Nehemaea 1 - Bislama Bible Revised 2012

1Buk ya i stori blong Nehemaea, we papa blong hem Hakalia.

Nehemaea i harem wan nius long olgeta long Jerusalem, nao i sore tumas

Nao Nehemaea i talem se, “Long taem ya we King Ataksekses i rul long Pesia, long namba twanti yia blong hem, long manis ya Kislef*, mi mi stap long Babilonia, long bigfala taon ya Susa, we hedkwota blong king i stap long hem.

2Nao Hanani we i wan brata blong mi, wetem sam narafala man, oli aot long Juda*, oli kamtru long ples ya. Mo mi mi askem long olgeta se, ‘Olgeta. ?Ol laen* ya blong yumi we bifo oli stap wok slef* long kantri ya be oli aot, oli gobak long Jerusalem* bakegen, naoia oli stap olsem wanem? ?Mo taon ya Jerusalem, naoia i olsem wanem?’

3“Nao olgeta oli talem long mi se, ‘O, mifala ya we i gobak, mifala i stap trabol tumas yet, mo ol man afsaed oli stap lukluk rabis long mifala. Mo bigfala stonwol blong Jerusalem ya we i brokdaon bifo, i stap olsem nomo yet. Mo ol doa* blong hem we olgeta oli bonem bifo, oli stap olsem nomo kam kasem naoia.’

4Nao taem mi harem tok ya, mi sidaon, mi krae.

Prea blong Nehemaea

“Nao mi mi livim kakae blong mi long tutri dei olsem, mi stap krae from olgeta ya. Mo mi stap prea long God,

5mi talem se, ‘Hae God, yu yu God blong heven. Yu yu hae we yu hae, mo mifala i fraet blong kam klosap long yu. Yu yu tru, mo oltaem yu stap holem promes* ya we yu mekem wetem ol olfala bubu blong mifala bifo. Oltaem, yu stap mekem i gud tumas long olgeta we oli lavem yu, mo we oli stap mekem ol samting we yu yu talem.

6“ ‘Hae God, plis yu lukluk long mi. Long dei mo long naet, mi mi stap prea from mifala ol laen* blong Isrel.* Mifala i man blong wok blong yu. Plis yu harem prea blong mi. Long fes blong yu, mi mi talemaot se mifala i mekem i no stret. Mo i stat long ol olfala bubu blong mifala bifo olgeta, kam kasem tede, mifala evriwan i stap mekem i no stret.

7Mifala i mekem i nogud tumas long yu, mo mifala i no mekem ol samting we yu yu talem. Mifala i no folem ol loa ya blong yu we Moses, man blong wok blong yu bifo i bin givim long mifala.

8Lev 26.33Plis yu no fogetem tok ya we yu talem long hem bifo se, “Moses. Yufala i laen blong Isrel, be sipos yufala i no holemgud ol tok blong mi, bambae mi mi ronemaot yufala i go wanwan long ol narafala kantri.

9Dut 30.1-5Be biaen, sipos yufala i tanem tingting blong yufala, yufala i kambak long mi bakegen, mo yufala i mekem ol samting we mi mi talem long yufala, bambae mi mi tekem yufala i kambak bakegen long ples ya we i stret ples blong mekem wosip long mi. Mi mi jusumaot ples ya, mo i nomata sipos yufala i stap olbaot long evri ples long wol, be bambae mi mi save tekem yufala i kambak long hem, blong yufala i stap mekem wosip long mi.”

10“ ‘Masta*, mifala i man blong wok blong yu, mifala i man blong yu nomo. Long paoa blong yu, mo long strong han blong yu, yu yu sevem mifala finis.

11Plis yu harem prea blong mi wetem ol prea blong ol narafala man blong yu tu, we olgeta oli wantem leftemap nem blong yu. Mo plis yu mekem mi mi win tede, mo yu mekem we king ya bambae i gat sore long mi.’

“Long taem ya, mi mi stued blong king, we wok blong mi i blong lukaot long waen blong hem.”