Namba 7 - Bislama Bible Revised 2012

Ol presen blong ol lida

1Nao Moses i putumap Haos Tapolen ya we ol laen* blong Isrel* bambae oli stap kam long hem blong mit wetem Hae God. Mo taem hem i finisim wok ya, hem i saksakem oel i go long Haos Tapolen ya, wetem olgeta samting we i stap insaed long hem, mo long Olta blong hem wetem olgeta samting we oli stap yusum long hem, blong mekem olgeta oli tabu. Nao hem i prea blong givim olgeta i go long Hae God.

2Nao ol twelef lida ya we oli lida blong ol twelef laen blong olgeta, mo we oli bin givhan long ol wok blong sensas ya bifo,

3olgeta oli tekem ol presen blong olgeta, oli kam givim i go long Hae God. Oli givim sikis kat blong karem ol samting, we tu lida i givim wan, tu lida i givim wan, mo oli givim twelef buluk, we wan lida i givim wan, wan lida i givim wan, nao evri kat ya, tu buluk i pulum wan, tu buluk i pulum wan. Mo taem oli givim ol samting ya i go finis,

4Hae God i talem long Moses se,

5“I gud yu holem ol presen ya, yu yusum long ol wok blong Haos Tapolen blong mi. Bambae yu givim olgeta i go long ol Livaet* blong oli yusum long ol wok blong olgeta.”

6-8Nao hem i givim tu kat wetem fo buluk blong pulum, i go long ol laen blong Geson, mo i givim fo kat wetem eit buluk i go long ol laen blong Merari. Olgeta ya, pris ya Itamara we papa blong hem i hae pris, hem nao i bos blong olgeta.

9Be ol laen blong Kohat, hem i no givim kat mo buluk i go long olgeta, from we olgeta oli man blong lukaot long ol tabu samting, we oltaem oli mas karem long solda blong olgeta nomo.

10Nao long taem ya we Moses i saksakem oel i go long Olta blong Bonem Sakrefaes mo i mekem prea blong givim Olta ya i go long Hae God, ol lida ya oli tekem ol narafala presen tu i kam blong givim i go long Hae God. Mo taem olgeta oli rere blong go putum ol presen ya long fran blong Olta,

11Hae God i givim tok blong hem long Moses blong i go talemaot long ol twelef lida ya. Hem i talem se, “Moses. Bambae yufala i stap mekem wosip go kasem twelef dei, mo i nogud olgeta lida ya evriwan oli kam wantaem blong givim ol presen blong olgeta. Bambae wan i kam wan dei, wan i kam wan dei, gogo olgeta oli givim ol presen blong olgeta i kam long mi, blong mekem Olta ya we yufala i wantem givim i kam long mi i tabu, i blong mi.”

12-83Nao olgeta oli folem fasin ya blong givim ol presen blong olgeta i go long Hae God.

Long fas dei, Nason, we papa blong hem Aminadab, we i lida blong ol laen blong Juda,* hem i tekem ol presen blong olgeta i kam.

Mo long seken dei, Netanel, we papa blong hem Juara, we i lida blong ol laen blong Isakara,* hem i tekem ol presen blong olgeta i kam.

Mo long namba tri dei, Eliab we papa blong hem Helon, we i lida blong ol laen blong Sebulun,* hem i tekem ol presen blong olgeta i kam.

Mo long namba fo dei, Elijuru, we papa blong hem Sedeuru, we i lida blong ol laen blong Ruben,* hem i tekem ol presen blong olgeta i kam.

Mo long namba faef dei, Selumiel, we papa blong hem Jurisadae, we i lida blong ol laen blong Simeon,* hem i tekem ol presen blong olgeta i kam.

Mo long namba sikis dei, Eliasaf, we papa blong hem Dehuel, we i lida blong ol laen blong Gad,* hem i tekem ol presen blong olgeta i kam.

Mo long namba seven dei, Elisama we papa blong hem Amihud, we i lida blong ol laen blong Efrem,* hem i tekem ol presen blong olgeta i kam.

Mo long namba eit dei, Gameliel, we papa blong hem Pedajuru, we i lida blong ol laen blong Manase,* hem i tekem ol presen blong olgeta i kam.

