Ol Proveb 29 - Bislama Bible Revised 2012

1Sipos yu stap mekemhed, mo ol man oli stap tok long yu blong stretem yu, be yu stap kam stronghed moa, wan dei, trabol bambae i kam flatemgud yu, we neva bambae yu save kam gud bakegen.

2Sipos man we fasin blong hem i stret i kam lida, bambae ol man blong hem oli save harem gud. Be sipos man we fasin blong hem i no stret i kam lida, ol man blong hem bambae oli stap harem nogud nomo.

3Sipos yu wantem tumas blong kam waes, papa blong yu bambae i glad tumas long yu. Be sipos yu stap spolem ol mane blong yu blong ronem woman blong rod, hemia i krangke stret.

4Sipos king i strong blong mekem ol stret fasin, laef blong kantri blong hem bambae i stap strong. Be sipos hem i strong blong kasem mane nomo, laef blong kantri blong hem bambae i kam nogud.

5Sipos yu stap tok swit oltaem long ol fren blong yu, hemia i olsem we yu stap wokem wan trap blong kasem yu nomo.

6Sin blong ol man nogud i stap holemtaet olgeta olsem wan trap, be ol stret man oli fri, mo oltaem oli stap harem gud.

7Man we i stret, hem i luksave we ol puaman oli gat ol raet blong olgeta, be man we i no stret, hem i no save tingbaot ol samting ya nating.

8Man we i no kea long narafala man, hem i save mekem olgeta man blong taon oli kros tumas, oli stap raorao, be man we i waes, hem i save mekem evri samting i stap kwaet.

9Sipos man we i gat hed i gat poen agens long wan man we i no gat hed, nao i tekem hem i go long kot, bambae man ya we i no gat hed i save faerap long hem, mo i save laf nomo long hem.

10Ol man blong kilim man i ded oli no wantem nating ol man we fasin blong olgeta i stret, be ol stret man oli stap blokemgud laef blong ol man olsem, oli stap lukaot gud long olgeta.

11Man we i no gat hed, hem i save soemaot long fes blong ol man we hem i kros, be man we i gat hed, tingting blong hem i longfala, mo hem i save holem kros blong hem.

12Sipos wan haeman long gavman i stap lesin long ol giaman toktok, bambae ol man we oli stap wok aninit long hem oli man blong giaman nomo.

13Hae God i givim ae long olgeta man blong oli save lukluk. Nating we puaman no man we i stap spolem hem, be tufala evriwan i gat ae.

14Sipos wan king i stap givhan long ol puaman blong ol man oli mekem i stret long olgeta, bambae hem i save rul longtaem.

15Fasin ya we man i stap wipim pikinini blong hem, mo i stap tok long hem blong stretem hem, hem i save mekem pikinini i waes. Be pikinini we papa blong hem i no stretem hem, i letem hem i stap mekemhed, mo i stap folem tingting blong hem nomo, hem bambae i mekem papa mo mama blong hem, tufala i sem bigwan.

16Sipos man we fasin blong hem i no stret i kam lida, bambae ol rabis fasin i stap kam strong moa, be ol stret man bambae oli save stap gogo oli luk paoa blong hem i finis.

17Sipos yu stap tijimgud pikinini blong yu blong stretem hem, bambae yu yu stap long gudfala laef, mo oltaem nomo bambae hem i mekem yu yu glad.

18Taem ol man blong wan kantri oli no gat tok blong Hae God blong lidim olgeta, oli no save folem ol stret fasin. Man we i stap folem ol loa blong Hae God, hem i save harem gud.

19Yu yu no save stretem man blong wok blong yu long tok nomo. Maet hem i haremsave tok blong yu, be bambae i no save obei long hem.

20Man we i no gat hed, hem i moa gud, i winim man we i stap tok kwik be i no tingting gud fastaem.

21Sipos yu stap givim evri samting long man blong wok blong yu, i stat long taem we hem i pikinini, wan dei bambae hem i karemaot olgeta samting we yu yu gat, oli blong hem.

22Man blong kros kwik, oltaem hem i stap faerap mo i statem rao. Oltaem hem i stap mekem sin.

23Sipos yu stap flas, yu stap leftemap yu, mo yu stap tingting nogud long ol narafala man, bambae yu foldaon. Be sipos yu mekem tingting blong yu i stap daon, ol narafala man bambae oli tinghae long yu.

24Man we i go joen wetem man blong stil, hem nomo i pulum bigfala trabol i kam long hem bakegen. Biaen, taem we hem i stanap insaed long kot, sipos hem i talemaot ol samting we hem i mekem, bambae jaj i givim panis long hem, be sipos hem i stap giaman, bambae God i givim panis long hem we i bigwan moa.

25Fasin ya we man i fraet tumas long ol narafala man, hem i olsem trap nomo, mo i nogud yu yu foldaon long hem. Sipos yu stap trastem Hae God, bambae yu save stap gud oltaem.

26Plante man oli wantem tumas blong king i mekem i gud long olgeta, be Hae God nomo i save stretem trabol blong man long stret fasin.

27Ol stret man oli no wantem nating ol man nogud, oli stap agens long olgeta, mo ol man nogud tu oli no wantem nating ol stret man, oli stap agens long olgeta bakegen.