1Bakegen, Profet Hosea i talemaot we Hae God i talem se, “Ol man Isrel.* !Faet i kam nao! !Yufala i blu pupu! Ol enemi blong yufala oli stap kamdaon blong holem kantri blong mi, olsem we bigfala pijin ya igel* i sut i kamdaon blong holem faol. Yufala i man blong mi, be yufala i brekem promes* ya we mi mekem wetem yufala, mo yufala i no wantem harem tok blong mi, yufala i stap agens long hem.
2Yufala i stap singaot i kam long mi se, ‘God blong mifala. Mifala i man blong yu, mifala i savegud yu.’
3Be yufala i no wantem nating blong folem ol gudfala fasin. Nao from samting ya, ol enemi blong yufala bambae oli kam ronem yufala.
4“Yufala i stap jusumaot ol man ya we oli kam king blong yufala, be yufala i stap mekem long tingting blong yufala nomo. Ol lida ya blong yufala we yufala i stap putumap olgeta, be yufala i no stap askem long mi fastaem. Mo yufala i stap tekem ol silva mo gol blong yufala i kam wanples, yufala i stap wokem ol aedol long hem, be ol aedol ya i blong spolem yufala nomo.
5Yufala long Sameria,* yufala i wokem wan pija blong bul long gol, mo yufala i stap mekem wosip long hem, be mi mi no wantem fasin ya nating, mi agens long hem. Mo mi kros tumas long yufala from samting ya. ?Fasin ya bambae i stap gogo kasem wetaem?
6Pija ya, wan long yufala we i gat gudhan i wokem, be hem i no god nating. Bambae mi smasem, mi brebrekem long ol smosmol pis.
7Fasin nogud blong yufala i olsem smol win nomo, be samting we i kamaot long hem, bambae i olsem wan bigfala waelwin we i save spolem evri samting. Ol garen ya blong yufala we yufala i planem, bambae oli no karem kakae, be sipos oli karem, bambae ol man blong narafala kantri oli kam kakae ol frut blong olgeta.
8Naoia, yufala i kam olsem ol man blong ol narafala kantri nomo we fasin blong olgeta i nogud. Yufala i olsem graonpot we i brok finis, we man i no moa save yusum blong wan samting.
9Yufala i stronghed tumas, yufala i olsem wael dongki stret. Yufala i stap folem tingting blong yufala nomo. Yufala i girap, yufala i go long kantri ya Asiria, yufala i askem long hem blong i givhan long yufala, mo yufala i stap pem ol narafala kantri tu blong oli kam blokemgud yufala.
10Naoia bambae mi tekem yufala i kam wanples, mi panisim yufala. I no longtaem bambae king blong Asiria i girap, i kam mekem i strong tumas long yufala, we bambae i mekem yufala i harem nogud tumas.
11“Ol man Isrel. Mi mi Hae God. Yufala i stap wokem plante olta blong tekemaot sin, be taem yufala i bonem sakrefaes long olgeta, yufala i stap mekem sin agens long mi nomo. Taem namba blong ol olta ya i stap kam plante moa, be ol sin blong yufala tu oli stap kam plante moa long fes blong mi.
12Mi mi raetemdaon plante tok blong mi blong tijim yufala, be yufala i stap lukluk ol tok ya se oli rabis nomo, oli tok blong man blong narafala kantri.
13Yufala i stap kilim ol anamol blong mekem sakrefaes blong mekem wosip long mi, mo yufala i stap kakae mit blong olgeta, be mi mi no glad nating long yufala from ol sakrefaes ya. Naoia bambae mi panisim yufala from ol sin blong yufala. !Bambae mi sanem yufala i gobak long Ijip bakegen!
14“Yufala i stap wokem ol bigbigfala haos blong king blong yufala, be yufala i fogetemgud mi, we mi mi mekem yufala. Mo ol man Juda* tu, oli stap wokem ol bigbigfala taon blong olgeta we bigfala stonwol i goraon long olgeta. Be ol haos ya blong king we yufala i wokem, mo ol bigbigfala taon ya we olgeta oli wokem, mi bambae mi sanem faea i kam we bambae i bonem olgeta evriwan.”
Who We AreWhat We EelieveWhat We Do
2025 by iamachristian.org,Inc All rights reserved.
