Jeremaea 2 - Bislama Bible Revised 2012

Hae God i stap lukaot gud long ol laen blong Isrel

1Nao Profet Jeremaea i talemaot we Hae God i talem long hem se,

2“Jeremaea. Yu go talemaot ol tok blong mi long olgeta evriwan long Jerusalem.* Yu talem long olgeta we mi mi talem se,

‘Ol laen* blong Isrel.*

Mi mi stap tingbaot taem ya yet

we neson blong yufala i jes kam antap.

Long taem ya, tingting blong yufala

i stap strong long mi,

mo yufala i lavem mi tumas,

olsem woman we i jes mared

i lavem man blong hem.

Long taem ya,

yufala i stap biaen long mi,

yumi pastru long draeples,

we man i no save planem kakae long hem.

3Long taem ya, yufala i tabu,

yufala i man blong mi nomo,

yufala i olsem ol fas kakae

we man i givim i kam long mi.

Taem ol man oli spolem yufala,

be mi mi mekem we trabol i kasem olgeta,

oli harem nogud.

Mi mi Hae God, mo hemia tok blong mi.’ ”

Ol sin blong ol bubu blong olgeta

4Mo Profet Jeremaea i gohed, i talem se,

“Olgeta.

Yumi ya, yumi ol laen* blong Isrel.*

Yufala i mas lesin

long tok blong Hae God.

5Hem i talem se, ‘?Weswe?

?Wanem samting nogud we mi mi mekem,

we i mekem ol bubu blong yufala bifo

oli gowe long mi?

Olgeta nomo oli go mekem wosip

long ol rabis god,

nao oli kam rabis olsem ol god ya.

6Mi mi tekemaot olgeta long Ijip,

mo mi lidim olgeta

oli gotru long draeples,

we i sanbij nating nomo,

i fulap long ol bigbigfala hol.

Ples ya i no gat wota long hem nating,

mo i tudak olgeta,

i no gat man long hem,

mo neva man i pas long hem tu.

Mo nating we mi mi sevem olgeta olsem,

be oli no tingbaot mi nating.

7Mi mi tekem olgeta i kam long graon ya

we i gudfala tumas,

blong bambae oli save harem gud

long ol gudgudfala kakae ya

we i stap gru long hem,

mo long ol nara gudgudfala samting blong hem.

Be oli girap,

oli spolem kantri ya blong mi,

we mi mi givim long olgeta,

oli mekem i kam doti long fes blong mi.

8Long taem ya,

ol pris blong mi, neva oli askem se,

“?Hae God i stap wea?”

Olgeta ya oli stap tijim ol man

long Loa blong mi,

be oli no save mi.

Ol haeman oli girap,

oli agens long mi,

mo ol profet blong mi oli stap tok

long nem blong god ya Bal,*

mo oli stap mekem wosip

long ol giaman god,

we oli no save givhan long man nating.’ ”

Ol poen we Hae God i gat agens long ol man blong hem

9Bakegen, Profet Jeremaea i talemaot we Hae God i talem se,

“Yufala i kamaot biaen long olgeta ya,

mo from samting ya,

mi mi mas talemaot ol poen bakegen

we mi mi agensem yufala from.

Mi mas talemaot ol samting

we yufala i mekem agens long mi.

10Yufala i traem go long wes

long aelan ya Saepras,

yufala i traem luk.

Yufala i traem sanem wan man i go long is

long kantri ya Kedara,

blong traem luksave.

Bambae yufala i save faenemaot,

we neva bifo i gat wan samting i hapen olsem.

11I no gat wan kantri nating,

we ol man blong hem oli save jenisim

ol god blong olgeta,

nating we ol god ya oli no tru,

be oli no save lego olgeta nating.

Yufala i man blong mi,

mo ol man oli stap ona long yufala

from we yufala i ona long mi,

be yufala i girap, yufala i lego mi,

nao yufala i biaen long ol narafala god ya,

we oli no save givhan long yufala nating.

12Nao from samting ya,

mi mi talem long skae,

blong i fraet nogud, i seksek from,

mo i sapraes we i sapraes tumas,

long ol fasin ya blong yufala.

