2 Korin Sotfala stori blong buk ya - Bislama Bible Revised 2012

Sotfala stori blong buk yaSeken leta ya we Pol i raetem i go long ol Kristin man long Korin, hem i raetem long taem we hem i fesem hadtaem wetem ol Kristin man long jos long Korin, we sam long olgeta oli kros tumas long hem, nao oli agens long hem. Be Pol i soem long olgeta se hem stap tingting strong blong stretem trabol ya, blong mekem se hem wetem olgeta oli save fren gud bakegen. Mo biaen, taem oli fren gud bakegen hem i talemaot long olgeta we hem i glad we i glad.Long fas haf blong leta ya Pol i tokbaot from wanem nao hem tok strong tumas long olgeta long wan leta we hem i raetem i go long olgeta. Mo hem i talem long olgeta we hem i glad tumas blong harem we olgeta oli harem tok blong hem, nao oli tanem tingting blong olgeta from sin blong olgeta, mo oli stretem problem ya we oli gat, mo oli fren gud wetem hem bakegen. Mo biaen, hem i talem long olgeta, se oli mas mekem kleksen blong oli givim long ol Kristin fren blong olgeta long Judia* we olgeta oli no gat samting. Long las haf blong leta ya, Pol i tok strong agens long sam man long Korin we oli talem se olgeta oli tru aposol, be oli stap spolem ol Kristin man long ples ya long tijing blong olgeta we i no stret. Oli stap talem se Pol i no wan tru aposol, be hem i tok strong blong blokem olgeta, mo i soemaot we hem i wan tru aposol blong Jisas Kraes.Ol haf blong buk yaFastok 1.1-11

Pol mo ol Kristin man long Korin 1.12—7.16

Kleksen we i blong go long ol Kristin man long Judia 8.1—9.15

Pol i soemaot we hem i wan tru aposol 10.1—13.10

Lastok 13.11-14