Sam 108 - Bislama Bible Revised 2012

Prea we man i mekem blong God i givhan long ol man blong hem(Sam 57.7-11; 60.5-12)(Sing ya, Deved i wokem.)(Tok i go long God.)

1God.

!Oltaem tingting blong mi i stap strong long yu!

!Bambae mi sing, mi presem yu!

!Naoia mi mi mas wekap!

2!Gita mo mandolin blong mi,

tufala i mas wekap!

!Bambae mi wekemap san ya!

3Hae God.

Bambae mi mi talem tangkiu long yu

long fes blong olgeta man,

bambae mi sing blong presem yu

long fes blong ol man blong ol narafala kantri.

4Fasin blong yu

we oltaem yu lavem man

i hae we i hae,

i go bitim skae antap.

Fasin blong yu

we oltaem yu stap holem ol promes blong yu,

hem i hae we i hae,

i go antap i kasem ol klaod.

5God.

Mi mi wantem tumas

blong yu yu soemaot

we yu hae we yu hae

i bitim skae,

mo we bigfala paoa blong yu i kasem olgeta ples long wol.

6Yu yu lavem mifala tumas.

Plis yu sevem mifala

long paoa blong yu,

yu ansa long prea blong mi,

blong mifala i save stap gud.

(Tok i go long ol man.)

7Olgeta.

God i stap long tabu ples blong hem,

i talem se, “Bambae mi mi win,

nao mi seraot ples ya Sekem

i go long ol man blong mi,

mo bambae mi makemaot ol haf

blong bigfala levelples ya Sukot i go long olgeta.

8Ples ya Gilead i blong mi

mo ples ya Manase* tu i blong mi.

Ples ya Efrem* i olsem hat blong faet blong mi,

mo ples ya Juda* i olsem wokingstik blong mi

we mi mi King.

9Be bambae mi yusum kantri ya Moab

olsem besin blong wasem fes blong mi,

mo bambae mi sakem sus blong mi

i go stap long kantri ya Edom olsem saen we ples ya i blong mi.

Bambae mi mi winim ol man Filistia,

nao bambae mi singsingaot from.”

(Tok i go long God.)

10God.

?Hu nao bambae i lidim mifala

i go long kantri ya Edom?

?Hu nao bambae i tekem mifala i go insaed

long taon ya blong olgeta

we i strong tumas?

11?Olsem wanem?

?I tru we yu yu lego mifala finis?

?Bambae yu no moa go

wetem ol soldia blong mifala bakegen long faet?

12Plis yu halpem mifala,

yu agensem ol enemi blong mifala,

from we ol samting

we ol man nomo oli save mekem

blong givhan long mifala

i blong nating nomo.

13God,

sipos yu yu stap wetem mifala,

bambae mifala i win,

from we yu bambae yu winim ol enemi blong mifala.