13I gat tu sin

we yufala i foldaon long hem.

Faswan,

yufala i gowe long mi,

we mi mi olsem wan springwota,

we i save givim laef,

mo sekenwan,

yufala i biaen long ol narafala god,

we fasin ya i olsem tang we yufala i wokem

be i brok, i no save holem wota.”

Panis we olgeta bambae i kasem

14Bakegen, Profet Jeremaea i talemaot we Hae God i talem se,

“Yufala ol man blong mi, yufala i no slef.*

Yufala i no pikinini blong man we i wok slef.*

?From wanem ol enemi blong yufala

oli stap ronem yufala

blong holem yufala?

15Ol enemi ya oli stap singaot long yufala,

olsem ol laeon we oli hanggri

oli wantem kakae.

Oli spolemgud kantri blong yufala,

we i no moa gat wan gudfala samting

i stap long hem.

Mo ol taon blong yufala,

olgeta oli spolemgud,

mo oli livim olgeta i stap,

we i no gat wan man nating i stap long olgeta.

16Ol man Memfis mo ol man Tafanes

oli kam spolemgud yufala,

olsem we oli brebrekem hed blong yufala.

17Ol man blong mi.

Mi mi Hae God, mi God blong yufala,

be taem mi stap lidim yufala,

yufala i girap, yufala i gowe long mi.

Yufala nomo i mekem

trabol ya i kam kasem yufala.

18?From wanem yufala i stap go long Ijip

blong folem ol fasin blong olgeta?

?From wanem yufala i stap go long Asiria

blong folem ol fasin blong olgeta?

?Yufala i ting se bambae yufala i save winim wan samting?

19Ol rabis fasin blong yufala nomo

bambae i kakae yufala bakegen,

mo fasin ya we yufala i gowe long mi,

bambae i jajem yufala.

Bambae yufala i faenemaot

we fasin ya we yufala i no moa ona long mi,

yufala i lego mi,

hem i nogud we i nogud,

mo bambae i mekem

yufala i harem nogud tumas.

Mi mi Hae God,

mi Masta* blong yufala,

mo mi gat olgeta paoa,

mo hemia tok blong mi.”

Olgeta oli no wantem mekem wosip long Hae God

20Bakegen Profet Jeremaea i talemaot we Hae God, Masta* blong yumi i talem se,

“Ol man blong mi.

Bifo olgeta,

yufala i tanem baksaed long mi,

yufala i no wantem nating

blong obei long mi,

mo yufala i no wantem mekem wosip long mi.

Be oltaem,

yufala i stap mekem wosip

long ol narafala god,

antap long ol hil we i hae,

mo aninit long ol tri we i gat gudfala sed.

21Bifo, mi mi putum

yufala i stap gud long ples ya,

mo yufala i olsem wan gudfala rop ya grep,*

we i kamaot long wan stamba we i beswan.

Be naoia, fasin blong yufala

i kam nogud we i nogud olgeta,

i olsem wael grep

we kakae blong hem i konkon nomo.

22Sin blong yufala i no save kamaot,

hem i stap olwe,

olsem doti we i stap long waet kaliko.

Nating we yufala i traehad blong tekemaot,

olsem we yufala i yusum

sop we i beswan blong wasemaot,

be oltaem nomo,

mi stap luk mak ya yet.

23?Weswe yufala i stap talem

se neva yufala i mekem wosip long god ya Bal,*

nao yufala i no doti long fes blong mi?

Yufala i traem tingbaot fasin nogud ya

we oltaem yufala i stap mekem

long krik ya Hinom,

mo yufala i luklukgud long ol sin ya

we yufala i stap mekem.

Fasin blong yufala i olsem woman kamel,

we i stap resis i go olbaot

blong lukaot man kamel.

24Fasin blong yufala

i olsem wael dongki blong draeples.

Sipos stret taem blong hem i kam,

we hem i wantem man dongki,

hem i mas traehad

blong kasem smel blong hem

blong faenem hem,

mo man i no save blokem hem.

