Jeremaea 3 - Bislama Bible Revised 2012

Tingting blong ol man blong God i no stap strong long hem

1Mo Profet Jeremaea i talemaot we Hae God i talem se, “Sipos wan man i lego woman blong hem, nao woman ya i aot long hem, i go mared long narafala man, man ya blong hem fastaem, hem i no moa save tekem woman ya bakegen, from we sipos hem i mekem olsem, fasin ya bambae i mekem ples blong yufala i kam doti olgeta long fes blong mi. Be yufala i gat plante woman finis, we yufala i stap slip wetem olgeta. ?Weswe yufala i wantem kambak long mi bakegen?

2Yufala i traem lukluk i go antap long ol hil ya. Long olgeta ples ya, yufala i stap slip wetem ol woman blong rod* long hem. Oltaem yufala i stap haed long saed blong rod blong kasem olgeta, stret olsem we ol man Arab oli stap haed long draeples, blong stil long ol man we oli stap pas long rod ya. Yufala i spolemgud ples ya, long rabis fasin ya we yufala i stap mekem.

3Nao from samting ya, mi mi blokem ren, mo i no moa ren long taem blong planem garen. Taem man i luk yufala, be i save luksave wantaem, we yufala i olsem woman blong rod stret, yufala i no gat sem nating.

4Be naoia, yufala i stap kam long mi, yufala i singaot mi se, ‘Yu yu papa blong mifala, mo oltaem yu stap lavem mifala, i stat long taem ya we mifala i pikinini yet kam kasem naoia.

5Yu yu no save kros oltaem, mo bambae yu no stap kros long mifala olwe.’ Hemia nao toktok blong yufala, be yufala i gohed blong mekem ol fasin we i nogud we i nogud.”

Ol man Isrel mo ol man Juda oli mas tanem tingting blong olgeta from ol sin blong olgeta

6 2 King 22.1—23.30; 2 Kron 34.1—35.27 Nao Profet Jeremaea i talem se, “Long taem ya we King Josaea i stap rul, Hae God i toktok long mi i talem se, ‘Ol man Isrel* ya bifo, tingting blong olgeta i no stap strong long mi nating. ?Be yu yu save ol rabis fasin ya we ol olfala ya oli bin mekem? Olgeta oli bin gowe long mi, oli mekem fasin blong woman blong rod* olbaot antap long ol hil mo aninit long ol tri we oli gat gudfala sed.

7Mi mi ting se bambae oli jenisim fasin blong olgeta, nao oli kambak long mi bakegen, be oli no tingbaot nating blong kambak long mi. Mo yufala ol man Juda,* yufala i olsem stret sista blong olgeta ya nomo, mo tingting blong yufala tu i no stap strong long mi. Yufala i savegud stori blong ol rabis fasin ya blong ol man ya bifo,

8mo yufala i save we mi mi lego olgeta, mi sanemaot olgeta, from we oli tanem baksaed long mi, oli kam olsem woman blong rod, be yufala i no fraet nating. Yufala tu i girap, yufala i mekem fasin blong woman blong rod,

9mo yufala i no sem nating long fasin ya blong yufala. Yufala i mekem kantri ya i doti long fes blong mi, long ol rabis fasin blong yufala, we yufala i stap mekem wosip long ol ston, mo long ol tri.

10Nao biaen long ol samting ya, yufala i kambak long mi bakegen, be yufala i giaman nomo. Yufala i no kambak long mi long olgeta tingting blong yufala nating. Mi mi Hae God, mo hemia tok blong mi.’

11“Mo Hae God i talem long mi se, ‘Nating we ol man Isrel ya bifo oli gowe long mi, be fasin blong olgeta i gud lelebet, i winim fasin blong yufala, we tingting blong yufala i no stap strong long mi nating.

12Nao from samting ya, yu singaot i go long not, yu talemaot we mi mi talem se, ‘Ol man Isrel. Mi mi Hae God, mi God blong yufala. Tingting blong yufala i no stap strong long mi, be yufala i mas kambak long mi. Bambae mi no moa save kros long yufala, from we oltaem mi mi gat sore long man. Bambae mi no save kros long yufala olwe.

13Be yufala i mas talemaot long mi we bifo, yufala i mekem i no stret, mo we oltaem, yufala i stap girap agens long mi. Mo yufala i mas talemaot tu we long taem ya, yufala i stap laekem ol narafala god, mo yufala i stap mekem wosip long olgeta aninit long ol tri we oli gat gudfala sed, mo we yufala i no stap obei long ol tok blong mi. Mi mi Hae God, mo hemia tok blong mi.

