Aesea 16 - Bislama Bible Revised 2012

1“Nao long vison ya, mi mi luk we ol man Moab oli go stap long kantri ya Edom, long taon ya Sela, we i stap long draeples, mo oli sanem ol smol sipsip i kam long Jerusalem,* blong givim long king blong yumi we i stap rul long ples ya.

2Be olgeta oli stap longwe, long saed blong Anon Reva, oli stap wet. Oli stap go olbaot nomo, oli stap kam, oli stap go, olsem pijin we man i ronemaot long nes blong hem.

3“Olgeta oli askem long king ya se, ‘?Bambae mifala i mekem olsem wanem? Plis yu talem long mifala, from we yu yu olsem bigfala tri we man i save go haed long sed blong hem, blong bigsan i no save kasem hem. Plis yu blokemgud mifala, blong mifala i save stap gud aninit long han blong yu. Mifala i ronwe finis long ples blong mifala, mo mifala i no save gobak. Plis yu haedem mifala long ples we i sef gud, we i no gat man i save faenem mifala.

4Plis yu letem mifala i kam stap long kantri blong yu. Plis yu blokemgud mifala, blong olgeta ya we oli wantem spolem mifala, bambae oli no save kasem mifala.’ ”

(Nao profet i talem se, “Be fasin ya we ol man oli stap mekem i strong tumas long ol man Moab, mo oli stap spolem ples blong olgeta, hemia bambae i finis, mo ol man ya bambae oli gowe bakegen.

5Mo long taem ya, wan long olgeta we oli stap kamaot biaen long King Deved, hem bambae i rul long yumi long fasin we i holemgud ol tok we Hae God i talem, mo we oltaem, bambae hem i lavem man. Hem bambae i muf kwik blong mekem ol stret fasin, mo bambae i lukaot gud blong jajem man long stret fasin.”)

6Nao profet i talem se, “Mo long vison ya, mi luk we yufala ol man Juda,* yufala i talem se, ‘Yumi harem plante taem we ol man Moab ya oli praod we i praod. Yumi savegud we olgeta oli stap leftemap olgeta tumas, mo we oli stap tinghae tumas long olgeta, nao oli no gat sore long narafala man, be yumi savegud tu we ol tok ya blong olgeta i no gat stamba blong hem.’ ”

7Nao profet i talem se, “Mo long vison ya, mi luk we ol man Moab ya oli krae bigwan from ol trabol ya we i kasem olgeta. Taem olgeta oli stap tingbaot ol gudgudfala kakae ya we bifo oli stap kakae long taon ya Kireres, olgeta evriwan oli krae we i krae. Olgeta oli harem we tingting blong olgeta i foldaon olgeta.

8Ol garen blong olgeta klosap long taon ya Hesbon, wetem ol plantesen blong rop ya grep,* klosap long taon ya Sibma, ol enemi blong olgeta oli spolem olgeta evriwan. Naoia, waen blong ol plantesen ya i stap mekem ol haeman blong olgeta oli drong. Ol plantesen blong grep ya long Sibma oli ron i go long not go kasem taon ya Jasere, mo long is, oli ron i go kasem draeples, mo long wes, oli ron i go kasem narasaed Ded Si.*

9Be long vison ya, mi mi krae from ol plantesen ya blong ol man Sibma, olsem we mi krae from ol man Jasere. Wota blong ae blong mi i stap ron bigwan from ol man blong taon ya Hesbon mo from taon ya Eleale, from we ol garen blong olgeta oli karem kakae, be i no moa gat man i stap blong go karem kakae i kam, we i glad long hem, i stap singsingaot from.

10Graon blong olgeta i nambawan, be i no moa gat wan long olgeta i stap, blong i stap harem gud long garen blong hem. Mo long ol plantesen blong rop ya, i no moa gat man i stap, blong i harem gud, i stap singsing from. I no moa gat man i stap purumpurumbut long grep, blong mekem waen long wota blong hem. Naoia, ol man oli glad tumas, we oli stap singsingaot bigwan from, be long vison ya, mi mi luk we fasin ya i finis.

11-12Mo mi mi sore tumas long ol man Kireres wetem ol narafala man Moab. Olgeta ya oli stap klaem i go antap long hil, blong go long ol ples blong wosip blong olgeta, be bodi blong olgeta i slak blong nating. Oli stap go prea long ol ples ya blong prea blong olgeta, be blong nating nomo. Mi mi harem nogud tumas from olgeta, mo mi stap krae bigwan from.”

13Nao profet i talem se, “Hemia nao ol tok we i tokbaot ol man Moab, we Hae God i talemaot fastaem.

14Be naoia, hem i tok bakegen, i talem se, ‘Naoia, Moab i wan rij kantri, be long tri yia stret, bambae hem i kam pua. Naoia, hem i gat plante man long hem, be bambae fiu nomo long olgeta oli stap, mo bambae oli no moa strong.’ ”