Galesia Sotfala stori blong buk ya - Bislama Bible Revised 2012

Sotfala stori blong buk yaGalesia, hem i wan provins we i stap anda long gavman blong Rom, mo i stap long kantri ya we tede nem blong hem Teki.Long taem ya we ol man blong Jisas oli stat blong go talemaot gud nius blong hem, ol man we oli no laen blong Isrel oli glad tumas long gud nius ya. Be i gat sam man oli stap, we long tingting blong olgeta, oli talem se sipos man i wantem kam tru Kristin man, hem i mas obei long olgeta Loa we God i givim long Moses. Nao Pol i tok strong agens long tingting ya, i talem se fasin ya i no stret nating. Hem i talem se sipos man i wantem kasem laef long Kraes, stamba blong samting ya, hem i mas bilif long Kraes. Long fasin ya nomo, olgeta man oli save kam stret man long fes blong God. Be long ol jos long provins ya Galesia, i gat sam man oli kam, oli stap agens long Pol, oli talem se sipos man i wantem kam stret man long fes blong God, hem i mas holem olgeta Loa ya blong Moses.Leta ya, Pol i raetem i go long ol man ya we oli stap biaen long ol rong tijing ya, blong pulum olgeta oli kambak long bilif we i tru, mo long ol fasin we i stret. Long stat blong leta ya blong hem, hem i talemaot se hem i gat raet blong ol man oli singaot hem, se aposol blong Jisas Kraes. Hem i gohed i talem se ol man oli no givim raet long hem blong hem i kam aposol, God nao i putumap hem, i singaot hem blong talemaot gud nius long ol man we oli no laen blong Isrel. Mo hem i gohed i tok agens long rong tijing ya, i talem se bilif blong man nomo i save mekem hem i kam stret man long fes blong God. Long ol las japta blong leta ya, Pol i soemaot se gudfala fasin we Kristin man i stap mekem, i kamaot long fasin ya we man i lavem ol brata mo sista blong hem, from we hem i bilif long Kraes.Ol haf blong buk yaFastok 1.1-10

Pol i gat paoa from we hem i wan aposol 1.11—2.21

God i stap givhan long yumi long gladhat blong hem 3.1—4.31

Kristin man hem i fri be i gat wok blong mekem 5.1—6.10

Lastok 6.11-18