1 2 King 15.7; 2 Kron 26.23 Nao Profet Aesea i talem long ol man blong hem se, “Olgeta. Long yia ya we King Usia i ded, mi mi luk wan vison.* Long vison ya mi luk Hae God we i Masta* blong yumi i stap sidaon long bigfala jea blong hem long wan ples we i hae we i hae, i blong ona, mo longfala klos blong hem i fulumap tabu haos* ya blong hem.
2Raonabaot long hem, i gat ol spesel man we oli blong heven oli stap stanap, we nem blong olgeta, seraf.* Bodi blong olgeta i laet olsem faea, mo olgeta wanwan oli gat sikis wing blong olgeta, we tu i blong blokem fes, mo tu i blong blokem bodi, mo tu i blong flae.
3Rev 4.8Mo oltaem oli stap singsingaot long olgeta, oli stap leftemap nem blong hem, oli talem se,
‘!Hae God,
hem i tabu, we i tabu, we i tabu!
!Hem i gat olgeta paoa!
Olgeta ples long wol oli fulap gud
long bigfala paoa blong hem.’
4 Rev 15.8 Mo taem oli stap singsingaot olsem, tabu haos ya blong hem i seksek go kasem fandesen blong hem daon, mo i kam fulap olgeta long smok.
5“Nao mi mi talem se, ‘!O, mi mi harem nogud tumas! !Mi mi no moa gat rod nao! Ol tok we i stap kamaot long maot blong mi oli fulap long sin nomo, mo mi stap long medel blong ol man we ol tok blong olgeta tu oli fulap long sin, be stret long ae blong mi nomo, mi mi luk King blong mi, we hem i Hae God, mo i gat olgeta paoa.’
6“Nao wan long ol seraf ya i tekem wan stik blong holem faea, i go long olta, i pikimap wan sakol faea we i laet, nao i flae i kam long mi.
7Hem i pusum sakol ya i kam, i tajem maot blong mi long hem, nao i talem se, ‘!Aesea! !Yu luk! Samting ya i tajem maot blong yu, mo Hae God i tekemaot ol sin blong yu finis. Hem i fogivim yu finis from ol fasin nogud blong yu.’
8“Nao mi mi harem Masta ya blong yumi i tok, i talem se, ‘?Bambae mi mi sanem hu? ?Hu bambae i go talemaot tok blong mifala?’
“Nao mi mi talem se, ‘!Mi ya, mi save go! !Yu sanem mi!’
9 Mat 13.14,15; Mak 4.12; Luk 8.10; Jon 12.40; Wok 28.26,27 “Nao hem i talem long mi se, ‘Yu go talemaot long ol man ya we mi mi talem se, “Bambae yufala i harem, harem, harem, be bambae yufala i no save haremsave tok blong mi samtaem. Bambae yufala i luk, luk, luk, be bambae yufala i no save luksave samtaem.” ’
10Mo hem i gohed, i talem long mi se, ‘Yu mas mekem we oli no save luklukgud. Sipos no, bambae oli luksave. Yu mas mekem we oli no save lesin gud. Sipos no, bambae oli haremsave. Yu mas mekem we tingting blong olgeta i kam strong. Sipos no, bambae oli kasem mining blong tok blong yu, mo sipos oli kasem, bambae oli tanem tingting blong olgeta, oli bilif long mi, nao mi bambae mi mekem olgeta oli gud bakegen. Be mi mi no wantem olsem.’ ”
11“Nao mi askem long hem se, ‘?Masta, bambae i stap olsem go kasem wetaem?’
“Mo hem i talem se, ‘Bambae i stap olsem go kasem taem we ol taon ya bambae oli brokdaon olgeta, oli stap nating. Bambae i stap olsem go kasem taem we ol haos ya bambae oli stap nating, i no moa gat man i stap long olgeta. Bambae i stap olsem go kasem taem we kantri ya bambae i no moa gat man i stap long hem, i kam rabis olgeta.
12Bambae mi mi ronemaot ol man ya oli go stap long wan ples we i longwe. Bambae mi mekem olgeta ples long kantri ya oli stap nating nomo.
13Long ples we naoia i gat ten man i stap, sipos i gat wan man nomo i stap long taem ya, be bambae mi flatemdaon hem tu. Bambae hem i stap long ples ya olsem stamba nomo blong wan olfala oktri,* we oli katemdaon longtaem finis. Be olfala oktri ya, hemia ol man blong mi, mo bambae hem i save gru bakegen long stamba ya blong hem we i stap long ples ya.’ ”
Who We AreWhat We EelieveWhat We Do
2025 by iamachristian.org,Inc All rights reserved.
