes blong tekemaot sin.

10Mo hem i mas tekem narafala pijin ya, i bonem i bon evriwan blong mekem sakrefaes long hem olsem we Loa i talem. Hemia nao fasin we pris bambae i mas folem blong mekem sakrefaes blong tekemaot sin olsem, nao long fasin ya, mi bambae mi fogivim man olsem, mi tekemaot sin blong hem.

11“Be sipos man olsem i pua tumas, i no save tekem tu sotleg no tu nawimba, bambae i save tekem wan kilo flaoa we i beswan blong mekem sakrefaes blong tekemaot sin blong hem. Be i tabu blong i kafsaedem olifoel* i go long hem, mo blong i tekem insens* i kam wetem, from we hemia i no wan presen long kakae blong garen* blong hem, i wan sakrefaes blong tekemaot sin.

12Hem i mas tekem flaoa ya i kam long pris, mo pris i mas tekemaot smol haf blong hem long han blong hem, i bonem long Olta, wetem ol kakae we oli blong bonem blong givim i kam long mi, blong soemaot we man ya i givim evriwan finis i kam long mi. Hemia i sakrefaes blong tekemaot sin.

13Hemia nao fasin we pris bambae i mas folem blong mekem sakrefaes blong tekemaot sin olsem, mo long fasin ya, mi bambae mi fogivim man olsem, mi tekemaot sin blong hem. Nao haf blong flaoa ya we i stap i blong pris ya blong i kakae, i sem mak nomo long presen long ol kakae blong garen.”

Spesel sakrefaes blong tekemaot sin blong man we i ravem Hae God, no i ravem narafala man

14Nao bakegen, Hae God i givim tok blong hem long Moses

15blong i go talemaot long olgeta. Hem i talem se, “Moses. Sipos wan man i no givim ol samting i kam long mi we mi mi makemaot olgeta finis, se oli tabu, oli blong mi, man olsem i brekem Loa blong mi. Nao sipos hem i mekem sin olsem, we i no tingting se bambae i mekem, bambae hem i mas tekem wan man sipsip no wan man nani we i no gat wan samting i rong long bodi blong hem, i mas givim i kam long mi blong pris i mekem sakrefaes long hem blong tekemaot sin ya blong hem blong mekem hem i klin bakegen long fes blong mi. Pris i mas makem praes blong anamol ya long sem mane we oli stap yusum oltaem long ples blong mekem wosip, mo praes blong hem i mas stret long praes blong samting ya we man ya i no bin givim.

16Mo man ya i mas tekem samting ya we i no bin givim, i mas givim i kam long mi, mo i mas pem faen antap long hem bakegen. Mo fasin blong makem faen blong hem, sipos praes blong samting ya i faef taosen vatu,* faen blong hem bambae i mas pem wan taosen vatu antap bakegen. Nao hem i mas tekem anamol ya i kam, i givim long pris, mo pris i mas mekem sakrefaes long hem blong tekemaot sin ya blong hem, mo long fasin ya, mi bambae mi fogivim hem, mi tekemaot sin blong hem.

17“Sipos wan man i mekem wan samting we i brekem wan tok we mi mi putum, we hem i no tingting se bambae i mekem olsem, be hem i brekem Loa blong mi, mo hem bambae i mas panis from.

18Hem i mas tekem wan man sipsip no wan man nani we i no gat wan samting i rong long bodi blong hem, i mas kam givim long pris, blong pris i mekem sakrefaes long hem blong tekemaot sin blong man ya blong mekem hem i klin bakegen long fes blong mi. Pris bambae i makem praes blong anamol ya long sem mane we oli stap yusum oltaem long ples blong mekem wosip, mo long fasin ya, mi bambae mi fogivim man ya, mi tekemaot sin blong hem.

19Sakrefaes ya i blong tekemaot sin olsem, we man i mekem agens long mi, mo blong mekem hem i klin bakegen long fes blong mi.”