Mo long namba naen dei, Abidan, we papa blong hem Gideoni, we i lida blong ol laen blong Benjamin,* hem i tekem ol presen blong olgeta i kam.

Mo long namba ten dei, Ahiesa, we papa blong hem Amisadae, we i lida blong ol laen blong Dan,* hem i tekem ol presen blong olgeta i kam.

Mo long namba leven dei, Pagiel, we papa blong hem Okran, we i lida blong ol laen blong Asere,* hem i tekem ol presen blong olgeta i kam.

Mo long namba twelef dei, Ahira, we papa blong hem Enan, we i lida blong ol laen blong Naftali,* hem i tekem ol presen blong olgeta i kam.

Ol presen ya blong olgeta we oli tekem i kam i sem mak nomo, mo oli olsem. Ol lida ya wanwan oli givim wan bigfala silva besin we hevi blong hem i kasem wan kilo haf, mo praes blong hem i samwe long sikisti tu taosen faef handred vatu,* mo wan smol silva besin we hevi blong hem i kasem eit handred gram, mo praes blong hem i samwe long toti seven taosen faef handred vatu, we oli skelem olgeta long skel* ya we oli stap yusum long Haos Tapolen blong Hae God. Ol besin ya oli fulap long flaoa we oli tantanem finis wetem olifoel,* we presen ya i blong givim i go long Hae God long saed blong ol kakae blong garen.* Mo ol lida ya wanwan oli givim wan smol besin we oli wokem long gol we hevi blong hem i kasem wan handred twanti gram, we praes blong hem i samwe long seventi faef taosen vatu, we ol besin ya oli fulap long insens.* Mo olgeta wanwan oli givim wan yang bul, mo wan man sipsip, mo wan smol man sipsip we i gat wan yia blong hem. Trifala anamol ya i blong mekem sakrefaes ya we i blong bonem i bon evriwan blong mekem wosip long Hae God. Mo olgeta wanwan oli givim wan man nani blong mekem spesel sakrefaes ya blong tekemaot sin. Mo bakegen, olgeta wanwan oli givim tu bul, wetem faef man sipsip, mo faef man nani, mo faef man sipsip we oli gat wan yia blong olgeta, we olgeta i blong mekem sakrefaes ya we pris i bonem haf, ol man oli kakae haf, blong soemaot we oli stap fren gud wetem Hae God.

84-88Olgeta presen ya evriwan we ol twelef lida ya oli tekem i kam long taem ya i olsem.

I gat twelef bigfala silva besin mo twelef smol silva besin, we hevi blong olgeta evriwan i kasem twanti seven kilo sikis handred.

Mo i gat twelef smol besin we oli wokem long gol, we hevi blong olgeta i kasem wan kilo fo handred foti, mo ol besin ya oli fulap long insens.

Mo i gat twelef bul, mo twelef man sipsip, mo twelef smol man sipsip we oli gat wan yia blong olgeta wetem ol kakae blong garen, we olgeta samting ya i blong mekem sakrefaes ya we i blong bonem i bon evriwan, blong mekem wosip long Hae God.

Mo i gat twelef man nani we oli blong mekem spesel sakrefaes ya blong tekemaot sin.

Mo i gat twanti fo bul, wetem sikisti man sipsip, mo sikisti man nani, mo sikisti smol man sipsip we oli gat wan yia blong olgeta, we olgeta i blong mekem sakrefaes ya we pris i bonem haf, ol man oli kakae haf blong soemaot we oli stap fren gud wetem Hae God.

Hemia nao olgeta samting we ol twelef lida ya oli givim i go long Hae God, long taem ya we Moses i saksakem oel i go long bigfala Olta ya long fran blong Haos Tapolen ya mo i prea blong mekem i tabu, i blong Hae God.

Prapa fasin blong putum ol laet

89Nao taem Moses i go insaed long Haos Tapolen ya blong toktok wetem Hae God, hem i harem we Hae God i stap toktok long hem we voes blong hem i stap kamaot long medel blong tufala jerubim* antap long lid blong Bokis ya we i Saen blong Promes* blong hem.