Sam 80 - Bislama Bible Revised 2012

Man i prea blong God i mekem ples i kam gud bakegen(Sing ya, wan laen blong Asaf i wokem.)(Tok i go long God.)

1-2 Eks 25.22 God.

Mifala i laen* blong Isrel,*

mo oltaem yu stap lukaot gud long mifala,

yu stap lidim mifala,

olsem we man i stap lukaot gud long ol sipsip blong hem.

Yu yu stap sidaon long ples blong yu

antap long tufala jerubim* ya,

yu stap rul.

Plis yu lesin long mifala.

Mifala ol laen blong Efrem,*

wetem ol laen blong Benjamin,*

mo ol laen blong Manase.*

Plis yu soemaot laet blong yu long mifala,

mo yu soemaot long mifala evriwan,

we yu yu gat paoa.

Plis yu kam, yu sevem mifala.

3God,

plis yu soemaot long mifala

we yu yu gat sore long mifala.

Plis yu tekem mifala i kambak long yu,

nao bambae mifala i save stap gud.

4Hae God, yu yu God blong mifala,

mo yu yu gat olgeta paoa.

Mifala i stap prea long yu.

?Bambae yu stap kros long mifala

gogo kasem wetaem?

5Yu yu mekem mifala i stap harem nogud,

we mifala i stap krae tumas.

Fasin ya i olsem kakae mo wota blong mifala,

we evri dei nomo mifala i stap kasem.

6Yu stap letem ol man blong ol narafala kantri ya

we oli stap raonabaot long mifala

oli stap faet from ples blong mifala.

Ol enemi ya blong mifala

oli stap sakem ol rabis tok long mifala.

7God, yu yu gat olgeta paoa.

Plis yu soemaot long mifala

we yu yu gat sore long mifala.

Plis yu tekem mifala i kambak long yu,

nao bambae mifala i save stap gud.

8Mifala i olsem rop ya grep*

we yu tekem i kamaot long Ijip,

mo yu ronemaot olgeta narafala man,

nao yu planem long ples blong olgeta.

9Yu yu klinimgud ples blong hem blong i gru gud,

mo ol rus blong hem oli godaon olgeta,

nao hem i gru i kam bigwan,

i kavremap olgeta ples ya.

10Sado blong hem i kavremap ol hil,

mo ol han blong hem oli go kavremap

ol longlongfala tri ya sida* long Lebanon.

11Hem i kam bigwan we i bigwan,

nao ol han blong hem

oli go kasem Mediterenian Si,

mo long narasaed,

oli go kasem Yufretes Reva.

12!Rop ya mifala ya!

?From wanem yu brekemdaon fenis ya

we i goraon long hem?

Naoia ol man we oli stap pas klosap long hem

oli stap stilim ol frut blong hem.

13Ol wael pig oli stap purumbut long hem,

mo ol wael anamol oli stap kakae.

14God, yu yu gat olgeta paoa.

Plis yu tanem yu,

yu lukluk i kam long mifala.

Yu yu stap long heven,

yu lukluk i kamdaon long mifala.

Mifala i man blong yu,

plis yu kam, yu sevem mifala.

15Yang rop ya we yu yu bin planem,

mo yu bin mekem i kam bigwan,

plis yu kam, yu sevem hem.

16Ol enemi oli putum faea long hem finis,

mo oli stap katemdaon.

Plis yu girap,

yu faerap long olgeta,

yu spolem olgeta.

17Yu yu bin jusumaot mifala,

plis yu lukaot long mifala.

Yu yu bin mekem mifala i strong,

plis yu sevem mifala.

18Bambae mifala i no save gowe long yu samtaem.

Plis yu holem mifala i stap laef,

nao bambae mifala i stap talemaot

we mifala i man blong yu.

19Hae God, yu yu God blong mifala

mo yu yu gat olgeta paoa.

Plis yu soemaot long mifala

we yu yu gat sore long mifala.

Plis yu tekem mifala i kambak long yu,

nao bambae mifala i save stap gud.