1 Samuel 31 - Bislama Bible Revised 2012

King Sol mo ol pikinini blong hem oli ded(1 Kronikel 10.1-12)

1Nao ol man Filistia oli kam mekem faet long ol laen* blong Isrel* long hil ya Gilboa, nao oli kilim plante long olgeta oli ded, mo ol narawan oli ronronwe.

2Be ol man Filistia oli ronem King Sol wetem ol pikinini blong hem gogo oli kasem olgeta, nao oli kilim tri pikinini blong hem oli ded. Nem blong trifala ya, i gat Jonatan, mo Abinadab mo Malkisua.

3Nao faet i kam strong tumas long ples ya we king i stap long hem. Ol ara blong ol enemi oli stap kasem hem, mo hem i karekil we i nogud olgeta.

4Nao hem i talem long yang man ya we i stap karem ol samting blong faet blong hem se, “Yu pulumaot naef blong faet blong yu, yu stikim mi mi ded. Ol man Filistia ya oli hiten man. I nogud bambae oli stap tok flas blong jikim mi from we oli winim mi, nao oli kilim mi.” Be yangfala ya i fraet tumas, i no save mekem samting ya. Nao king i pulumaot naef blong faet blong hem, i holem, i foldaon antap long hem, i stikim hem i ded.

5Mo taem yangfala ya i luk we king i ded, hem tu i pulumaot naef blong hem, i foldaon antap long hem, nao naef ya i stikim hem i ded wetem hem.

6Long fasin ya, King Sol wetem trifala pikinini ya blong hem, mo yangfala ya we i stap karem ol samting blong faet blong hem, mo ol man blong hem oli ded evriwan long sem dei nomo.

7Nao long taem ya, ol laen blong Isrel oli stap olbaot long narasaed bigfala levelples ya Jisrehel saed i go long is, mo long narasaed Jodan Reva long is, mo taem oli harem we ol soldia blong olgeta oli ronronwe finis, mo we king wetem trifala pikinini ya blong hem oli ded, olgeta oli no moa tingbaot ol taon blong olgeta, oli girap, oli ronronwe. Nao ol man Filistia oli kam stap long ol taon ya.

8Nao long nekis dei, ol man Filistia oli kam blong tektekemaot olting blong ol man ya we oli ded long faet, mo oli faenem bodi blong king, wetem bodi blong trifala pikinini ya blong hem oli stap long hil ya.

9Nao oli katemaot hed blong king, mo oli tekemaot ol klos blong faet blong hem, oli givim long sam man blong oli karem, oli goraon long olgeta ples long Filistia, oli talemaot nius ya long ol haos blong prea blong ol god blong olgeta, mo long ol man ples blong olgeta.

10Nao oli putum ol samting blong faet blong hem long haos prea blong woman god ya Astate, mo oli nilim bodi blong hem long bigfala stonwol blong taon ya Betsan.

11Be taem ol laen blong Isrel blong taon ya Jabes long Gilead oli harem we ol man Filistia oli wokem fasin ya long king blong olgeta,

12ol strong man blong olgeta we oli no save fraet nating oli wokbaot long naet ya, gogo oli kamtru long Betsan. Nao oli tekemaot bodi blong king ya, wetem bodi blong trifala pikinini ya blong hem, oli karem olgeta i gobak long Jabes, nao oli bonem olgeta long ples ya.

13Nao oli karem ol bun blong olgeta, oli go berem aninit long wan tri, nem blong hem tamaris,* we i stap long taon ya. Nao oli livim kakae, oli no kakae gogo kasem seven dei.