Hosea 7 - Bislama Bible Revised 2012

1“Ol man Isrel. Yufala i man blong mi, mo mi mi wantem tumas blong mekem yufala i kam gud bakegen, blong laef blong yufala i gohed gud, mo yufala i kam rijman. Be oltaem, taem mi lukluk i kam long yufala, mi stap luk ol sin blong yufala nomo. Oltaem nomo yufala i stap ravravem yufala, mo yufala i stap go insaed long ol haos blong yufala blong stil long yufala. Yufala i stap kilim ol man long klia ples nomo blong stilim olgeta.

2Yufala i no gat tingting nating, yufala i no save nating we mi mi stap luk evri samting we yufala i stap mekem. Taem mi lukluk i kam, mi luk ol sin blong yufala nomo i stap hivap raon long yufala.”

Ol man long haos blong king oli mekem plan agens long hem

3Bakegen, Profet Hosea i talemaot we Hae God i talem se, “Yufala i stap mekem plan agens long king wetem ol haeman blong hem, blong trikim hem long ol rabis fasin blong yufala.

4Tingting blong yufala i no stap strong long king ya nating. Yufala i stap ona long hem, be yufala i stap giaman, yufala i stap pasraon long baksaed blong hem nomo blong spolem hem. Fasin ya we yufala i no laekem hem, yufala i agensem hem tumas, hem i olsem ol stikfaea we oli stap laet smosmol. Taem man i rere blong kukum kakae, hem i pusum olgeta i kam wanples, nao wantaem nomo faea i laet bigwan.

5Long dei ya we king i mekem lafet blong hem, yufala i stap givim waen long hem wetem ol haeman ya blong hem, gogo olgeta oli drong, hed blong olgeta i krangke.

6Ol rabis plan blong yufala i stap hot insaed long tingting blong yufala olsem faea blong kukum bred. Long naet, kros blong yufala i stap hot, nao long moning kros ya i faerap, i laet strong, i mekem yufala i wantem faet.

7Taem yufala i kros tumas olsem, yufala i stap kilim ol lida blong yufala oli ded. Oltaem yufala i stap kilim ol king blong yufala oli ded, be i no gat wan long yufala nating we i save askem long mi blong mi givhan long yufala.”

Ol man Isrel oli stap go olbaot blong lukaot man blong givhan long olgeta

8Nao Profet Hosea i talemaot we Hae God i talem se, “Ol man Isrel.* Yufala i olsem bred we i haftan. Yufala i stap flas long paoa blong ol narafala kantri we oli stap raonabaot long yufala,

9be yufala i no luksave nating we taem yufala i stap dipen long olgeta olsem, be yufala i stap lusum paoa blong yufala tu. I gat ol saen i stap soemaot we bambae yufala i lus, be yufala i no luksave nating.

10Fasin ya we yufala i stap leftemap yufala tumas, hem i stap witnes agens long yufala. Mi mi Hae God, mi God blong yufala, be yufala i no wantem nating blong kambak long mi.

11Yufala i stap go olbaot olsem pijin we i pas long net, i fraet i lusum hed, nao i stap flae i go olbaot. Fastaem, yufala i askem long kantri ya Ijip blong i kam givhan long yufala, mo biaen, yufala i resis i go long kantri ya Asiria blong i givhan long yufala.

12Yufala i stap resis i go olbaot, be bambae mi putum wan net, mi kasem yufala long hem. Bambae mi mi panisim yufala from ol rabis fasin we yufala i stap mekem.

13“Naoia, yufala i stap finis long rod blong lus. Yufala i tanem baksaed finis long mi, mo yufala i stap girap agens long mi bakegen. Bambae mi mi kilim yufala evriwan i ded. Fastaem, mi mi wantem tumas blong sevem yufala, be fasin blong yufala blong mekem wosip long mi i blong giaman nomo.

14Yufala i stap prea long mi, be long maot nomo, i no kamaot nating long tingting blong yufala. Taem yufala i stap prea long mi, yufala i stap krae, yufala i stap sakem yufala i go long graon, stret olsem we ol hiten man oli stap mekem. Taem yufala i stap prea long mi blong mi givim kakae mo waen long yufala, yufala i stap katkatem bodi blong yufala, olsem we ol man blong ol narafala god oli stap mekem, be semtaem nomo, yufala i stap girap agens long mi.

15Mi nomo mi stap lukaot long yufala, mi stap tijim yufala, mo mi stap mekem yufala i strong, be oltaem yufala i stap mekem plan agens long mi.

16Oltaem yufala i stap tanem baksaed long mi, blong go biaen long narafala god ya we i no gat paoa nating. Yufala i olsem bonara we man i no save trastem. Ol lida blong yufala oli stap leftemap olgeta tumas, be wan samting bambae i kam kasem olgeta we wantaem nomo bambae oli ded from, mo ol man Ijip bambae oli laf bigwan long yufala from.”