14“ ‘I stat bifo, kam kasem tede, tingting blong yufala i no stap strong long mi nating, be naoia, yufala i mas kambak long mi, from we yufala i man blong mi. Long evri taon blong yufala, mi bambae mi tekemaot wan man long wan taon, wan man long wan taon, mo long evri famle blong yufala, bambae mi tekemaot tu man long wan famle, tu man long wan famle, nao mi tekem olgeta oli kambak long hil ya Saeon.*

15“ ‘Bambae mi givim ol gudfala lida long yufala, we oli save obei long mi. Bambae mi mekem olgeta oli waes gud, mo oli gat save blong lidim yufala.

16Nao taem yufala i kam plante we plante, bambae i no moa gat wan long yufala we i save tokbaot Bokis ya we i Saen blong Promes* blong mi. Bambae yufala i fogetemgud, yufala i no moa save tingbaot. Bambae yufala i no moa wantem, from we i no moa gat wok blong hem, mo bambae yufala i no moa save mekem narawan bakegen.

17Taem dei ya i kamtru, ol man bambae oli stap talem bigfala taon ya Jerusalem* se, “Bigfala Jea blong Hae God,” mo ol man blong evri kantri bambae oli kam wanples long ples ya, blong mekem wosip long mi. Bambae oli no moa save mekem stronghed, mo oli no moa save mekem ol rabis fasin we i kamaot long tingting blong olgeta.

18Bambae yufala wetem ol man Juda, yufala i joen wanples. Bambae yufala evriwan i aot long kantri ya long not, long ples we yufala i stap wok slef* long hem, nao bambae yufala i kambak long kantri ya we mi mi givim finis long ol bubu long yufala bifo, se i blong olgeta olwe gogo i no save finis.’ ”

Ol man blong God oli stap mekem wosip long ol aedol

19Mo Profet Jeremaea i talemaot we Hae God i talem se,

“Ol laen* blong Isrel.*

Mi mi glad tumas blong tekem yufala,

blong yufala i kam stret pikinini blong mi,

mo blong mi givim gudfala graon ya long yufala

we i beswan, i winim olgeta graon long wol,

blong yufala i save stap long hem olwe.

Mi mi wantem tumas

blong yufala i singaot mi, se papa,

mo blong yufala i no gowe long mi bakegen.

20Be yufala i girap,

yufala i mekem olsem woman

we i lego man blong hem,

i go mekem i krangke wetem narafala man.

Tingting blong yufala

i no stap strong long mi nating.

Mi mi Hae God mo hemia tok blong mi.”

21Nao profet i talem long ol man se,

“Mi mi stap harem

ol man oli stap krae antap long hil.

Hemia yumi ya, ol laen blong Isrel,

we yumi stap krae.

Yumi stap singaot long God

blong i givhan long yumi.

Yumi harem nogud

from we laef blong yumi

i fulap long ol rabis fasin,

mo yumi fogetem finis Hae God ya

we i God blong yumi.

22“Hem talem long yumi se,

‘Yufala evriwan we i gowe long mi,

i gud yufala i kambak long mi bakegen,

nao mi bambae mi mekem yufala i kam gud bakegen,

we tingting blong yufala bambae i stap strong long mi.’

“Mo naoia, yumi mas talem long hem se, ‘Hae God, mifala i kambak long yu, from we yu yu God blong mifala.

23Taem mifala i stap mekem wosip long ol narafala god antap long ol hil, be ol god ya oli no givhan nating long mifala. Hae God, yu nomo yu God blong mifala, yu nomo yu stap sevem mifala.

24Be from we mifala i stap bodaon long god ya Bal,* we hem i stap mekem mifala i sem nomo, mifala i lusum ol sipsip wetem ol buluk blong mifala, mo mifala i lusum ol boe mo ol gel blong mifala, mo mifala i lusum olgeta samting we ol bubu blong mifala oli stap wok from, i stat bifo olgeta.

25Mifala i sem tumas, mo i stret nomo blong mifala i sem we i sem bigwan, from ol rabis fasin blong mifala. Yu yu God blong mifala, be mifala wetem ol bubu blong mifala, mifala evriwan i mekem sin agens long yu, mo mifala i no obei long ol tok blong yu.’ ”