Jajes 20 - Bislama Bible Revised 2012

Olgeta oli mekemrere blong go mekem faet

1Nao olgeta laen* blong Isrel* i stat long taon ya Dan* long not, i go kasem taon ya Bereseba long saot, mo i go kasem distrik ya Gilead long is, olgeta evriwan oli kam wanples long fes blong Hae God long Mispa.

2Nao long kampani ya we oli kam wanples, i gat ol lida blong ol laen ya wetem ol soldia blong olgeta, we olgeta evriwan i kasem fo handred taosen.

3-4Mo long taem ya, ol laen blong Benjamin* oli harem nius we olgeta ya oli kam wanples finis long Mispa.

Nao ol lida blong ol laen ya oli singaot man ya we ol man Gibea oli bin kilim woman blong hem, oli askem long hem se, “?Ol samting ya i kamaot olsem wanem? Yu traem stori long bisnes ya, blong mifala i harem.”

Nao man ya i talem se, “Mi wetem woman ya, mitufala i kam long taon ya Gibea long ples blong ol laen blong Benjamin, mitufala i wantem slip long ples ya.

5Nao long naet, ol man blong taon ya oli kam blong mekem faet long mi. Olgeta oli raonem haos ya we mitufala i stap long hem, mo oli wantem kilim mi. Be oli tekem woman ya, nao oli slip wetem hem we oli stap fosem hem, gogo hem i ded.

6Nao mi tekem bodi blong hem, mi brebrekem long twelef haf, mo mi seraot i go long ol twelef laen blong yumi. Mi mekem olsem, from we ol man Gibea ya oli mekem wan samting we i nogud we i nogud long fes blong yumi.

7Long ples ya, yumi evriwan ya i laen blong Isrel. ?Bambae yumi mekem olsem wanem?”

8Nao olgeta evriwan oli stanap wantaem, oli talem se, “Nating we man i gat gudfala haos blong hem, no i gat haos tapolen nomo blong hem, be bambae i no gat wan long yumi i aot long ples ya tede, i gohom.

9Bambae yumi mas sakem ol spesel ston* blong faenemaot long God se hu olgeta long yumi we bambae oli go mekem faet long ol man Gibea ya,

10mo hu olgeta bambae oli lukaot long ol kakae blong yumi. Bambae yumi seraot ol soldia ya blong yumi oli go long ten kampani, nao wan kampani bambae i stap nomo long ples ya blong lukaot long ol kakae blong yumi, mo yumi ol narafala kampani, bambae yumi go panisim ol man Gibea ya, from rabis fasin ya we oli mekem long kantri ya blong yumi.”

11Nao olgeta ya evriwan oli joen wanples, we oli gat wan tingting nomo, se oli mas go mekem faet long ol man blong taon ya.

12Nao olgeta oli sanem ol man blong karem tok oli go olbaot long olgeta ples long distrik ya Benjamin, blong talem long olgeta se, “?Wanem samting nogud ya we i yufala i mekem?

13Yufala i mas tekem ol krangkehed ya blong yufala long Gibea oli kam long mifala, blong mifala i kilim olgeta i ded. Yumi mas tekemaot rabis fasin ya long kantri blong yumi.” Be ol laen blong Benjamin oli no lesin long ol tok ya nating,

14-16nao ol lida blong olgeta oli girap, oli sanem tok i go long ol taon blong olgeta, oli singaot twanti sikis taosen soldia blong olgeta oli kam wanples long Gibea, blong oli go faet long ol narafala laen ya blong Isrel. Long olgeta ya, i gat seven handred man Gibea we oli gudfala man blong faet, mo oli lefhan tu. Olgeta ya evriwan oli save sakem ston long sling, mo sipos oli stonem samting we i smol tumas olsem wan hea nomo, be oli no save mestem.

17Be ol narafala laen ya oli gat fo handred taosen soldia blong olgeta we oli nambawan man blong faet.

Olgeta ya oli go mekem faet long ol brata blong olgeta we oli laen blong Benjamin

18Nao ol narafala laen* ya blong Isrel* oli go long Betel, long ples blong mekem wosip, nao oli prea long God se, “Hae God, plis yu soemaot long mifala. ?Bambae i olsem wanem? ?Wanem laen blong mifala bambae i lidim mifala blong go mekem faet long ol laen ya blong Benjamin*?”

