Esikel 40 - Bislama Bible Revised 2012

NIUFALA HAOS BLONG HAE GOD WE PROFET I LUK LONG VISON(40.1—48.38)Hae God i tekem Esikel i go long Jerusalem

1Long namba twanti faef yia blong yumi we yumi stap wok slef* long Babilonia, long fas manis,* long namba ten dei blong hem, mi harem paoa blong Hae God i kam long mi, nao i karem mi mi go. Hemia long namba fotin yia biaen long taem ya we ol enemi oli go spolem Jerusalem.*

2Rev 21.10Nao mi luk wan vison, we Hae God i tekem mi mi go long Isrel, i putum mi mi stap antap long wan hil we i hae we i hae. Mo mi lukluk i go long saot, nao mi luk plante haos we oli stap wanples olsem wan taon.

3Rev 11.1; 21.15Mo hem i tekem mi mi go klosap moa, ale mi luk wan man we i stap saen olsem bras, we i saen we i saen. Hem i stap stanap long doa* blong bigfala stonwol, mo i stap holem wan teplaen we oli wokem long linen,* mo wan longfala rula tu.

4Nao hem i talem long mi se, “Man blong wol ya. Yu mas luklukgud mo yu mas lesin gud long olgeta samting we bambae mi soemaot long yu naoia. Mi tekem yu yu kam long ples ya from samting ya nao. Olgeta samting ya we yu yu luk, bambae yu go talemaot long ol laen* blong Isrel.*”

Doa blong haos blong Hae God we i lukluk i go long is

5 1 King 6.1-38; 2 Kron 3.1-9 Nao taem mi lukluk i go, mi luk haos* blong Hae God, mo i gat stonwol i goraon long hem. Mo man ya i tekem longfala rula ya blong hem, we longfala blong hem i kasem tri meta, nao i makem wol ya. Hae blong wol ya i go antap kasem tri meta, mo bigfala blong hem tu i kasem tri meta.

6Nao i go long doa blong haos ya we i lukluk i go long is, i klaem long step i go antap long doa ya, nao i makem rod we i stat long doa ya i go insaed, i go kasem ples we tik blong wol i finis long hem. Longfala blong rod ya i kasem tri meta, from we tik blong wol ya i olsem.

7Nao long narasaed wol ya insaed, i gat wan rod i pas long medel, we long tufala saed blong hem, i gat ol rum blong ol gad. Ol rum ya wanwan oli skwea gud we tri meta long evri saed, mo wol i seraot olgeta wanwan, we tik blong ol wol ya wanwan i kasem tu meta haf. Mo insaed olgeta, biaen long ol rum ya blong ol gad, hem i makem floa blong rod ya. Hem i stat long las rum blong ol gad, i go kasem bigfala rum ya long doa, we i lukluk i go long bigfala yad blong haos blong Hae God. Longfala blong hem i kasem tri meta, from we tik blong wol we i seraot tufala rum ya i olsem.

8-9Nao hem i makem rum ya, i luk se longfala blong hem i kasem fo meta. Mo long narasaed blong rum ya, tik blong wol blong hem i kasem wan meta. Rum ya i stap long en blong rod ya blong pas i go long bigfala yad ya.

10Ol rum ya blong ol gad we oli stap long tufala saed blong rod ya, saes blong olgeta i sem mak nomo. Mo ol wol long medel blong olgeta tu, tik blong olgeta i sem mak nomo.

11-13Nao man ya i makem bigfala blong rod ya we i pastru long doa ya. Bigfala blong hem i kasem faef meta. Mo hem i makem bigfala blong rod we i pas long medel blong ol rum ya blong ol gad. Hem i joenem saes blong bigfala blong tufala rum ya wetem bigfala blong rod, nao mak blong hem we i stat long wol long bak blong wan rum, i krosem rod ya, i go long wol long bak blong rum we i stap narasaed long hem, i kasem twelef meta haf. Long fran blong ol rum blong ol gad ya wanwan, i gat wan wol we hae blong hem i kasem haf meta nomo, mo bigfala blong hem tu i kasem haf meta. Mo ol rum ya wanwan oli skwea, we evri saed wanwan i kasem tri meta. Mo hem i makem bigfala blong rod we i pas long medel blong ol bigfala wol, we oli seraot ol rum blong ol gad. Bigfala blong rod ya i kasem sikis meta haf.

