1 Tesalonaeka Sotfala stori blong buk ya - Bislama Bible Revised 2012

Sotfala stori blong buk yaTaon ya Tesalonaeka i kaptel blong provins ya Masedonia, we i stap anda long gavman blong Rom bifo. Taem Pol i aot long Filipae, hem i go long Tesalonaeka i talemaot gud nius long ples ya, nao jos long ples ya i stat. Be biaen i no longtaem, sam laen* blong Isrel* oli agens long hem. Oli jalus long hem from we oli luk se plante man we oli no laen blong Isrel, we fastaem oli stap lesin long ol tijing blong olgeta, oli harem gud nius we Pol i talemaot, nao oli bilif long Jisas. Nao ol laen ya blong Isrel oli kros long Pol, mo oli ronemaot hem long ples ya, nao hem i go long taon ya Berea. Biaen, taem hem i go kasem taon ya Korin, hem i kasem nius blong ol Kristin man long Tesalonaeka long fren blong hem Timoti, we i stap wok wetem hem.Nao Pol i raetem fas leta ya i go long ol Kristin man long Tesalonaeka blong leftemap tingting blong olgeta, mo blong soemaot long ol Kristin long ples ya se hem i stap tingbaot olgeta, mo God i stap wetem olgeta. Hem i talem tangkiu long God from we i harem se oli stap bilif strong long God, mo oli stap lavem ol man, mo i talem long olgeta blong oli tingbaot bakegen, gudfala fasin blong hem long taem ya we hem i stap wetem olgeta. Mo hem i ansarem ol kwestin blong olgeta we oli askem long hem, se bambae Jisas i kambak bakegen olsem wanem. Oli wantem faenemaot se man we i ded fastaem we Jisas i no kambak yet, bambae i save kasem laef we i no save finis, no nogat. Mo oli wantem save se bambae Jisas i kambak bakegen long wetaem. Mo Pol i talemgud long olgeta, se oli mas gohed blong wok, we tingting blong olgeta i stap kwaet, mo we oli putum tingting blong olgeta i stap strong long Jisas blong wet long hem, gogo hem bambae i kambak bakegen.Ol haf blong buk yaFastok 1.1

Pol i glad long olgetamo i talem tangkiu long God from olgeta 1.2—3.13

Pol i tijim olgetalong fasin blong Kristin man 4.1-12

Pol i tijim olgetase bambae Kraes i kambak bakegen 4.13—5.11

Pol i finisim tijing blong hem 5.12-22

Lastok 5.23-28