Mo hem i givim ansa long olgeta se, “Ol laen blong Juda* bambae oli lidim yufala.”

19Nao long nekis dei, long moning, olgeta ya oli aot, oli go putumap ol haos tapolen blong olgeta klosap long taon ya Gibea.

20Nao oli go blong mekem faet long ol laen ya blong Benjamin, mo oli laenap blong faet we oli stap lukluk i go long taon ya.

21Be ol laen blong Benjamin oli kamaot long taon ya, oli kam mekem faet long olgeta, mo long dei ya nomo, oli kilim twanti tu taosen soldia blong olgeta ya oli ded.

22-24Nao ol narafala laen ya blong Isrel oli harem nogud tumas, mo oli aot long ples ya, oli gobak long ples blong mekem wosip, mo oli go krae long fes blong Hae God gogo san i godaon. Oli stap askem long hem se, “?Olsem wanem? ?Bambae mifala i gobak bakegen blong faet agens long ol brata ya blong mifala, no nogat?”

Mo Hae God i givim ansa long olgeta se, “Yes, yufala i mas gobak.”

Tok ya i leftemap tingting blong olgeta, nao long nekis dei, oli gobak long Gibea bakegen, mo oli laenap rere blong faet long sem ples ya we oli stap long hem fastaem.

25Be long namba tu dei blong faet ya, ol laen ya blong Benjamin oli aot long Gibea oli kam, mo oli kilim eitin taosen soldia blong olgeta ya bakegen we oli nambawan man blong faet.

26Nao ol narafala laen ya blong Isrel evriwan oli gobak bakegen long Betel we oli harem nogud tumas, oli stap krae. Oli stap sidaon long ples ya long fes blong Hae God we oli no kakae wan samting gogo san i godaon. Mo oli mekem ol sakrefaes blong mekem wosip long hem, sam we oli bonem i bon evriwan, mo sam we oli bonem haf oli kakae haf, blong soemaot we oli stap fren gud wetem hem.

27-28Long taem ya, Bokis ya we i Saen blong Promes* blong Hae God i stap long ples ya, mo Hae Pris* ya Finehas i stap lukaot long hem. Hae pris ya, papa blong hem Eleasara, mo bubu blong hem Eron. Nao olgeta oli askem long Hae God bakegen se, “?Olsem wanem? ?Bambae mifala i gobak bakegen, no nogat?”

Mo Hae God i givim ansa long olgeta se, “Yes, yufala i mas gobak bakegen. Tumora, mi bambae mi putum olgeta long han blong yufala.”

29Nao ol komanda blong olgeta oli putum sam soldia blong olgeta oli stap haed raonabaot long Gibea.

30Mo long nekis dei, we i namba tri dei blong faet ya, ol narafala soldia ya oli go blong mekem faet long ol laen blong Benjamin bakegen, mo oli laenap rere blong faet long sem ples ya we oli stap long hem fastaem.

31Nao ol laen ya blong Benjamin oli kamaot long Gibea bakegen blong mekem faet, be olgeta ya oli tanemraon, oli giaman blong ronwe long olgeta. Nao ol laen ya blong Benjamin oli biaen long olgeta, oli stap mekem faet long olgeta olsem we oli mekem fastaem, mo oli stap biaen long olgeta go kasem open ples long rod ya we i kam long Gibea, mo long rod ya we i go long Betel. Olgeta oli kilim samwe long toti man oli ded,

32mo oli stap taltalem long olgeta se, “!Naoia yumi winim olgeta bakegen, olsem fastaem!”

Be olgeta ya oli mekem plan finis se bambae oli giaman blong ronwe, blong pulum ol laen ya blong Benjamin oli kamaot longwe long taon ya blong kam long open ples ya long rod.

33-34Olgeta oli stap giaman blong ronwe go kasem ples ya Baltamara, nao long ples ya, oli kam wanples, oli tanemraon bakegen, oli stanap rere blong faet. Be long taem ya, ol ten taosen man ya blong olgeta we oli stap haedrere long ol ston raonabaot long Gibea oli kamaot wantaem, oli go insaed long taon ya, oli mekem faet long olgeta we oli stap long ples ya, mo faet ya i strong we i strong. Be ol laen ya blong Benjamin we oli stap long open ples longwe, oli no save we bambae oli lus olgeta.

