Esikel 46 - Bislama Bible Revised 2012

Wok blong king long ol lafet

1Hae God i Masta blong yumi, mo hem i talem se, “Long ol sikis dei ya blong wok, doa ya long saed i go long is, we i blong kam insaed long yad blong haos* blong mi, i mas sat i stap, bambae yufala i openem long Sabat* dei mo long Lafet blong Niumun* nomo.

2Long taem ya, king bambae i aot long bigfala yad ya, i go insaed long bigfala rum long doa ya. Nao taem ol pris* oli bonem ol sakrefaes blong hem, sam we i blong bonem i bon evriwan, mo sam we i blong bonem haf mo i kakae haf blong soemaot we hem i stap fren gud wetem mi, bambae hem i mas stanap klosap long ol pos blong doa ya, mo hem i mas bodaon blong mekem wosip long mi. Nao biaen, bambae hem i goaot bakegen. Doa ya i mas open nomo, gogo kasem long sapa.

3Long evri Sabat dei, mo long evri Lafet blong Niumun, olgeta man tu oli mas bodaon blong mekem wosip long mi, long fran blong doa ya.

4“Nao long Sabat dei, king bambae i mas tekem sikis yang sipsip mo wan man sipsip, we oli no gat samting nating i rong long bodi blong olgeta, blong mekem sakrefaes we i blong bonem i bon evriwan, blong mekem wosip long mi.

5Nao bambae hem i mas tekem seventin kilo haf wit* no bale,* i givim blong mekem sakrefaes wetem man sipsip ya. Mo wetem ol yang sipsip ya wanwan, bambae hem i givim olsem we hem i save givim. Mo taem hem i givim seventin kilo haf wit no bale, be i mas tekem tri lita olifoel* tu i go wetem.

6Mo long Lafet blong Niumun, bambae hem i mas tekem wan yang bul mo sikis yang sipsip mo wan man sipsip, we olgeta evriwan oli no gat wan samting nating i rong long bodi blong olgeta, blong mekem sakrefaes long mi.

7Mo bambae hem i mas givim seventin kilo haf wit no bale, blong yusum wetem yang bul ya, mo hem i mas mekem olsem tu long man sipsip ya. Mo long ol yang sipsip ya wanwan, bambae hem i givim olsem we hem i save givim. Mo bambae hem i mas givim tri lita olifoel, blong yusum wetem evri seventin kilo haf wit no bale ya.

8Nao taem king i aot long rum ya, bambae hem i pas long sem doa ya we i pas long hem blong kam insaed.

9“Long taem blong lafet, taem ol man oli kam insaed blong mekem wosip long mi, olgeta we oli pas long doa ya long saed i go long not blong kam insaed, bambae oli mas pas long doa ya long saed i go long saot blong go afsaed. Mo olgeta we oli kam insaed long doa ya long saed i go long saot, bambae oli mas go afsaed long doa ya long saed i go long not. Bambae i no gat man i save pas long sem doa ya we i pas long hem blong kam insaed.

10Taem ol man oli kam insaed blong mekem wosip, king tu bambae i kam insaed, mo taem oli go afsaed, hem tu bambae i go afsaed.

11Long ol dei blong lafet, man we i karem anamol i kam blong mekem wosip, bambae i mas givim seventin kilo haf wit no bale, blong yusum wetem bul, mo hem i mas mekem olsem tu long man sipsip. Mo long ol yang sipsip wanwan, bambae hem i givim olsem we hem i save givim. Mo bambae hem i mas givim tri lita olifoel, blong yusum wetem evri seventin kilo haf wit no bale ya.

12“Taem king i wantem givim presen i kam long mi we hem nomo i wantem mekem, maet i presen blong bonem i bon evriwan, no i presen we i bonem haf i kakae haf blong soemaot we hem i stap fren gud wetem mi, bambae yufala i openem doa ya blong yad blong haos blong mi long saed i go long is, blong hem i kam insaed long hem. Nao bambae hem i mekem ol sakrefaes ya blong hem, long sem fasin we hem i mekem long Sabat dei. Mo taem hem i go afsaed finis, bambae yufala i mas satem doa ya bakegen.”

Sakrefaes we i blong givim evri dei

13Nao Hae God i talem se, “Evri moning bambae yufala i mas tekem wan yang sipsip we i gat wan yia blong hem, mo we i no gat wan samting nating i rong long bodi blong hem, blong mekem sakrefaes we oli bonem i bon evriwan, blong mekem wosip long mi. Sakrefaes ya, bambae yufala i mas mekem evri dei nomo.

14Mo evri moning, bambae yufala i mas tekem tu kilo flaoa wetem wan lita olifoel* blong tantanem wetem flaoa ya, blong givim i kam long mi. Ol rul ya blong givim presen i kam long mi, bambae yufala i mas holem oltaem nomo gogo i no save finis.

15Evri moning, bambae yufala i mas tekem wan yang sipsip, wetem flaoa mo olifoel, yufala i givim i kam long mi. Oltaem bambae yufala i mas mekem olsem, gogo i no save finis.”

King i gat raet long graon blong hem nomo

16Hae God i Masta blong yumi, mo hem i talem se, “Sipos king i givim wan pis graon blong hem long wan pikinini blong hem, bambae graon ya i blong pikinini ya, from we hem i graon blong famle blong hem.

17, nao pis graon ya bambae i gobak long king bakegen. Bambae i blong king ya wetem ol pikinini blong hem oltaem, gogo i no save finis.

18Hem i no mas tekemaot graon i gowe long stret ona blong hem. Sipos hem i wantem givim graon long ol pikinini blong hem, hem i mas givim graon blong hem nomo long olgeta, blong bambae hem i no save spolem ol man blong mi, long fasin ya we i tekemaot graon blong olgeta.”

Ol kijin blong haos blong Hae God

19Nao man ya i tekem mi, mitufala i go insaed long doa ya we i go insaed long ol rum ya we oli lukluk i go long not, klosap long doa ya we i stap long saed i go long saot, we i kamaot long yad ya blong haos* blong God. Hemia ol tabu rum ya blong ol pris.* Mo hem i soemaot long mi wan ples long ol rum ya saed i go long wes,

20nao i talem se, “Hemia ples ya we ol pris bambae oli kukum mit blong ol anamol we ol man oli givim blong mekem sakrefaes blong tekemaot sin, mo ol spesel sakrefaes blong tekemaot sin blong man we i ravem Hae God, no i ravem narafala man. Mo long ples ya tu, oli save kukum ol kek long flaoa we oli wokem long wit* no bale,* we ol man oli givim long Hae God. Bambae oli mas mekem long ples ya, blong oli no karem ol samting we i tabu i go long bigfala yad ya, from we i nogud ol tabu samting ya i spolem ol man.”

21-22Nao hem i tekem mi, mitufala i go long bigfala yad ya, mo hem i soemaot long mi we long ol fo kona blong yad ya, i gat ol narafala yad bakegen, we longfala blong olgeta i kasem twanti meta, mo bigfala blong olgeta i kasem fiftin meta.

23Olgeta evriwan, oli gat wol i goraon long olgeta, mo oli gat ol ples blong faea we oli wokem long saed blong wol.

24Nao man ya i talem long mi se, “Hemia ol kijin, we ol man we oli wok long haos ya blong Hae God, bambae oli stap kukum ol mit blong ol sakrefaes ya long hem we ol man oli stap givim long Hae God.”