1-2Nao long taem ya we King Asa i stap kambak long Jerusalem,* Spirit blong God i kam long wan man, we nem blong hem Asaria we papa blong hem Oded, i givim paoa long hem. Nao hem i go blong mitim king ya wetem ol man blong hem, mo taem hem i luk olgeta, hem i singaot bigwan long olgeta se, “!King Asa, mo ol man Juda,* mo ol man Benjamin*! !Yufala evriwan i lesin long mi! Sipos yufala i stap obei long Hae God, hem bambae i save stap wetem yufala oltaem nomo. Sipos yufala i stap lukaot hem, bambae hem i save mekem we yufala i faenem hem, be sipos yufala i gowe long hem, bambae hem i lego yufala tu.
3Yumi ya, yumi ol laen* blong Isrel,* mo Hae God i God blong yumi. Hem nomo i tru God, be bifo, ol olfala bubu blong yumi oli stap longtaem we oli no mekem wosip long hem. Olgeta oli no gat pris blong tijim olgeta, mo oli no save ol loa blong God tu.
4Be Hae God i God blong olgeta, mo taem trabol i kam long olgeta, olgeta oli luk long hem. Oli lukaot hem, mo hem i mekem we olgeta oli faenem hem.
5Long taem ya, man i no save wokbaot blong go long narafala ples, we i save kamtru sef nomo, from we i gat ol trabol mo ol fasin we i no stret i stap long evri ples.
6Ol man blong narafala kantri oli stap spolem ol man blong narafala kantri, mo ol man blong narafala taon oli stap spolem ol man blong narafala taon, from we God i stap letem trabol i kam long olgeta, mo i stap mekem olgeta oli harem nogud.
7Be yufala i mas stanap strong, we tingting blong yufala bambae i no foldaon. Ol wok ya we yufala i stap mekem, bambae yufala i kasem pei long hem.”
8Nao taem king i harem tok ya blong Hae God we Asaria i talem, hem i glad tumas, from we tok ya i mekem tingting blong hem i kam strong moa. Nao hem i brekemdaon olgeta aedol olbaot long distrik ya Juda mo long distrik ya Benjamin, mo long ol taon long distrik ya Efrem* long ples blong hil, we hem i bin winim olgeta long faet. Mo hem i wokemgud bakegen olta ya we i stap long yad blong haos* blong Hae God.
9Bifo, plante man oli aot long trifala distrik ya Efrem mo Manase* mo Simeon,* oli kam joen long king ya, nao oli stap wetem hem long kingdom blong hem, from we oli luk we Hae God i stap wetem hem. Nao hem i singaot olgeta ya evriwan, wetem ol man Juda mo ol man Benjamin blong oli kam luk hem,
10mo olgeta oli kam wanples long Jerusalem long namba fiftin yia blong hem we hem i king, long namba tri manis blong yia ya.
11Nao long taem ya, oli tekemaot seven handred buluk mo seven taosen sipsip long ol anamol ya we oli holem long taem blong faet, oli karem i kam, mo oli mekem sakrefaes long olgeta blong mekem wosip long Hae God.
12Nao oli mekem wan promes wetem hem, se bambae oli mekem wosip long hem long olgeta tingting blong olgeta mo long olgeta laef blong olgeta.
13Olgeta oli talem se nating we man no woman, mo nating we yangfala no olfala, be sipos wan long olgeta i no wantem mekem wosip long Hae God, bambae oli mas kilim hem i ded.
14Nao oli mekem wan strong promes bakegen long hem we oli singaot i go antap se, “Hae God, long nem blong yu, mifala i talem se bambae mifala i holem promes ya olwe.” Nao olgeta evriwan oli singaot bigwan mo oli blu trampet.
15Nao olgeta man Juda oli glad tumas, from we oli mekem promes ya wetem Hae God long olgeta tingting blong olgeta. Olgeta oli glad blong lukaot hem, mo oltaem hem i stap mekem we olgeta oli faenem hem, nao i mekem we oli stap gud, oli gat pis long evri ples.
16Nao woman ya Mahaka, we i bubu blong king, hem i bin mekem wan aedol we i nogud we i nogud, i pija blong woman god ya Asera,* we ol man oli stap mekem wosip long hem blong oli gat plante pikinini. Nao from samting ya, king i putumaot woman ya i no moa karem nem ya se “Mama blong king”, mo i katemdaon pija blong woman god ya, i brebrekem long ol smosmol pis, mo i go bonem long open ples klosap long Kidron Reva.
17I tru we king ya i no brekemdaon olgeta ples blong mekem wosip long ol narafala god, be hem i stap ona long Hae God oltaem long laef blong hem.
18Mo hem i tekem olgeta samting we oli wokem long gol mo long silva we hem i givim finis long Hae God, wetem ol samting we papa blong hem King Abia i bin givim bifo, i putum olgeta oli stap long haos blong Hae God.
19Nao long taem ya, i no moa gat faet long kantri ya, gogo kasem namba toti faef yia blong hem we hem i king.
Who We AreWhat We EelieveWhat We Do
2025 by iamachristian.org,Inc All rights reserved.