14Long en blong rod ya blong go long bigfala yad ya insaed, i gat wan rum i stap, nao man ya i makem rum ya, i luk se bigfala blong hem i kasem ten meta.

15Nao longfala blong rod ya, i stat long doa i go bitim bigfala rum ya, i go kasem bigfala yad ya insaed, i kasem twanti faef meta.

16I gat ol smosmol windo long ol rum ya evriwan, mo long ol wol ya we i seraot ol rum ya. Ol windo ya, oli smol afsaed, mo oli open bigwan insaed. Mo i gat ol pija blong ol pamtri* tu we oli katem long ol wol blong rod ya.

Bigfala yad blong haos blong Hae God

17Nao man ya i tekem mi, mitufala i gotru long doa, mitufala i go insaed long bigfala yad ya blong haos* blong Hae God. Long bigfala wol ya we i goraon long bigfala yad ya, i gat toti rum we oli wokem long saed blong wol ya insaed. Mo long fran blong ol rum ya daon, i gat ol ston we ol man oli putum long floa blong flasem, we man i save wokbaot long hem.

18Floa ya we oli flasem long ston, hem i goraon long yad ya, mo bigfala blong hem i kasem twanti tu meta, we i sem mak long mak blong ol rod we oli go insaed long bigfala yad ya. Mo insaed bakegen, i gat narafala yad blong haos ya, we i antap moa long yad ya.

19Nao i gat wan doa blong narafala yad antap, we ol man oli pas long hem blong go insaed long narafala yad ya we i insaed olgeta. Nao man ya i makem bigfala yad ya, i stat long doa ya blong go afsaed, i kam kasem doa blong go insaed long narafala yad ya insaed, mo bigfala blong hem i kasem fifti meta.

Doa we i lukluk i go long not

Nao man ya i tekem mi, mitufala i go long doa ya we i lukluk i go long not.

20Nao hem i makem rod blong doa ya we i blong go insaed long bigfala yad ya.

21Nao long tufala saed blong rod ya we i pas i gotru long doa ya, i gat sikis rum blong ol gad. I gat tri narasaed mo tri narasaed, mo ol wol i seraot olgeta. Ol rum ya wetem bigfala rum ya long doa, mo ol wol we oli seraot olgeta, mak blong olgeta evriwan i sem mak nomo olsem olgeta ya long doa ya we i lukluk i go long is. Longfala blong rod ya i kasem twanti faef meta, mo bigfala blong hem i kasem twelef meta haf.

22Bigfala rum ya long doa, mo ol windo, mo ol pija blong ol pamtri* we oli katem long wol, olgeta evriwan oli sem mak nomo olsem olgeta ya long doa ya we i lukluk i go long is. Long doa ya afsaed, i gat seven step i kam antap long hem, mo long nara en blong rod ya insaed, i gat bigfala rum ya long doa we i lukluk i go insaed long bigfala yad ya.

23Nao stret long narasaed long bigfala yad ya, i gat wan doa blong go long narafala yad ya we i insaed olgeta, we i sem mak olsem hemia long saed i go long is. Nao man ya i makem bigfala yad ya, i stat long doa ya blong go afsaed, i kam kasem doa blong go insaed long narafala yad ya insaed, mo bigfala blong hem i kasem fifti meta.

Doa we i lukluk i go long saot

24Nao man ya i tekem mi, mitufala i go long saed ya we i lukluk i go long saot, mo long saed ya, mi luk wan doa bakegen. Nao hem i makem ol wol blong rod blong doa ya wetem bigfala rum ya long doa we i lukluk i go insaed long bigfala yad ya, mo oli sem mak nomo olsem ol narawan ya.

