1Nao Deved i stap tingting hem wan se, “Samtaem, King Sol bambae i kilim mi yet ya. I moa gud mi ronwe, mi go stap long Filistia. Sipos mi mi stap longwe, bambae hem i save lego fasin ya blong hem, i no moa lukaot mi bakegen long Isrel,* nao bambae mi save stap gud nomo.”
2-3Nao hem i tekem tufala woman blong hem, Ahinoam we i woman Jisrehel, mo Abigel, woman Kamel we i wido blong Nabal, mo ol sikis handred man ya blong hem wetem ol woman mo ol pikinini blong olgeta, nao oli girap, oli go stap long taon ya Gat wetem king blong ples ya, King Akis we papa blong hem Maok.
4Mo taem King Sol i harem we hem i ronwe finis, i go stap long taon ya Gat, hem i lego, i no moa traem bakegen blong lukaot hem.
5Nao Deved i talem long King Akis se, “King, sipos yu yu fren blong mi, plis yu letem wan smol vilej long mi, blong mi go stap long hem. I no stret blong mi stap wetem yu long taon ya blong yu.”
6Nao king ya i letem vilej ya Jiklag long hem. Mo from samting ya, i stat long taem ya, vilej ya Jiklag i kam vilej blong ol king blong kantri ya Juda,* mo i stap olsem kam kasem tede.
7Nao Deved i stap long ples ya wan yia fo manis.
8Long taem ya we hem i stap long ples ya, hem wetem ol man blong hem oli stap mekem faet long ol man Gesuru, mo long ol man Girisi, mo long ol man Amalek. Olgeta ya oli stap klosap long kantri ya Filistia, saed i go long saot, mo oli stap longtaem finis long ples ya, be hem i stap mekem faet long ol ples blong olgeta, i go kasem Suru, mo i go olwe kasem Ijip.
9Hem i stap kilim olgeta man mo woman blong olgeta, mo i stap tekem ol sipsip blong olgeta, wetem ol buluk, mo ol dongki, mo ol kamel blong olgeta, mo i stap tekem ol klos blong olgeta tu. Nao oltaem, taem hem i kambak, hem i stap go luk King Akis,
10mo king i stap askem long hem se, “?Tede yu go mekem faet long weples?” Mo hem i stap talem long king se hem i bin go mekem faet long wan long ol ples long distrik ya Juda long saot, no long ples blong ol laen* blong Jeramehel, no long ples blong ol laen blong Ken.
11Oltaem, taem hem i go long wan ples, hem i stap kilim olgeta man mo woman evriwan, blong i no gat wan i save gobak long Gat blong talemaot samting ya we hem wetem ol man blong hem oli stap mekem. Mo long taem ya we hem i stap long Filistia, be oltaem hem i stap mekem fasin ya.
12Be king i trastem hem, i stap tingting hem wan se, “Deved ya i man Isrel, be ol man ples blong hem oli no wantem hem nating, oli agens long hem. From samting ya, bambae hem i stap wok blong mi oltaem, gogo kasem we hem i ded.”
Who We AreWhat We EelieveWhat We Do
2025 by iamachristian.org,Inc All rights reserved.
