Levitikas 10 - Bislama Bible Revised 2012

Sin blong Nadab mo Abihu

1Nao tu pikinini blong Hae Pris Eron, we nem blong tufala, Nadab mo Abihu, tufala i tekem tu sensa,* tufala i putum sakol faea we i laet i go long tufala, mo tufala i putum insens* long faea ya, nao tufala i leftemap faea ya blong givim i go long Hae God. Be long fes blong Hae God, faea ya i no tabu, from we hem i no talem long tufala, blong tufala i mekem olsem.

2Nao wantaem nomo, hem i sanem faea i kam, i bonem tufala i ded long ples ya nomo, long fes blong hem.

3Nao Moses i talem long hae pris se, “Hemia nao samting we Hae God i stap tokbaot. Hem i talem se, ‘Long olgeta we oli stap kam klosap long mi, bambae mi soemaot we mi mi tabu, mo long fes blong ol man blong mi, bambae mi soemaot paoa blong hae nem blong mi.’ ” Be hae pris i stap kwaet nomo, i no talem wan samting nating.

4Nao i gat tu pikinini blong Usiel, we i wan papa blong hae pris ya, we nem blong tufala Misael mo Elijafan, nao Moses i singaot tufala i kam, i talem se, “Tufala. Haos Tapolen ya i tabu. Yutufala i kam karemaot tufala pikinini ya blong yumi i gowe long ples ya. Yutufala i go bitim ples ya we ol haos tapolen blong yumi oli stap long hem, yutufala i go putum tufala afsaed.”

5Nao tufala i kam, tufala i holem tufala long spesel klos ya nomo blong tufala, tufala i karem tufala i go afsaed olsem we Moses i talem.

6Nao Moses i talem long hae pris wetem tu narafala pikinini ya blong hem, Eleasara mo Itamara se, “Yutrifala i no mas mekem ol fasin blong yumi blong soemaot we yutrifala i sore from tufala ya. Yutrifala i no mas terem* klos blong yutrifala, mo yutrifala i mas komem hea blong yutrifala. Sipos yutrifala i mekem ol fasin ya blong sore, bambae yutrifala i ded from, mo Hae God bambae i kros long yumi evriwan. Yumi ol laen* blong Isrel,* mo mifala evriwan i save krae from tufala ya we i ded long faea ya we Hae God i sanem i kam, be yutrifala i no mas krae from tufala.

7Mo bambae yutrifala i no gowe long doa blong yad blong Haos Tapolen ya. Sipos yutrifala i gowe long ples ya, bambae yutrifala i ded, from we mi mi bin makemaot yutrifala finis long tabu oel ya blong Hae God, se yutrifala i man blong hem.” Nao trifala i mekem olsem we hem i talem.

Ol rul blong ol pris

8Nao Hae God i talem long Hae Pris Eron se,

9“Sipos yu, no tufala pikinini ya blong yu, yufala i dring waen no ol narafala dring olsem, bambae yufala i no mas kam insaed long Haos Tapolen ya we yufala i stap kam long hem blong mit wetem mi. Sipos wan long yufala i brekem tok ya, bambae hem i ded from. Hemia i wan loa we ol laen* blong yu bambae oli mas holem oltaem, gogo i no save finis.

10Yufala i mas waes gud blong makem ol samting we i blong mi mo ol samting we yufala i save yusum olbaot, mo blong makem ol samting we i klin long fes blong mi mo ol samting we i no klin olsem.

11Mo ol loa ya we mi mi givim long Moses bifo blong i givim long yufala, be yufala i mas tijim ol man ya blong mi long hem.”

12-13 Lev 6.14-18 Nao biaen, Moses i talem long hae pris wetem tufala pikinini ya blong hem Eleasara mo Itamara se, “Taem ol man oli mekem presen long Hae God long ol kakae blong garen,* mo yufala i bonem haf blong givim i go long hem, mo haf i stap we i blong yufala, bambae yufala i mas wokem kakae long hem we i no gat is long hem, mo oltaem, yufala i mas kakae kakae ya long saed blong Olta nomo, from we ples ya i tabu, mo kakae ya i tabu we i tabu. Hem i haf blong kakae ya we ol man oli givim i go long Hae God, we i blong yufala. Tok ya, Hae God i givim long mi blong mi talem long yufala.

14Lev 7.30-34Be jes blong anamol wetem raet leg blong hem we ol man oli makemaot se tufala i spesel presen blong Hae God, ol mit ya i blong yufala, mo yufala wetem ol pikinini blong yufala, yufala evriwan i save kakae. Mo yufala i save kakae ol mit ya long ol ples we i klin long fes blong Hae God. Mit ya i kamaot long ol sakrefaes ya we ol man blong yumi oli mekem blong soemaot we oli stap fren gud wetem Hae God, mo haf blong sakrefaes ya i blong yufala wetem ol pikinini blong yufala.

15Long taem ya we bambae oli tekem gris blong sakrefaes ya i kam blong yufala i bonem blong givim i go long Hae God, oli mas tekem jes blong hem wetem raet leg blong hem tu i kam blong mekem spesel presen long tufala i go long Hae God. Mit ya nao bambae i blong yufala wetem ol pikinini blong yufala mo olgeta we bambae oli kamaot biaen long yufala oltaem nomo, olsem we Hae God i talem.”

16Nao Moses i askem kwestin long trifala blong faenemaot olsem wanem long nani ya we ol man oli tekem blong mekem spesel sakrefaes long hem blong tekemaot sin blong olgeta, mo i faenemaot we Eleasara mo Itamara, tufala i bonem finis. Samting ya i mekem hem i kros tumas long tufala, nao i tok long tufala, i talem se,

17-18Lev 6.24-26“!Sakrefaes ya i blong tekemaot ol sin blong ol man ya! I no gat tok blong hem se hae pris i mas tekem blad blong hem i go long Rum ya we i Tabu, insaed long Haos Tapolen ya, mo from samting ya, i stret nomo blong yutrifala i kakae mit blong hem long yad ya, olsem we mi mi talem. !Mit ya i tabu tumas ya! Hae God i givim long yutrifala, blong yutrifala i mekem ol samting long hem blong tekemaot ol sin blong olgeta man. ?From wanem yutrifala i no kakae mit ya?”

19Nao hae pris i talem long hem se, “!No, be sipos mi bin kakae mit blong sakrefaes ya tede, bambae Hae God i no save glad long mi ya! !Yu luk! Tede olgeta oli mekem spesel sakrefaes long Hae God blong tekemaot ol sin blong olgeta, mo oli mekem sakrefaes ya we i blong bonem i bon evriwan blong givim i go long hem, be bigfala trabol ya i kasem mi yet.”

20Mo taem Moses i harem tok ya, hem i luk se i stret nomo.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help