25Mo i gat ol windo long ol rum insaed long rod ya, olsem ol narawan ya nomo. Longfala blong rod ya i kasem twanti faef meta, mo bigfala blong hem i kasem twelef meta haf.

26Long doa ya afsaed, i gat seven step i kam antap long hem, mo long nara en blong rod ya insaed, i gat bigfala rum ya long doa we i lukluk i go insaed long bigfala yad ya. Mo i gat tu pija blong pamtri,* we oli katem tufala long wol blong tufala saed blong doa ya.

27Mo long saed ya tu, i gat wan doa we i blong go insaed long yad ya we i insaed olgeta. Nao man ya i makem bigfala yad ya, i stat long doa ya blong go afsaed, i kam kasem doa blong go insaed long narafala yad ya insaed, mo bigfala blong hem i kasem fifti meta.

Yad ya we i insaed olgeta mo doa we i lukluk i go long saot

28Nao man ya i tekem mi, mitufala i pastru long doa ya we i lukluk i go long saot, we i blong go insaed long yad ya we i insaed olgeta. Nao hem i makem rod blong doa ya wetem ol narafala samting blong hem, mo oli sem mak nomo olsem olgeta ya long bigfala wol ya afsaed.

29-30Ol rum blong ol gad mo bigfala rum ya long doa we i lukluk i go long bigfala yad, mo ol wol blong rod ya, evriwan oli sem mak nomo olsem olgeta ya long ol narafala doa. Mo i gat ol windo tu, long ol rum ya long doa ya. Longfala blong rod ya i kasem twanti faef meta, mo bigfala blong hem i kasem twelef meta haf.

31Bigfala rum ya i lukluk i go long bigfala yad ya, mo i gat tu pija blong pamtri* we oli katem tufala long wol blong tufala saed blong doa ya, mo i gat eit step i kam antap long hem.

Yad ya we i insaed olgeta mo doa we i lukluk i go long is

32Nao man ya i tekem mi, mitufala i pastru long doa ya we i lukluk i go long is, we i blong go insaed long yad ya we i insaed olgeta. Nao hem i makem rod blong doa ya wetem ol narafala samting blong hem, mo oli sem mak nomo olsem olgeta ya long bigfala wol ya afsaed.

33Ol rum blong ol gad, mo bigfala rum ya long doa we i lukluk i go long bigfala yad, mo ol wol blong rod ya, evriwan oli sem mak nomo olsem olgeta ya long ol narafala doa. Mo i gat ol windo tu long ol rum ya long doa ya. Longfala blong rod ya i kasem twanti faef meta, mo bigfala blong hem i kasem twelef meta haf.

34Bigfala rum ya i lukluk i go long bigfala yad ya, mo i gat tu pija blong pamtri* we oli katem tufala long wol blong tufala saed blong doa ya, mo i gat eit step i kam antap long hem.

Yad ya we i insaed olgeta mo doa we i lukluk i go long not

35Nao man ya i tekem mi, mitufala i pastru long doa ya we i lukluk i go long not, we i blong go insaed long yad ya we i insaed olgeta. Nao hem i makem rod blong doa ya wetem ol narafala samting blong hem, mo oli sem mak nomo olsem olgeta ya long bigfala wol ya afsaed.

36Ol rum blong ol gad, mo bigfala rum ya long doa we i lukluk i go long bigfala yad, mo ol wol blong rod ya, evriwan oli sem mak nomo olsem olgeta ya long ol narafala doa. Mo i gat ol windo tu, long ol rum ya long doa ya. Longfala blong rod ya i kasem twanti faef meta, mo bigfala blong hem i kasem twelef meta haf.

37Bigfala rum ya i lukluk i go long bigfala yad ya, mo i gat tu pija blong pamtri* we oli katem tufala long wol blong tufala saed blong doa ya, mo i gat eit step i kam antap long hem.

