Dutronome 31 - Bislama Bible Revised 2012

Josua i tekem ples blong Moses

1Nao Moses i gohed, i toktok long ol laen* blong Isrel,*

2Nam 20.12i talem se, “Naoia mi mi kam olfala tumas, yia blong mi i kasem wan handred twanti finis, mo mi mi no moa naf nao blong lidim yufala. Mo bakegen, Hae God i God blong yumi, mo hem i talem long mi finis, se bambae mi mi no save gokros long Jodan Reva ya.

3Hem bambae i go fastaem, yufala i biaen, mo bambae hem i spolem ol man blong kantri ya we yufala i stap go long hem, blong bambae yufala i save holem ples ya, i blong yufala. Mo Josua, hem bambae i kam lida blong yufala olsem we Hae God i talem finis.

4Nam 21.21-35Hae God bambae i spolemgud ol man ya, stret olsem we hem i winim King Sihon mo King Og we tufala i king blong ol man Amoro,* mo i spolem ol ples blong tufala.

5Hem bambae i mekem we yufala i winim olgeta ya, mo bambae yufala i mas mekem long olgeta stret olsem we mi mi talem long yufala.

6Tingting blong yufala i mas strong, mo yufala i mas stanap strong oltaem. Bambae yufala i no mas fraet long olgeta. Hem i God blong yumi, mo hem i no save gowe long yufala samtaem. Bambae hem i no save lego yufala, oltaem bambae hem i stap wetem yufala.”

7Nao Moses i singaot Josua i kam, mo long fes blong olgeta laen blong Isrel, hem i talem long hem se, “!Josua! Tingting blong yu i mas strong, mo yu mas stanap strong oltaem. Yu nao bambae yu lidim ol man ya, blong yufala i go tekem kantri ya we Hae God i promes* bifo long ol bubu blong yumi, se bambae i givim long yumi.

8Jos 1.5; Hib 13.5Hae God bambae i no save gowe long yu. Hem bambae i no save lego yu samtaem. Nao from samting ya, tingting blong yu bambae i no mas foldaon, mo yu yu no mas fraet. Hae God bambae i stap lidim yu, mo oltaem, hem bambae i stap wetem yu.”

Evri seven yia, ol pris oli mas ridimaot Loa blong Hae God

9Nao Moses i raetemdaon Loa ya blong Hae God, mo i givim i go long ol pris,* mo long ol lida blong ol laen* blong Isrel.* Ol pris ya oli laen blong Livae,* mo oli stap lukaot long Bokis ya we i Saen blong Promes* blong Hae God.

10-11Dut 15.1,2; Dut 16.13-15Nao hem i talem long olgeta se, “Evri seven yia, long yia ya we i taem blong fogetem ol kaon, long Lafet* ya blong ol Wansaed* Haos, yufala i mas ridimaot Loa ya, blong olgeta man bambae oli harem. Hae God i God blong yumi, mo taem yufala evriwan i kam wanples long fes blong hem, blong mekem wosip long hem long ples ya we hem bambae i jusumaot, bambae yufala i mas ridimaot Loa ya long olgeta.

12Long taem ya, bambae yufala i mas singaot olgeta man wetem ol woman oli kam wanples, wetem ol pikinini mo ol strenja ya we oli stap long ol ples blong yufala, blong olgeta evriwan oli save harem tok ya, mo blong oli save lanem fasin ya blong ona long Hae God, mo blong oli save obei long olgeta toktok blong hem oltaem.

13Nao long fasin ya, ol pikinini ya blong yufala wetem olgeta we bambae oli kamaot biaen long yufala, bambae oli save harem Loa ya, nao oltaem, long taem ya we bambae oli stap long kantri ya long narasaed Jodan Reva we bambae yufala i go blong holem, bambae oli save lanem fasin ya blong obei long Hae God.”

Hae God i givim las toktok long Moses

14Nao Hae God i talem long Moses se, “Moses. Naoia yu yu olfala finis, taem blong yu i stap kam klosap. I gud yu singaot Josua we papa blong hem Nun, yu tekem hem i kam long Haos Tapolen blong mi, blong bambae mi mi givim ol toktok long hem we hem i mas folem.” Nao Moses wetem Josua tufala i go insaed long Haos Tapolen ya,

15mo Hae God i kamtru long tufala long wan bigfala klaod we i stanap stret, i stap stanap long doa blong Haos Tapolen ya.

