Job 13 - Bislama Bible Revised 2012

1-2“Trifala.

!Mi mi no wan wokboe blong yufala!

Ol samting ya

we yufala i stap talem,

mi mi harem olgeta bifo finis,

mi save olgeta evriwan.

Mi save evri samting we yufala i save.

3Be mi no wantem toktok

wetem yufala,

mi wantem toktok wetem God.

Mi wantem blong hem i stretem trabol blong mi.

4Yufala i no gat hed,

mo yufala i stap sakem ol giaman toktok

blong haedem samting ya.

Yufala i olsem rabis dokta,

we i no save mekem sikman i gud bakegen.

5Sipos yufala i satem maot blong yufala,

maet ol man oli save talem

se yufala i waes.

6“Mi wantem talemaot ol poen blong mi.

Plis yufala i lesin.

7?From wanem yufala i stap giaman?

Ol giaman toktok ya

i no save leftemap nem blong God.

8?Olsem wanem?

?Yufala i ting se fasin ya i save givhan long hem?

Yufala i no save go giaman olsem insaed long kot

blong tok long saed blong hem.

9Sipos God i luklukgud long yufala,

bambae hem i no save faenem

wan gudfala samting nating.

Yufala i no save giaman long hem,

olsem we yufala i stap giaman long man.

10Yufala i jajem trabol blong mi finis.

!Yufala i no save haedem!

Be mi mi savegud

se hem bambae i faerap long yufala yet ya.

11Mo paoa blong hem

bambae i mekem yufala i fraet we i fraet.

12Ol waestok ya blong yufala i rabis,

i olsem asis nomo.

Ol strong tok blong yufala i olsem graonpot,

i no strong nating.

13“!Yufala i stap kwaet!

Yufala i letem mi mi tok fastaem.

Bambae yumi luk wanem samting i kamtru,

i kasem mi.

14Mi mi rere nomo

blong letem laef blong mi.

15Nating sipos God i kilim mi mi ded,

be tingting blong mi

bambae i stap strong long hem nomo.

Bambae mi save talemaot

ol poen blong mi long fes blong hem.

16Maet fasin ya we mi no save fraet

i save sevem mi,

from we i no gat wan man nogud

i rere blong go stanap long fes blong hem olsem.

17Plis yufala i lesin gud

long ol tok blong mi.

18Mi mi rere

blong talemaot ol poen blong mi,

from we mi save

se God bambae i talemaot

se mi mi stret nomo.”

Job i prea long God

19Nao Job i prea, i talem se,

“God. ?Olsem wanem?

?Yu yu kam blong talemaot ol poen

we yu faenem long mi?

Sipos i olsem,

mi mi rere blong stap kwaet,

gogo mi ded.

20Mi wantem askem tu samting long yu.

Sipos yu save letem tufala long mi,

bambae mi no save traem ronwe

long fes blong yu.

21Plis yu no moa panisim mi,

mo yu tekemaot ol samting ya

we i blong mekem mi mi fraet.

22“God, i gud yu yu tok fastaem,

nao bambae mi mi save givim ansa.

Sipos yu no wantem olsem,

bambae mi mi tok fastaem,

mo yu yu save givim ansa.

23I gud yu talemaot ol sin blong mi.

I gud yu soemaot ol fasin nogud

we mi mi mekem.

?Yu luk se mi mi brekem wanem loa?

24?From wanem yu tanem baksaed long mi?

?From wanem yu stap luk mi

olsem wan enemi blong yu?

25Oltaem yu stap mekem mi mi fraet tumas,

be mi mi olsem lif nomo,

we win i save karem i go.

Yu stap kam mekem faet long mi,

be mi mi olsem drae gras nomo,

we i no strong nating.

26“Panis we yu stap givim long mi

i strong tumas,

mo yu stap panisim mi

from ol samting ya we mi mekem

taem we mi mi yangfala yet.

27 Job 33.11 Yu fasem leg blong mi long jen,

yu stap wajem mi oltaem nomo

long weples mi mi go,

mo yu stap folem trak blong mi

blong save weples mi pas long hem.

28Be fasin ya i mekem mi

mi kam olsem pis wud

we i roten finis,

no mi kam olsem olfala klos

we kakros i stap kakae.