Aesea 33 - Bislama Bible Revised 2012

Man i prea blong Hae God i givhan

1Nao Profet Aesea i tok agens long ol enemi blong olgeta, i talem se, “!Ol man blong spolem man! !Sore tumas long yufala! !I no gat man i stil long yufala, be yufala i stap stil! !I no gat fren blong yufala i letem yufala i go long han blong ol enemi blong yufala, be yufala i stap mekem fasin ya long ol fren blong yufala! !Be taem blong yufala bambae i finis! !Bambae ol man oli kam stil long yufala, mo bambae ol fren blong yufala oli letem yufala i go long han blong ol enemi blong yufala!”

2Nao hem i prea, i talem se, “Hae God. Plis yu sore long mifala. Mifala i putum tingting blong mifala i stap long yu nomo. Evri dei, plis yu blokemgud mifala, blong ol enemi oli no kam spolem mifala. Mo sipos trabol i kam kasem mifala, plis yu sevem mifala.

3Taem yu yu girap blong faet long saed blong mifala, ol man blong ol narafala kantri oli harem noes blong faet, nao wantaem nomo, oli ronwe.

4Oli ronwe long ol samting we oli karem i kam long faet, nao mifala evriwan i resis i go blong karem ol samting ya i blong mifala.

5“Hae God, yu yu hae we yu hae. Yu yu rul long evri samting. Bambae yu yu mekem taon ya Jerusalem* i kam ples blong stret fasin, we oltaem, man i stap mekem i stret long narafala man.

6Bambae yu yu mekem kantri ya i stanap strong, i stap gud. Mifala i man blong yu, mo oltaem yu stap blokemgud mifala, blong ol enemi oli no save kam spolem mifala. Oltaem yu stap givim waes long mifala, mo yu stap tijim mifala. Fasin ya we oltaem mifala i stap ona long yu, hem i nambawan samting we mifala i gat.

7“Ol strong man blong faet oli stap singaot, blong man i kam givhan long olgeta, mo ol man blong karem tok blong gavman we oli stap traehad blong wokem pis, oli stap harem nogud tumas, we oli stap krae from.

8Ol big rod ya we i stat long wan taon i go kasem narafala taon oli no moa sef, ol man oli fraet blong wokbaot long olgeta. Ol promes we ol man oli mekem wetem ol man blong ol narafala kantri, olgeta oli brekem bakegen, mo pis we oli stanemap, hem i foldaon bakegen. Mo i no moa gat man i stap, we ol man oli stap tinghae long hem.

9Olbaot long kantri, ol garen oli stap nating, i no gat man i wok long olgeta. Long kantri ya Lebanon, ol bigfala tri ya long bus oli stap kam drae, mo long ples ya Saron, gudfala graon ya long medel blong ol hil, hem i kam draeples finis, mo long Basan mo long hil ya Kamel, ol lif blong ol tri oli stap folfoldaon.”

Hae God i tok blong wekemap ol enemi blong hem

10Nao Profet Aesea i talemaot tok blong Hae God long ol man blong hem. Tok ya i blong ol man blong ol narafala kantri, mo profet i talemaot we Hae God i talem se, “Olgeta. Naoia nomo, bambae mi mi girap, mi soemaot long yufala we mi mi hae we mi hae, mo mi gat olgeta paoa.

11Yufala i stap mekem ol plan we oli no save gotru, mo ol samting we yufala i stap mekem oli samting nating nomo. Hadwok blong yufala i olsem faea, we bambae i kakae yufala bakegen.

12Bambae yufala i brobrok long ol smosmol pis, yufala i kam paoda, olsem ston ya we oli bonem blong wokem laem long hem, no ropnil ya we oli bonem i kam asis.

13I gud ol man we oli stap klosap, wetem olgeta we oli stap longwe, oli harem nius blong ol samting we mi mi mekem, nao bambae oli talemaot se mi mi gat paoa.”

14Bakegen, profet i talem long ol man nogud long Saeon* se, “Olgeta. Yufala i man blong mekem sin, mo yufala i fraet we i fraet, we yufala i stap seksek from. Yufala i stap taltalem long yufala se, ‘Taem Hae God i jajem man, panis blong hem i olsem faea we i no save ded samtaem. !I no gat wan long yumi nating, we i save winim faea olsem, nao i stap laef!’

15!Be yufala i save winim! Sipos yufala i stap folem ol stret fasin, mo yufala i stap talem ol trutok, bambae yufala i save win. Sipos yufala i no yusum paoa blong yufala blong stilim ol puaman, mo yufala i no tekem mane blong go mekem fasin we i no stret, bambae yufala i save win. Sipos yufala i no go joen long olgeta we oli stap mekem plan blong kilim man i ded, mo yufala i no stap mekem ol narafala fasin nogud, bambae yufala i save win.

16Sipos yufala i no mekem ol rabis fasin ya, bambae yufala i save stap gud, olsem we yufala i stap long wan strong sefples blong haed, antap long wan bigfala hil, we yufala i gat plante kakae, mo plante wota blong dring.”

Wan gudfala taem i stap kam, we ol man blong Hae God bambae oli save harem gud

17Nao Profet Aesea i talem long ol man blong hem se, “Olgeta. I gat taem i stap kam, we bambae yufala i luk wan gudfala king we i hae we i hae, we bambae i stap rul long wan bigfala kingdom, we mak blong graon blong hem long evri saed i stap longwe we longwe.

18Fasin ya we yufala i stap fraet tumas long ol man ya blong narafala kantri we oli stap tekem takis long yufala, mo oli stap wajem yufala blong ripotem yufala, hemia bambae i kam wan samting we i blong stori long hem nomo.

19Bambae yufala i no moa save luk ol strenja ya we yufala i no save lanwis blong olgeta, mo we oli stap mekem i raf tumas long yufala.

20Yufala i traem tingbaot taon ya Jerusalem,* wetem hil ya Saeon,* we yumi stap mekem ol lafet* long hem, blong mekem wosip long Hae God. Bambae hem i wan gudfala sefples, we yumi glad blong stap long hem. Bambae hem i olsem wan haos tapolen we neva man i save tekemaot blong putumap bakegen long narafala ples, we neva man i pulumaot ol stik ya we oli stap fasem rop blong hem long hem, mo neva rop blong hem i brok.

21-23Long taem ya, Hae God bambae i soemaot long yumi, we paoa blong hem i strong we i strong. Hem nomo bambae i King blong yumi, mo bambae i rul long yumi. Hem bambae i stretem ol problem blong yumi, mo i blokemgud yumi, blong ol enemi oli no kam spolem yumi. Hem bambae i stap blokemgud yumi, olsem we ol bigbigfala reva wetem ol smosmol reva oli stap raon long yumi, mo ol sip blong ol enemi blong yumi oli no save pas long olgeta. Sipos ol enemi oli wantem kam long ples ya, bambae oli olsem sip we ol rigin blong hem oli kam nogud finis, oli no moa save holemgud ol mas blong hem, mo ol boskru oli no save pulum sel. Bambae oli ronwe, mo yumi save go karem ol gudgudfala samting blong olgeta, mo bambae oli plante tumas, we man we leg blong hem i nogud, bambae i gat janis blong go karem.

24Long taem ya, bambae i no moa gat man olbaot long kantri ya we i save talem se hem i sik, from we Hae God bambae i fogivim ol man blong ples ya, i tekemaot ol sin blong olgeta.”