16Nao Hae God i talem se, “Moses. Bambae i no longtaem, yu yu ded, mo taem we yu yu ded, ol man ya bambae oli lego mi, mo bambae oli brekem promes* ya we mi mi mekem wetem olgeta. Bambae oli girap, oli go mekem wosip long ol narafala god ya we oli god blong kantri ya we bambae oli go holem i blong olgeta.

17Nao taem olgeta oli mekem olsem, mi bambae mi kros long olgeta, mi lego olgeta, mo plante samting bambae i kam spolem olgeta. Bambae oli kasem plante bigbigfala trabol, mo taem ol samting ya oli kam kasem olgeta, bambae oli jes save nao we mi mi God blong olgeta, be mi no moa stap wetem olgeta.

18Long taem ya, bambae mi mi no moa glad blong givhan long olgeta, from we oli stap mekem ol rabis fasin, mo oli stap mekem wosip long ol narafala god.

19“Naoia, bambae mi mi givim wan sing long yufala, mo mi wantem blong yutufala i raetemdaon. Moses, mi wantem blong yu yu tijim ol laen* blong Isrel* long hem, blong oli stap singsing long hem, nao sipos oli girap, oli tok agens long mi, be sing ya bambae i witnes blong mi.

20Bambae mi mi tekem olgeta i go long gudfala kantri ya we mi promes finis long ol bubu blong yufala bifo, se bambae mi givim. Kantri ya, graon blong hem i gudfala tumas. Ol kakae blong hem oli gudfala tumas mo oli stap gru gud oltaem. Taem oli go long hem, bambae oli no save sot long wan samting. Bambae oli gat plante kakae, mo bambae oli stap harem gud olwe. Be bambae oli girap, oli tanemraon, oli go mekem wosip long ol narafala god. Bambae oli lukluk nogud long mi, mo bambae oli brekem promes ya we mi mekem wetem olgeta.

21Nao from samting ya, plante bigbigfala trabol bambae i kam kasem olgeta. Be bambae oli stap singsing long sing ya yet, mo hem bambae i witnes blong mi blong soemaot ol rabis fasin blong olgeta. Nating we mi no tekem olgeta i go long kantri ya yet we mi promes blong givim long olgeta, be mi mi save tingting blong olgeta finis.”

22Nao long sem dei ya nomo, Moses i raetemdaon sing ya, mo i tijim ol laen blong Isrel long hem.

23 Nam 27.23; Jos 1.6 Nao Hae God i toktok long Josua, i talem long hem se, “Josua. Tingting blong yu i mas strong, mo yu mas stanap strong oltaem. Yu nao bambae yu lidim ol laen blong Isrel i go long kantri ya we mi mi promes finis blong givim long yufala, mo oltaem, mi bambae mi stap wetem yu.”

24Nao Moses i gohed blong raetem Loa ya blong Hae God long buk, gogo i finisim olgeta haf blong hem evriwan.

25Mo taem hem i finisim olgeta, hem i singaot ol pris* oli kam. Olgeta ya oli laen blong Livae,* mo oli stap lukaot long Bokis ya we i Saen blong Promes* blong Hae God, mo hem i talem long olgeta se,

26“Hae God i God blong yumi. Yufala i tekem buk ya blong Loa blong hem, yufala i go putum long saed blong Bokis ya we i Saen blong Promes blong hem. Nao sipos ol man blong hem oli girap, oli tok agens long hem, buk ya bambae i stap long ples ya olsem wan witnes blong hem.

27Mi mi save finis we ol man ya oli stronghed tumas, oli man blong faet agens long Hae God. Oltaem long laef blong mi, oli stap faet agens long hem, mo sipos mi mi ded, bambae oli stronghed moa.

28Mi wantem yufala i tekem olgeta lida blong ol laen blong yumi wetem ol haeman blong yumi oli kam wanples, blong mi mi talemaot ol samting ya long olgeta blong oli harem. Mo bambae mi mi singaot heven mo wol blong tufala ya nao i witnes blong mi, se mi talemgud ol samting ya long olgeta.

29Mi mi savegud se sipos mi mi ded, ol man ya bambae oli mekem ol fasin we i nogud we i nogud, mo bambae oli tanem baksaed long ol samting ya we mi mi tijim olgeta long hem. Bambae bigfala trabol i kam kasem olgeta, from we bambae oli mekem Hae God i kros tumas long olgeta. Bambae oli stap mekem ol samting we hem i talem finis se oli no mas mekem.”

Sing we Moses i tijim olgeta long hem

30Nao Moses i ridim baehat olgeta tok blong sing ya we hem i raetemdaon, mo olgeta laen* blong Isrel* oli stap lesin gud long hem.