Sam 99 - Bislama Bible Revised 2012

Hae God, hem i Hae King(Tok i go long ol man.)

1 Eks 25.22 !Hae God, hem i king!

Hem i stap sidaon long ples blong hem

antap long tufala jerubim* ya,

i stap rul,

mo olgeta man oli fraet long hem,

oli stap seksek,

mo graon tu i seksek.

2Hae God i stap long Saeon.*

Hem i gat paoa,

mo i hae moa long ol man blong ol narafala kantri.

3Hem i King,

mo nem blong hem i hae we i hae.

Olgeta man bambae oli presem hem,

from we hem i tabu we i tabu.

(Tok i go long Hae God.)

4King blong mifala.

Yu yu gat olgeta paoa.

Oltaem yu yu laekem ol fasin

we i stret.

Stret fasin ya blong jajem man,

yu nomo yu tekem i kam,

yu stanemap long kantri blong mifala.

(Tok i go long ol man.)

5!Hae God i God blong yumi!

!Yumi presem hem!

Hem i stap sidaon long ples blong hem,

i stap rul.

!Hem i tabu we i tabu!

Yumi kam bodaon long fes blong hem,

yumi wosipim hem.

6Bifo, Moses mo Eron,

tufala i pris blong Hae God.

Samuel tu i wan long olgeta

we oli stap prea long hem.

Ol man ya blong Hae God

oli stap krae i go long hem,

mo hem i stap ansa long olgeta.

7 Eks 33.9 Hem i kamtru long olgeta

long bigfala klaod ya we i stanap stret nomo,

nao i toktok long olgeta.

Mo olgeta oli obei long ol loa blong hem,

mo oli holem ol tok ya

we hem i talem long olgeta.

(Tok i go long Hae God.)

8Hae God.

Yu yu God blong mifala.

Long taem ya,

yu yu ansa long ol man ya blong yu.

Nating we yu stap panisim olgeta

from ol sin blong olgeta,

be yu stap soemaot bakegen long olgeta

we yu yu save fogivim olgeta,

yu tekemaot ol sin blong olgeta.

(Tok i go long ol man.)

9Hae God i God blong yumi,

mo hem i tabu we i tabu.

Yufala i kam,

yumi presem nem blong hem,

yumi mekem wosip long hem

long tabu hil* ya blong hem.