1Nao Nehemaea i talem se, “Taem we Sanbalat i harem we mifala i stap wokemgud bigfala stonwol ya bakegen, hem i kros we i kros, nao i stap tok nogud long mifala, i stap laf long mifala.
2Long fes blong ol fren blong hem wetem ol soldia blong Sameria* hem i talem se, ‘?Ol laen* blong Isrel* ya oli wantem mekem wanem ya? ?Oli wantem stanemap taon ya bakegen? !Oli no naf blong mekem wan samting! Ating oli ting se sipos oli mekem sakrefaes, bambae oli save finisim ol wok ya long wan dei nomo. Ol ston ya blong fastaem, taem ol enemi blong olgeta oli spolem taon ya bifo, faea i spolem olgeta finis. !Olgeta oli krangke ya! !Oli no save yusum ol ston ya bakegen!’
3“Mo Tobia we i man Amon, hem i stap stanap wetem hem i talem se, ‘Stonwol ya we oli stap wokem i no strong nating. !Smol dog nomo i naf blong brekemdaon!’
4“Nao mi mi prea, mi talem se, ‘God blong mifala. Plis yu harem prea blong mi. Olgeta ya oli stap laf nogud long mifala, oli stap jikim mifala. Plis yu mekem ol tok ya we oli stap sakem i kam long mifala i kasem olgeta bakegen. Plis yu letem we ol narafala man oli kam stilim olting blong olgeta, mo oli tekemaot olgeta oli go wok slef* long wan narafala kantri.
5Mifala i stap wokem stonwol ya blong i gud bakegen, be olgeta ya oli stap tok nogud tumas long mifala mo oli stap spolemgud mifala. Plis yu no fogivim olgeta from ol fasin nogud ya we oli stap mekem. Plis yu no fogetem ol sin blong olgeta.’
6“Nao mifala i stap gohed blong wokem bigfala stonwol ya bakegen. Mo i no longtaem, hae blong stonwol ya i go antap, i kasem stret haf blong mak blong hem, from we ol man oli glad tumas blong wok.
7Mo taem Sanbalat mo Tobia wetem ol man Amon mo ol man Arebia mo ol man Asdod oli harem we mifala i stap wokem bigfala stonwol blong Jerusalem* i gud bakegen, mo mifala i stap blokem ol hol blong hem, olgeta oli kros tumas.
8Nao olgeta oli mekem plan blong joen wanples, blong kam long Jerusalem blong mekem faet long mifala. Oli wantem spolem tingting blong mifala, blong mekem wok i foldaon.
9Be mifala i stap prea long God blong yumi, mo mifala i putum ol gad oli stap gad long dei mo long naet, blong oli save blokem olgeta.
10“Mo long taem blong wok, mifala i stap singsing long wan sing we tok blong hem i talem se,
‘Yumi stap karem ol hevi samting ya,
yumi kam slak finis.
I gat tumas doti blong olfala stonwol ya,
yumi no save karemaot.
?Bigfala stonwol blong Jerusalem ya,
bambae yumi wokem olsem wanem?’
11“Mo ol enemi ya blong mifala oli stap taltalem long olgeta se, ‘Bambae yumi go we oli no save luk yumi, oli no save harem yumi gogo yumi gotru long olgeta. Nao taem oli sek long yumi, be wantaem nomo, bambae yumi gohed, yumi kilim olgeta oli ded, mo long fasin ya, bambae yumi save blokem ol wok blong olgeta.’
12Be evritaem, taem olgeta oli mekem plan blong kam mekem faet long mifala, ol laen blong mifala we oli stap long medel blong olgeta oli stap kam talemaot plan ya blong olgeta long mifala.
13Nao mi givimaot ol naef blong faet mo ol spia mo bonara long ol man blong mi, mo mi mekem plante grup, wan grup long wan laen, wan grup long wan laen. Nao mi sanem ol grup ya wanwan oli go long ol ples we wok blong stonwol ya i no finis yet, nao oli stap haedrere biaen long stonwol.
14“Nao mi luk we sam long mifala oli stap fraet lelebet, mo mi talem long ol lida blong mifala wetem ol haeman blong mifala mo ol narafala man se, ‘!Olgeta! !Yufala i no fraet long ol enemi ya blong yumi! !Masta* blong yumi i gat paoa, mo olgeta man oli fraet long hem! Yufala i mas faet blong blokem olgeta, blong oli no kam spolem ol man blong yumi, wetem ol woman mo ol pikinini blong yumi, mo ol haos blong yumi.’
15“Nao taem ol enemi ya blong mifala oli harem nius we mifala i faenemaot plan blong olgeta, oli save we God i spolem plan ya blong olgeta finis. Nao biaen, mifala evriwan i gobak long wok ya blong wokem stonwol ya bakegen.
16Be i stat long taem ya, mi seraot ol man blong mi long tu grup, we wan grup i stap wok long stonwol ya, mo wan i stap gad. Ol gad ya oli putum ol strong klos blong faet blong olgeta, mo oli holem ol spia mo ol bonara blong olgeta, wetem ol sil* blong olgeta blong blokem ara. Nao ol lida blong mifala oli joen gud, oli stap givhan gud long ol man
17we oli stap wokem stonwol ya. Be olgeta evriwan oli stap holem ol samting blong faet. Olgeta we oli stap karem ol ston i kam, be oli stap wok long wan han nomo, long narafala han oli stap holem samting blong faet.
18Mo olgeta we oli stap wok antap long stonwol oli hangem naef blong faet long strap blong olgeta. Mo man we i karem pupu, hem i stap klosap long mi, nao sipos ol enemi oli kam blong faet, hem i save singaot ol man oli kam.
19Nao mi talem long ol lida blong mifala, wetem ol haeman blong mifala mo ol narafala man se, ‘Wok ya i no stap long wan ples nomo, mo sam long yumi oli stap longwe long yumi olbaot long stonwol ya.
20Sipos yufala i harem pupu i krae, yufala i mas resis i kam long mi. God blong yumi bambae i faet long saed blong yumi.’
21“Nao evri dei, i stat long taem we i jes brok delaet nomo, oltaem wan grup blong mifala i stap wokem stonwol, mo wan grup i stap holem spia, i stap gad, gogo kasem tudak we mifala i no moa save luk wan samting.
22“Mo long taem ya, mi mi blokem ol lida blong mifala, wetem ol man blong wok, se oli mas stap nomo long Jerusalem, blong i gat ol man i stap blong wokem stonwol ya long dei, mo blong gad long taon ya long naet.
23Nao long dei mo long naet, mi mi no tekemaot klos blong mi nating blong putum klos blong slip. Mi wetem ol fren blong mi, mo ol man blong wok blong mi, mo ol bodigad blong mi, mifala evriwan i mekem olsem, mo oltaem mifala i stap holem ol samting blong faet i stap rere.”
Who We AreWhat We EelieveWhat We Do
2025 by iamachristian.org,Inc All rights reserved.