35Nao Hae God i mekem we ol narafala laen ya blong Isrel oli winimgud ol laen ya blong Benjamin, mo long dei ya, oli kilim twanti faef taosen wan handred soldia blong olgeta oli ded.

36Nao ol laen ya blong Benjamin oli luksave we oli lus finis.

Ol narafala laen blong Isrel oli win long faet

Long taem ya, bighaf blong ol narafala laen* blong Isrel* ya oli giaman blong ronwe long ol laen blong Benjamin,* from we oli save we haf ya blong olgeta we oli stap haed klosap long taon ya Gibea bambae oli mekem wan samting.

37-39Fastaem, taem olgeta oli no seraot yet, oli bin mekem wan plan, se taem haf blong olgeta ya we oli stap haed oli go holem taon ya, bambae oli mas bonem, nao sipos olgeta ya we oli stap giaman blong ronwe oli luk smok i go antap, bambae oli tanemraon bakegen, oli kam kilim ol laen blong Benjamin oli ded. Nao olgeta ya we oli stap haed, oli girap, oli resis i go insaed long taon ya, nao oli go olbaot, oli kilim olgeta man long ples ya oli ded, mo oli bonem taon ya.

Nao long taem we smok i no go antap yet, ol laen blong Benjamin ya oli kilim samwe long toti man blong ol narafala laen ya finis oli ded, mo oli stap taltalem long olgeta se, “!Naoia yumi winim olgeta bakegen, olsem we yumi mekem fastaem!”

40Be taem bigfala smok i kamaot long taon ya i go antap, olgeta ya oli lukluk i go biaen, mo oli sek we faea i stap kakae taon ya blong olgeta.

41Nao olgeta ya we oli stap giaman blong ronwe oli tanemraon bakegen, oli mekem we ol laen ya blong Benjamin oli lusum hed, oli no moa save wanem samting blong mekem, from we oli luksave se bambae oli ded evriwan.

42-43Ale, oli resis i go long open ples blong traem ronwe long ol narafala laen ya, be oli no save haed long olgeta. Oli sek we oli stap stret long medel blong tufala kampani blong olgeta. Long fored, i gat bighaf ya blong olgeta we oli stap giaman blong ronwe, mo biaen, i gat narafala haf ya we oli stap kamaot long taon ya bakegen. Ol narafala laen ya oli blokemgud olgeta, olsem we oli stap long wan trap nomo, nao oli gohed, oli stap kilim olgeta. Nao haf blong olgeta oli traem ronwe, be ol narafala laen ya oli biaen long olgeta, mo oli stap kilim olgeta go kasem samwe long narasaed taon ya saed i go long is.

44Long taem ya, oli kilim eitin taosen laen blong Benjamin oli ded,

45be i gat sam long olgeta we oli tanem i go long not, oli resis blong go long bigfala open ples ya, blong go haed long bigfala klif ya Rimon, we i ston nomo mo i gat ol hol olbaot long hem. Be ol narafala laen ya oli stap biaen long olgeta, mo oli kilim faef taosen man blong olgeta oli ded long rod. Mo oli gohed, oli stap ronem samfala i go kasem ples ya Gidom, mo long ples ya, oli kilim tu taosen man bakegen oli ded.

46Namba blong ol laen blong Benjamin we oli ded long dei ya i kasem twanti faef taosen, mo olgeta evriwan oli nambawan man blong faet.

47Nao long taem ya, i gat sikis handred laen blong Benjamin we oli ronwe, oli go haed long draeples, long bigfala klif ya Rimon, mo oli stap fo manis long ples ya.

48Be ol laen blong Benjamin we oli stap long ol narafala taon blong olgeta, ol narafala laen ya blong Isrel oli kambak, oli kilim olgeta evriwan oli ded, we i no gat wan i stap. Oli kilim ol man, mo ol woman, mo ol pikinini, wetem ol anamol blong olgeta oli ded evriwan. Mo ol taon blong olgeta we oli stap olbaot long ples ya, oli bonem olgeta evriwan.