Mo sipos man dongki i wantem hem,

bambae i no save traehad blong lukaot hem.

Oltaem nomo,

woman dongki olsem i stap rere

long stret taem blong hem.

25Yufala i no ron biaen long ol narafala god ya

gogo leg blong yufala i kam nogud from,

mo yufala i no letem

trot blong yufala i kam drae from.

Be yufala i stap talem se,

‘Mifala i no save kambak,

from we mifala i laekem tumas

ol god ya blong ol narafala ples.

Mifala i mas biaen long olgeta.’ ”

I stret blong olgeta oli kasem panis

26Bakegen Profet Jeremaea i talemaot we Hae God i talem se, “Ol laen* blong Isrel.* Bambae yufala evriwan i sem, olsem we wan man blong stil i sem long taem ya we oli faenemaot hem. Yufala, wetem ol king blong yufala, mo ol haeman blong yufala, mo ol pris blong yufala, mo ol profet blong yufala, yufala evriwan bambae i sem we i sem,

27from we yufala i stap talem se, ‘Tri, hem i papa blong mifala, mo ston, hem i mama blong mifala.’ Samting ya bambae i kasem yufala, from we yufala i gowe long mi, mo yufala i no tingting blong kambak long mi bakegen. Be taem yufala i kasem trabol, yufala i girap, yufala i askem long mi blong mi kam sevem yufala.

28?Be wehem ol god ya blong yufala we yufala nomo i wokem? Sipos yufala i ting se oli save sevem yufala long taem blong trabol, i gud yufala i go luk olgeta. Long Juda,* ol god blong yufala oli plante we plante, olsem ol taon blong yufala.

29“?From wanem yufala i stap tok agens long mi? Yufala evriwan i girap, yufala i tanem baksaed long mi.

30Taem mi mi panisim yufala, be yufala i no jenisim fasin blong yufala nating, mo yufala i no wantem nating blong mi mi stretem yufala. Yufala i girap, yufala i stap kilim ol profet blong yufala long naef blong faet, olsem laeon we i hanggri we i hanggri, i stap terem mit blong hem.

31Yufala i mas lesin gud long ol tok blong mi. Yufala i traem tingbaot. ?I gat wan taem we mi mi kam olsem draeples long yufala, no we mi kam olsem ples we i tudak we i tudak olgeta, we mi no givhan long yufala nating? ?From wanem yufala i stap talem se bambae yufala i gohed long fasin blong yufala nomo, olsem we yufala i wantem? ?Mo from wanem yufala no wantem blong kambak long mi bakegen?

32Fasin blong gel, oltaem nomo, hem i stap putum ol gudgudfala samting blong flasem hem, mo taem hem i rere blong mared, hem i no save fogetem klos blong mared blong hem. Be yufala i fogetem mi plante taem, i no gat man i save kaontem.

33Yufala i waes gud long fasin blong ronem woman, mo nating we woman we i waes gud long ol fasin nogud olsem, be hem i save lan yet long yufala.

34Ol puaman mo ol stret man we yufala i kilim olgeta, blad blong olgeta i stap long klos blong yufala yet. Blad ya i no blad blong man we i brekem haos blong i stil, i blad blong olgeta ya nomo.

Be nating we yufala i stap mekem ol fasin ya,

35yufala i stap gohed blong talem se, ‘Yumi ol stret man ya. Hae God i no save kros long yumi.’ Be mi bambae mi panisim yufala from we yufala i stap giaman, yufala i talem se yufala i no gat sin.

36?From wanem yufala i no tinghevi nating long fasin blong wosip blong yufala, nao yufala i stap jamjam olbaot? Oltaem yufala i stap biaen long ol narafala god. Bambae ol man Ijip oli mekem yufala i harem nogud, olsem we bifo, ol man Asiria oli mekem yufala i harem nogud.

37Yufala i stap trastem ol man Ijip ya, be mi mi agensem olgeta finis, mo from samting ya, bambae yufala i lego olgeta we yufala i sem tumas. Bambae yufala i no save kasem wan samting nating long olgeta.”