1 Samuel 23 - Bislama Bible Revised 2012

Deved i sevem taon ya Kehila

1Nao Deved i harem nius se ol man Filistia oli stap mekem faet long taon ya Kehila long distrik ya Juda,* mo oli stap stilim ol kakae we ol man oli jes tekemaot long garen.*

2Nao hem i talem long pris* blong i faenemaot long Hae God se, “?Bambae mi mi go faet long ol man Filistia ya, no olsem wanem?”

Nao Hae God i talem se, “Yes, yu go faet long olgeta, yu sevem taon ya.”

3Be ol man blong hem oli talem se, “Naoia, yumi stap long distrik ya Juda, be i gat plante man we yumi stap fraet long olgeta. Be sipos yumi go long Kehila blong faet long ol man Filistia ya, bambae i kam mowas olgeta.”

4Ale, hem i talem long pris blong i faenemaot long Hae God bakegen, mo Hae God i talem long hem se, “Yufala i go. Mi bambae mi putum ol man Filistia ya long han blong yufala.”

5Nao hem wetem ol man blong hem oli go long taon ya, oli mekem faet long ol man Filistia, oli kilim plante long olgeta, mo oli holem ol anamol blong olgeta. Mo long fasin ya nao, hem i sevem taon ya.

6Long taem ya we pris ya Abiata i ronwe long King Sol, i kam joen long Deved long Kehila, hem i holem spesel klos ya efod* we i blong hae pris, i karem i kam.

7Nao sam man oli go talemaot long King Sol we Deved i go stap long Kehila. Nao king i talem se, “!Saye! God i putum hem long han blong mi finis. Hem i go stap long wan taon we i gat bigfala stonwol i goraon long hem, wetem ol bigfala doa blong hem we oli save sat gud. !Hem i stap long wan trap ya!”

8Nao hem i singaot ol soldia blong hem blong oli go hivap raon long taon ya, blong oli kilim Deved wetem ol man blong hem oli ded.

9Be taem Deved i harem nius we king i stap mekem rod blong kam kilim hem, hem i talem long pris ya Abiata se, “Yu tekem efod ya i kam, yu faenemaot tingting blong Hae God.”

10Nao Deved i prea se, “Hae God. Mifala i laen* blong Isrel,* mo yu yu God blong mifala. Mi mi man blong wok blong yu, be mi harem se king i stap mekem rod blong kam spolem taon ya from mi.

11?Olsem wanem? ?I tru se hem bambae i kam, olsem we mi harem? ?Mo sipos hem i kam, bambae ol man blong taon ya oli putum mi long han blong hem? Hae God, yu yu God blong mifala. Plis yu givim ansa long mi.”

Nao Hae God i soemaot long hem, se king bambae i kam.

12Nao hem i prea bakegen, i talem se, “?Be olsem wanem long ol man Kehila ya? ?Bambae oli putum mifala long han blong hem?”

Mo Hae God i soemaot long hem, se bambae oli mekem.

13Nao wantaem nomo, hem wetem ol man blong hem, we samwe long sikis handred olgeta oli aot long taon ya, nao oltaem nomo, oli stap muf i go. Mo taem king i harem we oli aot finis long taon ya oli ronwe, hem i lego tingting ya blong hem bakegen.

Deved i stap haed long ples blong hil

14Nao Deved i go long bigfala draeples ya klosap long taon ya Sif, i stap haed long ol hol blong ston olbaot long ples blong hil long ples ya. Mo oltaem, King Sol i stap traem blong faenem hem, be God i no letem blong king i holem hem.

15Nao Deved i luksave we king i wantem tumas blong kilim hem.

Nao long taem ya, Deved i stap long Hores, long haf blong draeples ya klosap long Sif.

16Mo Jonatan i kam luk hem long ples ya, i leftemap tingting blong hem, i talemgud long hem we God i stap lukaot long hem.

17Hem i talem se, “Yu no fraet. Papa blong mi bambae i no save spolem yu. Hem i savegud we yu nao bambae yu kam king blong Isrel,* mo we mi bambae mi kam nambawan haeman blong yu.”

181 Saml 18.3Nao tufala i mekem promes long nem blong Hae God bakegen, blong tufala i stap gud oltaem. Nao biaen, Jonatan i aot i gohom, mo Deved i stap long ples ya.

19 Sam 54 Nao sam man Sif oli go luk King Sol long Gibea, oli talem long hem se, “King. Naoia Deved i stap long distrik blong mifala. Hem i stap haed olbaot long ol hol blong ston long haf blong draeples ya saed i go long saot, long hil ya Hakila, long ples ya Hores.

20Mifala i save we yu yu wantem tumas blong holem hem. I gud yu kam long ples blong mifala, nao bambae mifala i givhan long yu.”

21Mo king i talem se, “!Yufala i kaen tumas long mi! !Prea blong mi we Hae God bambae i blesem yufala!

22Yufala i go jekemapgud bakegen. Yufala i go askemgud wanem ples hem i stap long hem naoia, mo hu man i luk hem long ples ya. Mi mi harem se man ya i waes tumas blong mekem trik.

23Yufala i go faenemaot stret ol ples we hem i stap haed long hem, mo kwiktaem nomo, yufala i kambak bakegen blong talem long mi. Bambae mi mi go wetem yufala, mo sipos hem i stap long ples ya yet, bambae mi lukaot hem, gogo mi faenem hem. Nating we sipos mi finisim olgeta ples long Juda,* be bambae mi mas faenem hem.”

24Nao olgeta oli aot long ples ya, oli gobak long Sif. Olgeta oli go fastaem, mo king i go biaen.

Nao long taem ya, Deved wetem ol man blong hem oli stap long bigfala draeples ya long distrik ya Juda, saed i go long saot. Oli mekem ples blong olgeta long wan bigfala levelples long medel blong ol hil, klosap long taon ya Maon.

25Nao king wetem ol man blong hem oli kam blong lukaot hem, be taem hem i harem we oli stap lukaot hem, hem i go long wan bigfala hil long draeples we i ston nomo, klosap long taon ya, nao i stap long ples ya. Taem king i harem samting ya, hem i girap, i biaen long hem.

26Nao king wetem ol man blong hem oli stap narasaed long hil ya, mo Deved wetem ol man blong hem oli stap narasaed. Nao Deved wetem ol man blong hem oli stap hareap blong ronwe long king ya wetem ol man blong hem, from we oli stap kam klosap tumas long olgeta, we klosap oli kasem olgeta.

27Be wan man i resis i kamtru long king stret long taem ya, nao i talem long hem se, “!King! !Yu hareap! !Yu kambak naoia! !Ol man Filistia oli stap kam insaed long ples blong yumi blong mekem faet!”

28Nao king i no moa ronem Deved, i tanemraon i gobak blong faet long ol man Filistia. Taswe oli putum nem blong ples ya, se Sela Hamoleket, we i min se “Ston we tufala i seraot”.

29Nao Deved i aot long ples ya, i go stap klosap long taon ya Enkedi i stap haed olbaot long ol hol blong ston long ples ya.