1 King 13 - Bislama Bible Revised 2012

1Be fastaem, Hae God i bin givim tok blong hem long wan profet blong Juda blong i kam long Betel, mo profet ya i kamtru long ples ya stret long taem we king i stap stanap long saed blong olta blong mekem sakrefaes.

22 King 23.15,16Nao profet ya i mekem olsem we Hae God i talem. Hem i tok long olta ya, i talemaot we Hae God i talem se, “!Olta! !Yu lesin gud! Bambae i gat wan pikinini i bon we bambae nem blong hem Josaea. Hem bambae i wan long olgeta we bambae oli kamaot biaen long King Deved ya bifo, mo bambae hem i tekem ol pris ya we bambae oli stap wok long ol hiten olta, mo oli stap bonem sakrefaes antap long yu, nao bambae i kam kilim olgeta antap long yu. Mo bambae i bonem ol bun blong man antap long yu blong spolem yu.”

3Nao profet ya i gohed, i tok long ol man, i talem se, “!Olgeta! Saen we i soemaot we tok ya blong mi i tok blong Hae God bambae i olsem. Olta ya bambae i brobrok mo asis we i stap long hem bambae i folfoldaon i go olbaot.”

4Taem king i harem samting ya, hem i stretem han blong hem, i poenem profet ya, nao i talem se, “!Holem man ya!” Be wantaem nomo, han blong hem i ded, hem i no moa save benem.

5Mo semtaem nomo, olta ya i brobrok mo asis blong hem i folfoldaon i go long graon, stret olsem tok ya blong Hae God, we profet ya i jes talemaot.

6Nao hem i talem long profet ya se, “Yu yu man blong Hae God. Plis yu prea long hem, blong hem i mekem han blong mi i gud bakegen.”

Nao profet i prea long Hae God, mo han blong king i kam gud bakegen.

7Nao king i talem long hem se, “Yu kam wetem mi, yumitu go kakae smol long haos, mo bambae mi givim smol presen long yu, from samting ya we yu bin mekem.”

8Be profet i talem se, “King, nating sipos yu givim stret haf blong ol gudgudfala samting blong yu long mi, be bambae mi no save go wetem yu. Bambae mi no save kakae wetem yu, mo mi no save dring wan samting wetem yu tu.

9Hae God i blokem mi se bambae mi no kakae mo mi no dring long ples ya, mo bambae mi no gohom long sem rod ya we mi kam long hem.”

10Nao hem i gohom, be i no gobak long sem rod ya we i kam long hem, i pas long narafala rod.

Olfala profet blong Betel

11Nao long taem ya, i gat wan olfala profet i stap long Betel, mo ol pikinini blong hem oli kam stori long hem long ol samting ya we profet ya blong Juda* i kam mekem long Betel long dei ya, mo long tok ya we hem i talem long King Jeroboam.

12Olfala profet ya i askem se, “?Taem hem i aot, hem i pas long wanem rod?” Nao oli soem rod ya long hem we profet ya i pas long hem.

13Nao hem i talem long olgeta blong oli mekemrere dongki blong hem. Nao hem i jam long dongki ya,

14i resis, i biaen long hem, i go faenem hem we i stap sidaon aninit long wan oktri,* mo i askem long hem se, “?Yu yu profet ya blong Juda?”

Mo profet i talem se, “Yes.”

15Nao hem i talem long hem se, “Ale, yu kam, yumitu gobak long haos, yu kakae smol.”

16Be profet ya i talem se, “No, mi no save go wetem yu, mo mi no save go insaed long haos blong yu, blong kakae wetem yu, no blong dring wan samting wetem yu,

17from we Hae God i blokem mi finis, se bambae mi no kakae long ples ya, mo mi no dring long ples ya, mo bambae mi no gohom long sem rod ya we mi kam long hem.”

18Be olfala profet ya i talem long hem se, “Mi tu mi wan profet olsem yu. Mo Hae God i givim tok long wan enjel blong hem, nao hem i kam talem long mi, se mi mas tekem yu yu kam long haos blong mi, blong givim kakae long yu.” Be hem i stap giaman nomo.

19Nao profet ya i go wetem hem, mo i kakae wetem hem.

20Taem we tufala i stap kakae, Hae God i talem long olfala profet ya, blong i talemaot tok blong hem long profet ya blong Juda.

21Nao hem i talemaot we Hae God i talem se, “Yu yu no mekem olsem we mi mi talem, yu brekem tok blong mi finis.

22Yu kambak long ples ya, yu kakae, be mi talem finis long yu, se bambae yu no mekem olsem. From samting ya, bambae yu ded, mo bambae oli no berem* yu long hol ya long ston we oli berem ol olfala blong yu long hem.”

23Nao taem tufala i kakae finis, olfala profet i mekemrere dongki blong profet ya,

24nao profet ya i sidaon long hem, i wokbaot i go. Mo taem hem i stap wokbaot i go, wan laeon i faenem hem, mo i kilim hem i ded. Hem i foldaon, i stap long rod, mo laeon ya wetem dongki, tufala i stap stanap long saed blong hem.

25Nao sam man oli pas long rod ya, mo oli luk bodi blong profet ya we i stap long rod, wetem laeon we i stap stanap klosap long hem. Nao oli go long Betel, oli talemaot samting ya we oli luk.

26Mo taem olfala profet i harem nius ya, hem i talem se, “!Hemia profet ya we i no obei long tok blong Hae God! Hae God i sanem laeon ya blong i jam long hem, i kilim hem i ded, olsem we hem i talemaot finis, se bambae i mekem.”

27Nao hem i talem long ol pikinini blong hem se, “Yufala i mekemrere dongki blong mi.” Ale, oli mekemrere dongki ya,

28mo hem i sidaon long hem, i wokbaot i go, nao i luk we profet ya i ded finis, i stap slip long rod. Laeon wetem dongki, tufala i stap stanap yet long saed blong hem, be laeon ya i no kakae bodi blong hem, mo i no kilim dongki ya tu.

29Nao hem i karem bodi blong profet ya, i putum long dongki blong hem, i karem i gobak long Betel, blong oli krae long hem, mo oli berem hem long hol long ston.

30Nao hem wetem ol pikinini blong hem oli krae long hem, oli talem se, “O, brata blong mi. O, brata blong mi.” Mo oli berem hem long wan hol long ston we i blong famle blong olgeta.

31Mo taem oli berem hem long hol ya finis, olfala profet ya i talem long ol pikinini blong hem se, “Sipos mi mi ded, bambae yufala i berem mi long hol ya. Bambae yufala i putum bodi blong mi i stap long saed blong bodi blong hem,

32from we mi savegud se ol tok ya blong Hae God we hem i talemaot agens long olta ya long ples ya long Betel, mo agens long ol ples blong wosip long ol taon ya long Sameria, bambae i kamtru.”

Sin we i spolem King Jeroboam

33King Jeroboam blong Isrel* i no tanem tingting blong hem blong lego ol rabis fasin blong hem. Hem i stap jusumaot ol man long ol famle olbaot, mo i stap putumap olgeta oli pris, blong oli stap wok long ol olta ya we hem i wokem. Sipos wan man i wantem kam pris, i nomata hu man, be hem i save putumap hem.

34Nao ol sin ya blong hem i spolemgud hem wetem olgeta we oli kamaot biaen long hem, gogo oli ded evriwan.