Ol rum blong mekemrere ol sakrefaes

38Nao i gat wan rum we i joen long saed blong bigfala rum ya, long doa ya blong go insaed long yad ya we i insaed olgeta. Mo rum ya i blong wasem ol anamol we oli kilim olgeta, blong mekem sakrefaes ya we i blong bonem i bon evriwan, blong mekem wosip long Hae God.

39Long bigfala rum long doa ya, i gat fo tebol i stap, we tu i stap narasaed mo tu i stap narasaed. Ol tebol ya, i blong ol man oli kilim ol anamol antap long olgeta blong mekem sakrefaes. Hemia ol sakrefaes ya we i blong bonem i bon evriwan blong mekem wosip long Hae God, mo ol sakrefaes blong tekemaot sin, mo ol spesel sakrefaes blong tekemaot sin blong man we i ravem Hae God, no i ravem narafala man.

40Mo afsaed, klosap long doa we i lukluk i go long not, i gat fo tebol i stap, we oli sem mak nomo olsem olgeta ya insaed long rum ya, tu i stap narasaed long doa mo tu i stap narasaed long hem.

41I gat eit tebol evriwan i stap we i blong ol man oli kilim ol anamol antap long olgeta blong mekem ol sakrefaes. I gat fo i stap insaed long rum, mo fo i stap afsaed, long bigfala yad ya.

42I gat fo tebol bakegen i stap we oli wokem long ston we oli katemgud olgeta. Ol tebol ya i blong putum ol mit blong sakrefaes long olgeta. Hemia sakrefaes ya we i blong bonem i bon evriwan blong mekem wosip long Hae God. Mo ol tul blong yusum blong mekem sakrefaes oli stap antap long ol tebol ya. Ol tebol ya evriwan oli sem mak. Hae blong olgeta i kasem fifti sentemeta, mo olgeta evriwan i skwea, we ol fo saed blong olgeta wanwan i kasem seventi faef sentemeta.

43Long wol blong rum ya oli hangem ol huk i goraon long hem, we longfala blong olgeta wanwan i kasem ten sentemeta. Mo ol mit blong sakrefaes oli stap putum long ol tebol ya.

Ol rum blong ol pris

44Nao man ya i tekem mi, mitufala i go insaed long yad ya we i insaed olgeta. Mo long yad ya, i gat tu rum we doa blong tufala i lukluk i go long yad ya. Wan i stap long saed blong doa ya long saed i go long not, i lukluk i go long saot, mo narawan i stap long saed blong doa ya long saed i go long saot, i lukluk i go long not.

45Nao man ya i talem long mi, se rum ya we i lukluk i go long saot, hem i blong ol pris* we oli stap lukaot long ol wok long haos* blong Hae God.

46Mo rum ya we i stap lukluk i go long not, hem i blong ol pris we oli stap lukaot long ol wok long olta. Hemia ol pris we oli laen blong pris ya Jadok bifo. Long olgeta ya we oli laen blong Livae,* olgeta ya nomo oli gat raet blong kam klosap long Hae God blong mekem wok blong hem.

Yad ya we i insaed olgeta mo haos blong Hae God

47Nao man ya i makem yad ya we i insaed olgeta. Yad ya i skwea, we olgeta saed blong hem wanwan i kasem fifti meta. Mo olta i stap long medel blong hem, stret long fran blong haos* blong Hae God we i lukluk i go long is.

48-49Nao hem i tekem mi, mitufala i go insaed long rum ya long doa blong go insaed long haos ya. I gat ol step we i kam antap long doa ya, mo i gat tu bigfala pos i stanap klosap long doa ya, wan i stanap narasaed, mo narawan i stanap narasaed. Doa ya blong kam insaed i stap stret long medel, mo hem i makem doa ya, mo bigfala blong hem i kasem seven meta, mo tik blong wol ya i kasem tu meta haf. Mo hem i makem rum ya insaed, mo bigfala blong hem i kasem ten meta, mo longfala blong hem i kasem sikis meta.